-
Yuda 1
1 Mine Yuda, ndzringa nandzra wa Yesu Kriste ni makwa Yakobe, ndzritsralela lavavitaniwiki, lavazrandzriwaka ha Xikwembu Nkulukumba, lwanga Tatana, ni lavabekiseliwiki Yesu Kriste, ndzriku:
2 Ndzrin’winavelela kuva timpsalu, kuzrula ni lizrandzru svin’witalela.
3 Vazrandzriwa, ndzrisvijuli hi mbilu hinkwayu kun’witsralela mayelanu ni kuhuluxiwa loku n’wine na mine hinga naku, kambe ndzrisvivoni na svili sva xihatla kun’witsralela lesvaku ndzrin’witsratsriya akuva n’wilwa hi ntamu svinene, n’wilwela lipfumelo ledzri vhanu va Xikwembu Nkulukumba lava kuxwenga vanganyikiwa dzrone kan’we ntsena.
4 Hikuva ku ni vhanu va kukazri lavanganhingena hi kutsuma, lava kusukela khale kutsraliwiki lesvaku vatatsremeliwa xikhatiso lexi, vanga vhanu lavangachavikiki Xikwembu Nkulukumba, lavatiyimelelaka hi vumbilu bza Xikwembu Nkulukumba wezru akuva vayenca sva kunyenyentsa, vatlhela valandzrula N’winyi wezru ni Hosi yezru leyinga yin’we ntsena, Yesu Kriste.
5 Kutani, nambilesvi n’wimitivisisaka ha hombe minchumu leyi hinkwayu, ndzrinavela kun’widzrimuxa lesvaku Yehovha antsrhunxi tiko dzrakwe atikweni dzra Gibita, kambe agami ahelisa lava afaka vange na lipfumelo.
6 Ni tintsrumi letikaka tingabekisanga xiyimu xa tone xa kusungula, kambe tifulazreliki kaya dzra tone, atibeki amunyameni wa kuchavisa na titsrimbiwi hi timpencana hi la kungahelikiki, tiyimela kuyavanyisiwa hi siku ledzrikulu.
7 Hi ndlela leyifanaka, vhanu va le Sodoma na Gomora ni madoropa ya le kusuhi, vahanyi hi vugangu lebzitsremaka nhlana vatlhela valandzrelela kunavela ka nyama lokungeke ka ntumbuluku. Kubiwa kwavu hi ndzrilo lowungahelikiki svitizrela kuva xikombiso.
8 Kambe, hi ndlela leyifanaka, vhanu lava na vone vale matlavini, vahanya vutomi bza xambza, vayeyisa vuhosi vatlhela vazruka vhanu lavakhensekaka.
9 Kambe, nambi Mikayele, ntsrumi leyikulu, ankama lowu angaholova na Diyavulosi na valwetana hi ntsrumbu wa Moxe, angavanga nawu nhlana wa kumuyavanyisa hi mazritu ya kuzruketela, kambe ati: “Yehovha aakukhwavele!”
10 Nambitanu, vhanu lava vakanela kubiha hi minchumu hinkwayu leyi hi ntshimantshima vangamitwisisiki ni kumitwisisa; nakone minchumu hinkwayu leyi vamitwisisaka hi ntumbuluku, kufana ni svihazri lesvingapimisikiki, vatihona ha yone.
11 Khombo dzra vone! Hikuva vafambi hi ndlela ya Kayini, nakone vatsrutsrumi vanhingena xihoxweni xa Balama hi kufela muholo, vava vahelisiwa hi moya wa vupfukeli lowu Kora afaka ali nawu.
12 Vhanu lava i mintlhamu lemidlayisanaka aminkhubzini yenu ya kukombana lizrandzru ankama lowu vatikholisaka na n’wine hi svakuda; i vabzisi lavatidisaka na ni kudana vangadani; i matlavi lamangeke na mati lamapengwisiwaka hi moya; i mizri lemingeke na mihandzru loko kutlhasa nkama wa yone, lemifiki kubizri mitlhela mitsruvuliwa;
13 i mavimbi ya lwandle laya kulebza, lamatlhutlhaka khuvi mahumexa sviyenco sva wone sva kudanisa; i tinyeleti letitsrendzrelekaka, letibekiseliwiki kutsrhama na timphumile hi munyama hi la kungahelikiki.
14 Nambi Enoki, lweyi afaka ali mhunu wa vuntlhanu na vabizri kusukela ku Adamu, na yene aprofetile ha vone, loko aku: “Hi lweyi Yehovha atlhasiki ni masocha yakwe ya kuxwenga ya ntsrandzravahlayi,
15 akuva atsrhama ayavanyisa hinkwavu ni kutrsemela xikhatiso hinkwavu lavangachavikiki Xikwembu Nkulukumba hi nkonta ya sviyenco hinkwasvu sva kubiha lesvi vamuyeyisiki ha svone, ni hi nkonta ya minchumu hinkwayu ya kuchavisa leyi vadohi lavangachavikiki Xikwembu Nkulukumba vamuzrukiki ha yone.
16 Vhanu lava vahanya hi kun’unun’uta ni kusola lesvi vanyikiwiki svone, na valandzrelela kunavela kwavu; mfuzri milomu yavu mikanela mazritu ya kutikukumuxa, nakone vadzrumisa vhanu na svingahumi mbilwini ntsena akuva vakuma bindzru dzra kukazri.
17 Kambe n’wine, vazrandzriwa, dzrimukani mazritu lamahlayiwiki kusungula hi vapostola va Hosi yezru Yesu Kriste,
18 lawa afaka van’wibzela wone, vaku: “Ankameni wa vugamu kutava ni vahleki, lavahanyelaka kunyonxisa kunavela kwavu ka kuyenca minchumu ya manyala.”
19 Lava hi vone vahambanisaka vhanu; vahanyela kunyonxisa nyama ntsena nakone ava na mhaka ni minchumu ya moya.
20 Kambe n’wine, vazrandzriwa, tiyakani alipfumelweni dzrenu ledzra kuxwengisisa, na n’wikhongota hansi ka moya wa kuxwenga;
21 tibekisani alizrandzrwini dzra Xikwembu Nkulukumba, na n’wiyimela timpsalu ta Hosi yezru Yesu Kriste, akuva n’wikuma vutomi lebzingahelikiki.
22 Nangweso, vatsretsrelelani lavanga ni kuganaganeka;
23 n’wivahuluxa hi kuvawutla andzrilweni. Nangweso, tsretsrelelani vambeni na n’witivonela, na n’wivenga nambi xiyambalu lexinchimisiwiki hi mintizro ya nyama.
24 Kutani Lweyi anga ni ntamu wa kun’wipfuna kutsrhama na n’witiyile ni kun’wibeka amahlweni ka vuphatimi bzakwe na n’winge na xa kusoleka mfuzri na n’winyonxi svinene,
25 lwanga Xikwembu Nkulukumba mun’we, Muhuluxi wezru ha Yesu Kriste, Hosi yezru, aadzrumisiwe hi kola ka vuphatimi, vukulukumba, ntamu ni vuhosi bzakwe kusukela na minkama hinkwayu mingasiva kone, kutatlhasa svosvi, ni hi la kungahelikiki! Amen.