-
Yohani 16
1 “Ndzrin’wibzeli timhaka leti akuva n’wingawisiwi hi nchumu.
2 Vatan’wihlongola asinagogeni. Kunene, wata nkama lowu mani na mani lwatakan’widlaya atakapimisa lesvaku ayenceli Xikwembu Nkulukumba ntizro wa kuxwenga.
3 Kambe lesvo vatasviyenca hilesvi vangamutivikiki Tatana kumbe mine.
4 Nambitanu, ndzrin’wibzeli timhaka leti akuva loko kutlhasa nkama wa kuva tiyenceka, n’witadzrimuka lesvaku ndzrin’wibzelile. Andzrin’wibzelanga lesvi akusunguleni, hikusa afa ndzri na n’wine.
5 “Kambe svosvi ndzriya ku Lweyi andzrizrumiki; ovaku anga kone ni mun’we ku n’wine andzrivutisaka, aku: ‘Uya kwini?’
6 Kambe lesvi ndzrin’wibzeliki timhaka leti, timbilu tenu titali hi kuxukuvala.
7 Nambitanu, Ndzrihlayela mfuzri ndzrili ku n’wine: Svipfuna n’wine loko ndzrifamba. Hikuva loko ndzringayi mbangu, mupfuni angatin’wibuyela; kambe loko ndzrifamba, ndzritan’wizrumelela yene.
8 Kutani loko atlhasa, atakombisa nandzru wa misava ahenhleni ka xidoho ni vululami ni vuyavanyisi.
9 Ndzrili ahenhleni ka xidoho, hikusa avapfumelanga ku mine.
10 Ndzrili ahenhleni ka vululami, hikusa ndzriya ku Tatana nakone n’wingahatindzrivona.
11 Ndzrili ahenhleni ka vuyavanyisi, hikusa mufumi wa misava leyi ayavanyisiwile.
12 “Ndzrehe ni svinyingi kun’wibzela, kambe n’wingekoti kusvibzatsrha svosvi.
13 Nambitanu, loko mupfuni atlhasa, kunga moya wa xihlayelamfuzri, atan’wifambisa axihlayelamfuzrini hinkwaxu, hikuva angativulavula sva kusukela ku yene, kambe atavulavula lesvi asviyingelaka, nakone atan’witivisa minchumu lemahataka.
14 Lweyo atandzridzrumisa, hikusa atayamukela lesvinga svanga an’witivisa svone.
15 Hinkwasvu lesvi Tatana anga nasvu i svanga. Hi svosvo ndzrihlayiki ha svone ndzriku mupfuni atayamukela lesvinga svanga an’witivisa svone.
16 Kunge khale n’wingahatindzrivona, kambe mfuzri kunge khale n’witandzrivona.”
17 Kutani van’we va vadondzrisiwa vakwe vabzelana, vaku: “Svijula kuhlaya yini lesvi ahibzelaka svone, aku: ‘Kunge khale n’wingahatindzrivona, kambe mfuzri kunge khale n’witandzrivona’, ni lesvaku: ‘Hikusa ndzriya ku Tatana’?”
18 Xilesvo, afa vabzelana, vaku: “Ajula kuhlaya yini loko aku: ‘Kunge khale’? Ahisvitivi lesvi akanelaka ha svone.”
19 Yesu afa asvitiva lesvaku afa vajula kumuvutisa, kutani aku ku vone: “N’wivutisana lesvo hi lesvi ndzritiki: ‘Kunge khale n’wingahatindzrivona, kambe mfuzri kunge khale n’witandzrivona’?
20 Ndzrihlayela mfuzri ndzrili ku n’wine: n’witadzrila n’wiba ni nkosi, kambe misava mitatsrhava; n’wine n’witaxukuvala, kambe kuxukuvala kwenu kutandzruluka kutsrhava.
21 Loko wansati aphuluka, atwa kuvavisa hilesvi nkama wakwe wutlhasiki, kambe loko antsrhunxekile, angahakudzrimuki kuvavisa koloko hilesvi atsrhaviki hi kubelekiwa ka mhunu amisaveni.
22 Kutani na n’wine, svosvi n’waxukuvala; kambe ndzritatlhela ndzrin’wivona kutani timbilu tenu titatsrhava, mfuzri anga kone lweyi atakan’wisusela kutsrhava kwenu.
23 Asikwini dzra kone n’wine n’wingatindzrivutisa nchumu ni wun’we. Ndzrihlayela mfuzri ndzrili ku n’wine: Loko n’wikombela nchumu wa kukazri ku Tatana, atan’winyika hi vito dzranga.
24 Kutatlhasa svosvi an’wingikombela nchumu hi vito dzranga. Kombelani kutani n’witanyikiwa, akuva kutsrhava kwenu kutatala.
25 “Ndzrin’wibzeli timhaka leti hi svifaniso. Wata nkama lowu ndzringahatikikanela na n’wine hi svifaniso, kambe ndzritakan’widzrungulela timhaka ta Tatana hi kukhanya.
26 Asikwini dzra kone, n’witakombela hi vito dzranga; kambe andzrihlayi svone lesvaku hi mine ndzritakan’wikombelela ku Tatana.
27 Hikusa Tatana hi ntshima awan’wizrandzra, hikusa n’wine n’windzrizrandzrile n’wiva n’wikholwa lesvaku ndzrizrumiwi ha Xikwembu Nkulukumba.
28 Ndzrizrumiwi ha Tatana, kutani ndzritile la misaveni. Svosvi ndzrisiya misava ndzriya ku Tatana.”
29 Vadondzrisiwa vakwe vaku ku yene: “Awuvoni ke! Svosvi uvulavula hi kukhanya; awutizrisi svifaniso.
30 Svosvi hasvitiva lesvaku utiva hinkwasvu nakone awuvileli kuvutisiwa nchumu hi mhunu. Hi kola ka lesvo, hakholwa lesvaku uhuma ku Xikwembu Nkulukumba.”
31 Yesu avahlamula, aku: “N’wakholwa kutani?!
32 Lavisani! Watlhasa nkama, nakone wutlhasile svosvi lowu mun’wana ni mun’wana wenu atakahangalaka atsrutsrumela akaya kwakwe, n’windzrisiya vusvanga. Kambe andzri svanga, hikusa Tatana a na mine.
33 Ndzrin’wibzeli timhaka leti lesvaku n’witava ni kuzrula ha mine. La misaveni n’witava ni nhlomulo, kambe tiyani nhlana! Misava ndzrimihlulile.”