BRX

1   Kutani loko Hosi yitivi lesvaku vafarisi afa vabzeliwi lesvaku Yesu afa ahamba atlhela ababatisa vadondzrisiwa va vanyingi kutlula Yohani,

2   nambilesvi lweyi afaka ababatisa afaka ange Yesu hi ntshima kambe vadondzrisiwa vakwe,

3   yisuka Yudeya yitlhela yiya Galileya.

4   Kambe afa svikombela akuva yihundzra hi le Samariya.

5   Kutani yitlhasa adoropeni dzra Samariya ledzrivitaniwaka Sikari, kusuhi ni nsimu leyi Yakobe ayinyikiki n’wanakwe Yosefa.

6   Kutani nhlovo ya Yakobe afa yili ambangwini wolowo. Lesvi Yesu atlhasiki atsrhama anhlobzeni, hikusa afa akazralile hi kufamba. Ankama lowo, afa sviya ku dina.

7   Kutlhasa mun’we wa mamana wa le Samariya atataka mati. Yesu aku ku yene: “Ndzrikombela mati.”

8   (Hikusa vadondzrisiwa vakwe afa vayi doropeni vayaxava svakuda.)

9   Kutani lwewa mamana wa musamariya aku ku yene: “Undzrikombelisa kuyini mati nakuve u muyuda, kasi mine ni wansati wa musamariya?” (Hikuva vayuda avawokelani ndzrilo ni vasamariya.)

10   Yesu amuhlamula, aku: “Loko afa wetiva nyiko ya Xikwembu Nkulukumba ni lesvaku i mani lweyi aliki ku wene: ‘Ndzrikombela mati’, inha umukombelile, ava akunyika mati lamahanyaka.”

11   Lwewa mamana aku ku yene: “Hosi, ni xikelelo xa kuka mati ha xone awu naxu, nakuve nhlovo leyi yiyetile. Kutani utamakuma kwini mati wolawo ya kuhanya?

12   Svili wene u nkulu kutlula tatana wezru Yakobe, lweyi ahinyikiki nhlovo leyi ni lweyi anwiki mati ya yone, yene ni vanakwe ni svifuyo svakwe?”

13   Yesu amuhlamula, aku: “Mani na mani lweyi anwaka mati lawa atatlhela atwa tozra.

14   Kambe lweyi anwaka mati lawa ndzritakamunyika wone angaka angahatlheli atwa tozra ni siku ni dzrin’we, kambe mati lawa ndzritakamunyika wone matandzruluka nhlovo ya mati andzreni kwakwe, leyipfelelaka yihamba vutomi lebzingahelikiki.”

15   Lwewa mamana aku ku yene: “Hosi, ndzrinyike mati lawo, akuva ndzringahatitwa tozra nambi kutlhela ndzribuya laha ndzritatakelela mati.”

16   Aku ku yene: “Famba uyavitana nuna waku abuya laha.”

17   Lwewa mamana ayangula, aku: “Andzri na nuna.” Yesu aku ku yene: “Uhlaya svone loko uku: ‘Andzri na nuna.’

18   Hikuva uvi ni ntlhanu wa vavanuna, kutani ni lweyi unga naye svosvi ahi nuna waku. Laho ukaneli xihlayelamfuzri.”

19   Lwewa mamana aku ku yene: “Hosi, ndzrasvivona lesvaku u muprofeta.

20   Vatatana vezru afa vagandzrela ku nhava leyi, kambe n’wine n’wili lomu kufanelaka kugandzreliwa kone hi le Yerusalema.”

21   Yesu aku ku yene: “Kholwa lesvi ndzrikubzelaka svone, wene wansati, hikusa wata nkama lowu n’wingatikigandzrela Tatana anhaveni leyi nambi Yerusalema.

22   N’wine n’wigandzrela lesvi n’wingasvitivikiki; hine higandzrela lesvi hisvitivaka, hikusa huluku dzrihuma ku vayuda.

23   Kambe nkama wata, nakone wutlhasile kutani, lowu vagandzreli va xihlayelamfuzri vatakagandzrela Tatana hi moya ni xihlayelamfuzri, hikuva na ye Tatana ajula volavo lesvaku vamugandzrela.

24   Xikwembu Nkulukumba i Moya, kutani lavamugandzrelaka kujuleka vamugandzrela hi moya ni xihlayelamfuzri.”

25   Lwewa mamana aku ku yene: “Ndzrasvitiva lesvaku Mesiya, lwavitaniwaka Kriste, awata. Loko yelweyo atlhasa, atahibzela hinkwasvu.”

26   Yesu aku ku yene: “Hi ye mine, ndzrikanelaka na wene.”

27   Hi nkama lowo, kutlhasa vadondzrisiwa vakwe; kutani vahlamala hilesvi afaka avulavula ni mhunu wa zrambu dzra xisati. Kambe angavanga kone lwatiki: “Ujula yini?” kumbe: “Ukanelela yini ni lwe wansati?”

28   Kutani lwewa mamana asuka, asiya hotsro yakwe ya mati ayanhingena adoropeni, abzela vhanu, aku:

29   “Buyani n’wivona mhunu lwandzribzeliki hinkwasvu lesvi ndzringasviyenca. Angava ali yene Kriste, kumbexana?”

30   Vahuma adoropeni vayela Yesu.

31   Na kahayenceka lesvo, vadondzrisiwa afa vamutsratsriya, vaku: “Rabbi, dana.”

32   Kambe aku ku vone: “Ndzri ni svakuda lesvi n’wine n’wingasvitivikiki.”

33   Kutani vadondzrisiwa vabzelana, vaku: “Svili kova ni lweyi amubuyiseliki svakuda?”

34   Yesu aku ku vone: “Svakuda svanga i kuyenca kuzrandzra ka lweyi andzrizrumiki ni kuheta ntizro wakwe.

35   Ahi n’wine n’wiliki kesala ntsena mune wa tihweti akuva kutlhasa nkama wa ntsrhovelo? N’wasviyingela? Ndzrili ku n’wine: Tlakuxani tinhloko n’wilangusa masimu, hikusa mawupfile, mayimela kutsrhoveliwa!

36   Mutsrhoveli kutani ayamukela muholo nakone ahlengeletela mihandzru mitanhingena avuton’wini lebzingahelikiki, akuva mubzali ni mutsrhoveli vatakota kutsrhava kun’we.

37   Hikuva amhakeni leyi xitiyisile xihlayahlaya lexiliki: ‘Kubzala mun’we, kutsrhovela mun’wana.’

38   Ndzrin’wizrumile akuva n’wiyatsrhovela lesvi n’wikaka n’wingasvitizrelanga. Kutizri van’wana, kambe n’wine n’witsrhoveli lesvi vone vasvitizriki.”

39   Kutani vanyingi va lavahumaka adoropeni dzra vasamariya vapfumela ku Yesu hi mhaka ya zritu dzra lwewa mamana lwangabeka vumboni, aku: “Andzribzeli hinkwasvu lesvi ndzringasviyenca.”

40   Kutani loko vasamariya vamutlhaselile, vamukombela kutsrhama navu; kutani atsrhama navu masiku mabizri.

41   Kutani vhanu va kutala kutlula kusunguleni vapfumela hi mhaka ya lesvi Yesu asvihlayiki,

42   kutani vaku ku lwewa mamana: “Ahahapfumeli hi mhaka ya lesvi usvihlayiki; hikuva hesviyingela hi tezru tindleve, kutani hasvitiva lesvaku lweyi kunene hi yene Muhuluxi wa misava.”

43   Kutani antsrhaku ka masiku mabizri, asuka aya Galileya.

44   Hikusa Yesu hi ntshima afa atiyisa lesvaku muprofeta angakombiwi xichavu atikweni dzrakwe.

45   Kutani loko atlhasi Galileya, vagalileya vamuhoyozela, hilesvi vavoniki hinkwasvu lesvi angasviyenca le Yerusalema hi nkama wa nkhuvu, hikuva na vone afa vayile ankhubzini.

46   Kutani atlhela anhingena le Kana wa Galileya, lomu angandzruluta kone mati mava vhinyo. Kutani afa ku ni mutizreli wa le vuhosini lweyi afaka avabzeliwa hi n’wana le Kapernawume.

47   Loko ayingeli lesvaku Yesu afa ahumi Yudeya ayanhingena Galileya, amuyelile ayamukombela kufamba naye ayadaha n’wanakwe, hikuva afa kusali kutsrongo akuva afa.

48   Kambe Yesu aku ku yene: “N’wine! An’wikholwi nchumu loko n’wingasivona mahlolana ni svihlamaliso.”

49   Lwewa mutizreli wa le vuhosini aku ku yene: “Hosi, buya na n’wananga angasifa.”

50   Yesu aku ku yene: “Muka; n’wanaku awahanya.” Lweyo wanuna akholwa zritu ledzri Yesu amubzeliki dzrone, atikhomela ndlela amuka.

51   Kutani, na ehe ndleleni, malandzra yakwe mamutlhangaveta maku n’wanakwe awahanya.

52   Kutani avavutisa nkama lowu angayampsa ha wone. Vamuhlamula, vaku: “Agami kuhiseta mizri tolo hi wora dzra kusungula dzra nhlikanhi.”

53   Kutani lweyo wa tatana asvivona lesvaku afa kuli nkama wolowu Yesu angaku ku yene: “N’wanaku awahanya.” Kutani apfumela, yene ni ndangu wakwe hinkwawu.

54   Kutani ledzri afa dzrili hlolana dzra vubizri ledzri Yesu adzriyenciki loko atlhasi Galileya na apfa hi le Yudeya.