-
Yohani 21
1 Antsrhaku ka lesvi, Yesu atlhela atikombekisa ku vadondzrisiwa le Lwandle dzra Tiberya. Atikombekisi hi ndlela leyi:
2 Afa vali kun’we Simoni Petrosi, Tomasi (lwavitaniwaka Didimosi, Hahla), Nataniyele wa le Kana wa Galileya, ni vana va Zebedewu, na vabizri van’wana va vadondzrisiwa vakwe.
3 Simoni Petrosi aku ku vone: “Ndzrahaya kuphaseni ka tinhlampfi.” Vaku ku yene: “Na hine hahafamba na wene.” Vasukiki vayanhingena bzatsrhwini, kambe vusiku lebzo hinkwabzu avaphasanga nchumu.
4 Kutani loko bzixa, Yesu ayima ankingeni, kambe vadondzrisiwa avasvivonanga lesvaku i Yesu.
5 Kutani Yesu aku ku vone: “Vananga, njhe, n’wi ni svakuda kolanu?” Vahlamula, vaku: “Ihina!”
6 Aku ku vone: “Cukumetelani nkukutu hi tlhelo dzra xinene dzra bzatsrhu, n’witaphasa.” Kutani vawucukumetela, kambe vahluleka kuwukoka wunhingena bzatsrhwini hi mhaka ya kutala ka tinhlampfi.
7 Kutani mudondzrisiwa lweyi Yesu afaka amuzrandzra aku ku Petrosi: “Hi Hosi!” Kutani Simoni Petrosi, loko ayingeli lesvaku hi Hosi, ayambala mujasi wakwe, (hikuva afa ahlivilile), aku andzreni ka lwandle tluu!
8 Kambe vadondzrisiwa lavan’wana vabuya hi bzatsrhu, na vakoka nkukutu wa kutala hi tinhlampfi, hikuva afa vange kule ni sava, kambe afa vali ka kujula kuteka ntlhanu wa madzana ya mametru ntsena.
9 Kutani loko vatlhasa asaveni, vakuma lesvaku ku ni ndzrilo wa makhala ni tinhlampfi leti afaka tiwoxiwa ku wone, ni makati.
10 Yesu aku ku vone: “Pambulani titsrongo ku tinhlampfi leti mahakakutiphasa n’witibuyisa halenu.”
11 Kutani Simoni Petrosi ayanhingena bzatsrhwini akoka nkukutu awutisa asaveni na wutali hi tinhlampfi ta tikulu, dzana ni ntlhanu wa makume na tizrazru wa tone. Kambe nambilesvi afaka titalisi xilesvo, nkukutu awuhandzrukanga.
12 Yesu aku ku vone: “Buyani n’witatakhomisa ndzreni.” Akuvanga ni mun’we wa vadondzrisiwa lwangava ni nhlana wa kumuvutisa, aku: “Hi we mani?” Hikusa afa vasvitiva lesvaku hi ye Hosi.
13 Yesu asekeleka ateka makati avanyika, ayenca svosvosvo ni hi tinhlampfi.
14 Ledzri kutani afa dzrili dzra vuzrazru na Yesu atikombekisa ku vadondzrisiwa antsrhaku ka loko apfuxiwi akufeni.
15 Loko vagami kufihlula, Yesu aku ku Simoni Petrosi: “Simoni, n’wana Yohani, xana wandzrizrandzra kutlula lesvi?” Ayangula, aku ku yene: “Ina, Hosi, wasvitiva lesvaku ndzrikuzrandzra ngopfu svinene.” Aku ku yene: “Disa svihambana svanga.”
16 Aphindha amuvutisa dzra vubizri, aku: “Simoni, n’wana Yohani, xana wandzrizrandzra?” Ayangula aku: “Ina, Hosi, wasvitiva lesvaku ndzrikuzrandzra ngopfu svinene.” Aku ku yene: “Bzisa svihambana svanga.”
17 Amuvutisa dzra vuzrazru, aku: “Simoni, n’wana Yohani, undzrizrandzra ngopfu svinene?” Petrosi atlhaveka mbilu hilesvi amuvutisiki dzra vuzrazru, aku: “Xana undzrizrandzra ngopfu svinene?” Kutani aku ku yene: “Hosi, wene utiva hinkwasvu; wasvitiva lesvaku ndzrikuzrandzra ngopfu svinene.” Yesu aku ku yene: “Disa svihambana svanga.
18 Ndzrihlayela mfuzri ndzrili ku wene: Na wehe ntsrongo, afa uhamba uyambala, utiyela kwini na n’wini lomu afaka ukujula. Kambe loko utaduhwala, utanalavuta mavoko kutani mhunu mun’wana atakuyambexa akuyisa lomu ungakujulikiki.”
19 Afa ahlaya lesvo kukomba mafela lawa afaka atadzrumisa Xikwembu Nkulukumba ha wone. Antsrhaku ka kuhlaya lesvo, aku ku yene: “Fambafamba na mine.”
20 Loko Petrosi andzruluka, avona mudondzrisiwa lweyi Yesu afaka amuzrandzra na abuya hi ntsrhaku, anga lweyi angakhigetela hi le kusuhi na Yesu axilalelweni aku ku yene: “Hosi, i mani lweyi akudlayisaka?”
21 Kutani loko amuvona, Petrosi aku ku Yesu: “Hosi, lweyi ke?”
22 Yesu aku ku yene: “Loko ndzrijula kuva atama ava kone ndzriko ndzribuya, unhingena kwini wene? Fambafamba na mine.”
23 Kutani kusungula kuhangalaka mhaka amakazri ka vamakwavu ya lesvaku mudondzrisiwa lweyo afa angatifa. Nambitanu, Yesu angamubzelanga svone lesvaku angatifa, kambe ati ku yene: “Loko ndzrijula lesvaku atama ava kone ndzriko ndzribuya, unhingena kwini wene?”
24 Lweyo hi ye mudondzrisiwa lweyi abekaka vumboni bza timhaka leti, ni lweyi atsraliki timhaka leti, nakone hasvitiva lesvaku vumboni bzakwe i bza xihlayelamfuzri.
25 Nakone kaha ni minchumu min’wana leya kutala leyi Yesu amiyenciki, leyi ndzriyanakanyaka lesvaku loko mingotsraliwa ha wun’wewun’we wa yone, misava hi ntshima afa mingativa na mbangu wa kubeka mabuku lawa afaka matatsraliwa.