BRX

1   Antsrhaku ka lesvo, Yesu atsremakanya Lwandle dzra Galileya, kumbe Tiberya.

2   Kutani vhanu vanyingi svinene vamulandzra, hikusa afa vavona mahlolana lawa afaka amayenca hi kuhanyisa timbabzi.

3   Kutani Yesu atlhantukela anhaveni, atsrhamisa kone ni vadondzrisiwa vakwe.

4   Kutani nkhuvu wa vayuda, anga Paxkwa, afa wuli kusuhi.

5   Loko Yesu atlakuxa nhloko avona lesvaku abuyeliwa hi xitsrhungu lexikulu, aku ku Filipi: “Hitaxava kwini makati ya kuva kuda vhanu lava?”

6   Kambe lesvo afa ohlayela kumukamba ntsena, hikuva afa asvitiva lesvi afa ajula kusviyenca.

7   Filipi amuhlamula, aku: “Makati ya kuteka madzana mabizri ya madenari amadzringani akuva mun’wana ni mun’wana wavu akuma nambi xikhemu.”

8   Mun’we wa vadondzrisiwa vakwe, Andreye, makwa Simoni Petrosi, aku ku yene:

9   “Hi lexi xifanyana xinga ni ntlhanu wa makati ya sevhada ni svinhlampfana svibizri. Kambe svosvo svitavayenca yini vhanu va kutalisa xilesvi?”

10   Yesu aku ku yene: “Bzelani vhanu vatsrhamisa hansi.” Afa ku ni bzanyi bza bzinyingi ambangwini wa kone. Kutani vavanuna vatsrhamisa kone, na vajula kutlhasa ku ntlhanu wa makume ya madzana ya vone.

11   Yesu ateka makati, agama akhensa, amayavela lava afaka vatsrhamisile; ayenca lesvifanaka hi svinhlampfana, hi mpimu lowu afaka vawuxuva.

12   Kambe loko vadile vaxuzra, aku ku vadondzrisiwa vakwe: “Hlengeletani matlhantlha lamasaliki akuva kungacukumetiwi nchumu.”

13   Kutani vamahlengeleta, vatata khume dzra mintsrhava na mibizri hi matlhantlha lamasiyiwiki hi lavadiki makati ya kusukela ku ntlhanu wa makati ya sevhada.

14   Kutani loko vhanu vavoni hlolana ledzri adzriyenciki, vasungula kuhlaya lesvi: “Lweyi hakunene i Muprofeta lweyi abuyaka amisaveni.”

15   Kutani Yesu, hi kutiva lesvaku afa vajula kutatamukhoma vamuyenca hosi, atlhela asuka ayatsrhamisa anhaveni vusvakwe.

16   Loko dambu dzripela, vadondzrisiwa vakwe vafulamela lwandle.

17   Kutiloko vanhingeni bzatsrhwini, vawela lwandle vaya Kapernawume. Kutani afa bzili vusiku, nakuve Yesu afa angasitlhela ayavakuma.

18   Nakone lwandle afa dzrilebza hikusa afa kuhunga mheho leyikulu.

19   Kutani, loko vaweti kolomu ka ntlhanu wa makilometru kumbe ntlhanu na dzrin’we, vavona Yesu na afamba ahenhla ka lwandle, atsrhindzrekela abzatsrhwini; vatala hi kuchava.

20   Kambe aku ku vone: “Hi mine; n’wingachaveni!”

21   Hi kone vanganyonxa hi kumuyamukela abzatsrhwini, kutani hi nkama wolowo bzatsrhu dzritlhasa atikweni ledzri afaka vaya ku dzrone.

22   Mundzruku ka kone, xitsrhungu lexi afaka xisali ku tlhelo ledzrin’wana dzra lwandle xisvivona lesvaku afa kunge na bzatsrhu dzrin’wana kone handle ka xibzatsrhwana xin’we ntsena, ni lesvaku Yesu afa angafambanga hi bzatsrhu ni vadondzrisiwa vakwe, kambe vadondzrisiwa vakwe afa vasuki vusvavu.

23   Kambe kusuhi ni mbangu lowu vhanu vadiki kone makati antsrhaku ka loko Hosi yikhensile, afa kutlhasa mabzatsrhu mambeni lamabuyaka hi le Tiberya.

24   Kutani loko vhanu vavoni lesvaku Yesu ni vadondzrisiwa afa vange kone, vanhingena mabzatsrhwini yavu vaya Kapernawume vayajuletela Yesu.

25   Loko vamukumile halahaya ka lwandle, vaku ku yene: “Rabbi, utlhasi siku muni halenu?”

26   Yesu avahlamula, aku: “Ndzrihlayela mfuzri ndzrili ku n’wine: N’wine an’windzrijuleteli hilesvi n’wivoniki mahlolana, kambe hilesvi n’widiki makati n’wixuzra.

27   N’wingatizreleni svakuda lesvihelaka, kambe tizrelani svakuda lesvitamaka sviva kone sviyisa avuton’wini lebzingahelikiki, lesvi N’wana wa Mhunu atakan’winyika svone; hikuva hi lweyo afungiwiki hi Tatana, lwanga Xikwembu Nkulukumba.”

28   Kutani vaku ku yene: “Xana hifanela kuyenca yini akuva hitizra mintizro ya Xikwembu Nkulukumba?”

29   Yesu avahlamula, aku: “Ntizro wa Xikwembu Nkulukumba hi lowu: I kuva n’wipfumela ku lweyi amuzrumiki.”

30   Kutani vaku ku yene: “Uyenca hlolana dzrini hitadzrivona hiva hikukholwa? Utayenca yini kee?

31   Vatatana vezru vadi mana amananga, svanga hesvi kutsraliwiki lesvi: ‘Avanyiki svakuda sva kupfa tilweni vada.’”

32   Kutani Yesu aku ku vone: “Ndzrihlayela mfuzri ndzrili ku n’wine, Moxe angan’winyikanga svakuda sva kupfa tilweni, kambe Tatana an’winyika svakuda sva xihlayelamfuzri sva kupfa tilweni.

33   Hikuva svakuda sva Xikwembu Nkulukumba hi lweyi axikaka hi le tilweni, anyika misava vutomi.”

34   Kutani vaku ku yene: “Hosi, hinyike svakuda lesvo minkama hinkwayu.”

35   Yesu aku ku vone: “Hi mine svakuda sva vutomi. Lweyi abuyaka ku mine angaka angahatlheli atwa ndlala, ni lweyi apfumelaka ku mine angaka angahatlheli atwa tozra.

36   Kambe hi la ndzrihlayaka ha kone ku n’wine, n’windzrivonile kambe an’wikholwanga.

37   Hinkwavu lava Tatana andzrinyikaka vone vatata ku mine, kutani lweyi ataka ku mine ndzringaka ndzringamuhlongoli ni siku ni dzrin’we;

38   hikuva andzrixikanga hi le tilweni kutatayenca kuzrandzra kwanga, kambe ndzrixikeli kutatayenca kuzrandzra ka Lweyi andzrizrumiki.

39   Kutani kuzrandzra ka Lweyi andzrizrumiki hi loku, lesvaku ndzringachuki ndzrilahlekeliwa hi mhunu ni mun’we ku hinkwavu lava andzrinyikiki vone, kambe ndzrivapfuxa asikwini dzra vugamu.

40   Hikuva kuzrandzra ka Tatana wanga hi koloku: I kuva mani na mani lwavonaka N’wana ava apfumela ku yene akuma vutomi lebzingahelikiki, kutani mine ndzritamupfuxa asikwini dzra vugamu.”

41   Kutani vayuda vasungula kun’unun’uta hi mhaka yakwe hilesvi atiki: “Hi mine svakuda lesvixikiki hi le tilweni.”

42   Kutani vaku: “Xana lweyi ahi yene Yesu n’wana Yosefa, yelweyi nambi tatana wakwe ni mamana wakwe hivativaka? Kutani asvikotisa kuyini kuhlaya lesvaku: ‘Ndzrixiki hi le tilweni’?”

43   Yesu avayangula, aku: “Tsrhikani kun’unun’uta amakazri kwenu.

44   Aku na mhunu angataka ku mine handle ka loko Tatana, lweyi andzrizrumiki, amuyenca asvinavela; kutani mine ndzritamupfuxa hi siku dzra vugamu.

45   Kutsraliwi lesvi amabukwini ya vaprofeta: ‘Hinkwavu vatadondzrisiwa ha Xikwembu Nkulukumba.’ Mani na mani lwayingeliki Tatana atlhela adondzra, abuya ku mine.

46   Aku na mhunu lwasamiki avona Tatana, handle ka lweyi apfaka ku Xikwembu Nkulukumba; lweyo hi yene avoniki Tatana.

47   Ndzrihlayela mfuzri ndzrili ku n’wine: Lweyi apfumelaka a ni vutomi lebzingahelikiki.

48   “Hi mine svakuda sva vutomi.

49   Vatatana venu vadi mana amananga kambe vagami hi kufa.

50   Lesvi hi svone svakuda lesvixikaka hi le tilweni, akuva loko mhunu asvida, angafi.

51   Hi mine svakuda lesvihanyaka lesvixikiki hi le tilweni. Loko mhunu ada svakuda lesvi, atahanya hi la kungahelikiki. Nangweso, svakuda lesvi ndzritakasvinyikela akuva ndzrihuluxa vutomi bza misava i nyama yanga.”

52   Kutani vayuda vasungula kudokadokisana, vaku: “Xana mhunu lweyi angahinyikisa kuyini nyama yakwe hida?”

53   Kutani Yesu aku ku vone: “Ndzrihlayela mfuzri ndzrili ku n’wine: Loko n’wingadi nyama ya N’wana wa Mhunu n’wiva n’winwa ni ngati yakwe, an’wi na vutomi andzreni kwenu.

54   Lweyi adaka nyama yanga ava anwa ni ngati yanga a ni vutomi lebzingahelikiki, kutani mine ndzritamupfuxa hi siku dzra vugamu;

55   hikuva nyama yanga i svakuda sva xihlayelamfuzri ni ngati yanga i svakunwa sva xihlayelamfuzri.

56   Lweyi adaka nyama yanga ava anwa ngati yanga, atsrhama kun’we na mine, ndzriva na mine ndzritsrhama kun’we na yene.

57   Svanga hesvi Tatana lwahanyaka andzrizrumiki, ni lesvi na mine ndzrihanyaka hi kola ka Tatana, ni yelweyi adaka mine atahanya hi kola ka mine.

58   Lesvi hi svone svakuda lesvixikiki hi le tilweni. Asvifani ni lesvi vatatana venu vadiki vagama vafa. Lweyi adaka svakuda lesvi ahanya hi la kungahelikiki.”

59   Lesvi asvihlayi na adondzrisa ku dzrin’we dzra masinagoga ya le Kapernawume.

60   Kutani loko vanyingi va vadondzrisiwa vakwe vayingela lesvo, vaku: “Zritu ledzri dzritsremana nhlana; i mani angadzriyingisetaka?”

61   Kambe Yesu, hi kutiva lesvaku vadondzrisiwa vakwe van’unun’uta hi lesvo, aku ku vone: “Xana lesvi svamikhunguvanyisa?

62   N’witayenca yini, ke kutani, loko n’wivona N’wana wa Mhunu na atlhantukela lomu afaka ali kone akusunguleni?

63   Lexi xinyikaka vutomi i moya; nyama ayipfuni nchumu. Mazritu lawa ndzrin’wibzeliki wone i moya ni vutomi.

64   Kambe laha ku ni van’we ku n’wine lavangapfumelikiki.” Hikuva Yesu afa avativa kusukela akusunguleni lavangapfumelikiki ni lweyi afaka atamuxavisa.

65   Kutani aya mahlweni, aku: “Hi svosvo ndzrin’wibzeliki ndzriku aku na mhunu lwangataka kwanga handle ka loko anyikiwi ha Tatana.”

66   Hi mhaka leyo, vanyingi va vadondzrisiwa vakwe vatlhelela ntsrhaku, vangahafambi na yene.

67   Kutani Yesu aku ku lava khume na vabizri: “Na n’wine an’wisvijuli kufamba?”

68   Simoni Petrosi amuhlamula, aku: “Hosi, hitaya ku mani? Hi wene unga ni mazritu ya vutomi lebzingahelikiki,

69   nakone hipfumelile hiva hisvitwisisa lesvaku wene u Muxwengi wa Xikwembu Nkulukumba.”

70   Yesu avahlamula, aku: “Andzrin’wihlawulanga na n’wili khume na vabizri kee? Kasi mun’we wa n’wine i mulumbeti.”

71   Ankameni lowo afa akanela hi Yuda wa ka Simoni Iskariyota, hikuva hi yene lweyi afaka ajula kumudlayisa, nambilesvi afaka ali mun’we wa lava khume na vabizri.