-
Yohani 5
1 Antsrhaku ka lesvi, kuvi ni nkhuvu wa vayuda, kutani Yesu atlhantukela Yerusalema.
2 Kutani Yerusalema afa ku ni xihlambelo kusuhi ni Nyangwa ya Tihamba, lexi afaka xivitaniwa Bethzatha (Yindlu ya Vumbilu) hi xiheberu, lexi afaka xi ni ntlhanu wa tingumba.
3 Andzreni ka tone afa kuyetleli vhanu vanyingi va kuvabza, va kuka vangavoni, va kukhuta ni va kuwoma svizro.
4 --
5 Kutani ambangwini wolowo afa ku ni mun’we wanuna lwangaheta makume mazrazru ya malembe na ntlhanu na mazrazru na avabza.
6 Loko Yesu amuvona na ayetleli kone atlhela ativa lesvaku avabzi nkama wa kuleha, aku ku yene: “Wasvijula kuhanyisiwa?”
7 Lweyi wa kuvabza amuhlamula, aku: “Hosi, andzri na mhunu wa kundzripeta xihlambelweni loko mati mapfindlukile, kambe loko ndzriku ndzrafamba, mun’wana andzrichangwela apela.”
8 Yesu aku ku yene: “Sekeleka utlakula likuku dzraku, ufamba.”
9 Kutani lweyo wanuna atekela kuhanya, atlakula likuku dzrakwe asungula kufamba. Siku dzra kone afa dzrili Savata.
10 Kutani vayuda vasungula kukanela ni lweyo wanuna angahanyisiwa, vaku: “Namunhla i Savata; nawu awukupfumeleli kutlakula likuku ledzro.”
11 Kambe avahlamula, aku: “Lweyi andzrihanyisiki hi yene atiki ku mine: ‘Tlakula likuku dzraku ufamba.’”
12 Vamuvutisa, vaku: “I mani mhunu wa kone lwangakubzela, aku: ‘Dzritlakule ufamba’?”
13 Kambe mhunu lwangahanyisiwa afa angamutivi lesvaku hi mani, hikuva Yesu afa asukile ayanhingena amakazri ka xitsrhungu lexi afaka xili kone.
14 Antsrhaku ka lesvi, Yesu atlhangana naye atempeleni, aku ku yene: “Lavisa, svosvi uhanyisiwile. Ungahatlhele udoha, akuva ungahumeleliwi hi sva kubiha kutlulisa.”
15 Lweyo wanuna asuka ayabzela vayuda lesvaku i Yesu lweyi angamuhanyisa.
16 Hi mhaka leyo, vayuda valandzrelela Yesu, hilesvi afaka ayenca minchumu leyo hi Savata.
17 Kambe avahlamula, aku: “Tatana wanga kutatlhasa svosvi otizra; na mine, ke, ndzrotizra.”
18 Kutani, hi mhaka leyo, vayuda vasungula kumujuletela hi xiviti akuva vamudlaya, hilesvi afaka atlula Savata atlhela aku Xikwembu Nkulukumba i Tatana wakwe, atiyenca lwafanaka na Xikwembu Nkulukumba.
19 Kutani Yesu avahlamula, aku: “Ndzrihlayela mfuzri ndzrili ku n’wine: N’wana angeyenci nchumu ni wa wun’we hi kutisungulela kwakwe, kambe ntsena lesvi avonaka Tatana na asviyenca. Hikuva hinkwasvu lesvi Yene asviyencaka, na ye N’wana asviyencisa xisvosvo.
20 Hikuva Tatana azrandzra N’wanakwe nakone amukomba hinkwasvu lesvi asviyencaka, mfuzri atamukomba mintizro lemikulu kutlula leyi, akuva n’witahlamala.
21 Hikuva svanga hesvi Tatana apfuxaka vafi, avahanyisa, na ye N’wana ahanyisa mani na mani lweyi yene asvijulaka.
22 Hikuva Tatana angayavanyisi mhunu ni wa wun’we, kambe ntizro hinkwawu wa kuyavanyisa awutamelisi N’wanakwe,
23 akuva hinkwavu vabekela N’wana xichavu svanga hesvi vabekelaka Tatana xichavu. Lweyi angabekelikiki N’wana xichavu angamubekeli xichavu Tatana lwamuzrumiki.
24 Ndzrihlayela mfuzri ndzrili ku n’wine: Lweyi ayingelaka zritu dzranga ava apfumela ku lweyi andzrizrumiki a ni vutomi lebzingahelikiki, nakone angayi akuyavanyisiweni, kambe ahumi akufeni anhingena avuton’wini.
25 “Ndzrihlayela mfuzri ndzrili ku n’wine: Watlhasa nkama, nakone wutlhasile kutani, lowu vafi vatakayingela zritu dzra N’wana wa Xikwembu Nkulukumba, kutani lavadzriyingeliki vatahanya.
26 Hikuva svanga hesvi Tatana anga ni vutomi andzreni kwakwe, na ye N’wana amunyikisi xisvosvo kuva ni vutomi andzreni kwakwe.
27 Nakone amunyiki ntamu wa kutsrhama ayavanyisa, hikusa i N’wana wa Mhunu.
28 N’wingahlamaleni hi lesvo, hikuva wata nkama lowu hinkwavu lavanga maxizreni vatakayingela zritu dzrakwe,
29 kutani vahuma; lavayenciki lesvinene vapfukela avuton’wini, kutani lavayenciki lesva kubiha vapfukela akuyavanyisiweni.
30 Andzrisvikoti kuyenca nchumu ni wa wun’we hi kutisungulela kwanga. Lesvi ndzrisviyingelisaka xisvone, hi svosvo ndzriyavanyisaka xisvone, nakone mayavanyisela yanga malulamile hikusa andzrijuli kuzrandzra kwanga kambe ndzrijula kuzrandzra ka Lweyi andzrizrumiki.
31 “Loko ndzritibekela vumboni ha bzanga, vumboni bzanga ahi bza xihlayelamfuzri.
32 Ku ni mumbeni lwandzribekelaka vumboni, nakone ndzrasvitiva lesvaku vumboni lebzi andzribekelaka bzone i bza xihlayelamfuzri.
33 N’wizrumi vhanu vayavutisa Yohani, kutani yene abekeli vumboni xihlayelamfuzri.
34 Mine, ke, andzrijuli kubekeliwa vumboni hi vhanu, kambe ndzrihlaya lesvi akuva n’wihuluxiwa.
35 Yohani afa ali motsre lowupfuzraka wuva wuvaninga, nakone n’wine n’wisvinavelile kutsrhava nkamanyana hi livaningo dzrakwe.
36 Kambe mine ndzri ni vumboni lebzitlulaka bza Yohani, hikuva mintizro leyi Tatana andzrizrumiki kumiyenca, anga mintizro leyi ndzrimiyencaka, mindzribekela vumboni bza lesvaku ndzrezrumiwa hi Tatana.
37 Nakone lweyi angandzrizruma, anga Tatana hi ntshima, andzribekelile vumboni. N’wine an’wingisama n’widzriyingela zritu dzrakwe nambi kuvona xivumbeko xakwe,
38 kutani zritu dzrakwe adzritsrhami andzreni kwenu, hikusa an’wipfumeli ku lweyi amuzrumiki.
39 “N’wine n’wikambisisa Matsralwa hi kuhiseka hikusa n’wipimisa lesvaku n’witakuma vutomi lebzingahelikiki hi kola ka wone; kasi hi wone mandzribekelaka vumboni.
40 Kambe an’wisvijuli kubuya kwanga akuva n’witakuma vutomi.
41 Andzripfumeli kudzrumisiwa hi vhanu,
42 kambe ndzrin’witsrumbulile lesvaku an’wi na lizrandzru dzra Xikwembu Nkulukumba andzreni kwenu.
43 Mine ndzribuyi hi vito dzra Tatana wanga, kambe n’wine an’windzriyamukeli. Loko afa kobuya mhunu mumbeni hi vito dzra ka kwakwe, anha n’witamuyamukela.
44 N’wingakholwisa kuyini, nakuve n’wijula kudzrumisana, n’witsrhika kudzrumisiwa lokupfaka ku Xikwembu Nkulukumba lwanga mun’we ntsena?
45 N’wingapimiseni lesvaku ndzritan’wizrambela ku Tatana. A kone lweyi an’wizrambelaka, anga Moxe, lweyi n’wine n’wimudumbaka.
46 Hikusa loko afa n’wokholwa ku Moxe, anha n’witakholwa ni le ku mine, hikuva atsrali minchumu lemikanelaka ha mine.
47 Kambe lesvi n’wingakholwikiki lesvi asvitsraliki, n’witamakholwisa kuyini mazritu yanga kee?”