BRX

1   “Hi mine mvhinya wa xihlayelamfuzri, kutani Tatana wanga hi yene mudzrimi wa wone.

2   Zravi dzrin’wana ni dzrin’wana ledzringa ku mine na dzringapsali mihandzru, awadzrisusa; kambe dzrin’wana ni dzrin’wana ledzripsalaka mihandzru, awadzrikhakhata akuva dzritakota kupsala mihandzru min’wana.

3   N’wine kutani n’wibasile hi mhaka ya zritu ledzri ndzrin’wibzeliki dzrone.

4   Tsrhamani kun’we na mine, na mine ndzritatsrhama kun’we na n’wine. Svanga hesvi zravi dzringakotikiki kupsala mihandzru vusvadzrone loko dzringatsrhami amvhinyeni, na n’wine n’wingekoti nchumu loko n’wingatsrhami na mine.

5   Hi mine mvhinya; n’wine n’wi mazravi ya kone. Lweyi atsrhamaka kun’we na mine, ndzriva na mine ndzritsrhama kun’we na yene, akota kupsala mihandzru ya kutala. Hikuva loko n’winge na mine, n’wingekoti kuyenca nchumu ni wa wun’we.

6   Loko mhunu angatsrhami kun’we na mine, acukumetiwa kufana ni zravi, awoma, kutani vahlengeleta mazravi lawo vamacukumeta andzrilweni, mapsha.

7   Loko n’witsrhama kun’we na mine na wo mazritu yanga matsrhama na n’wine, kombelani xin’wana ni xin’wana lexi n’wixinavelaka kutani n’witayenceliwa xone.

8   Tatana wanga adzrumisiwa hi lesvi: Hi loko n’wipsala mihandzru ya kutala ni loko n’wiva vadondzrisiwa vanga.

9   Svanga hesvi Tatana andzrizrandzriki, na mine ndzrin’wizrandzrile. Tsrhamani alizrandzrwini dzranga.

10   Loko n’wilandzra svileleto svanga, n’witatsrhama alizrandzrwini dzranga, svanga hesvi mine ndzrilandzriki svileleto sva Tatana ndzriva ndzritsrhama alizrandzrwini dzrakwe.

11   “Ndzrin’wibzeli timhaka leti akuva kutsrhava kwanga kuva na n’wine ni kuva kutsrhava kwenu kutala.

12   Xileleto xanga i kuva n’wine n’wizrandzranana svanga hesvi mine ndzrin’wizrandzriki.

13   Anga kone lwanga ni lizrandzru dzra kutlula ledzri, dzra kuva mhunu anyikela vutomi bzakwe akuva ahuluxa vanakulobze.

14   N’wine n’wi vanakulozri loko n’wiyenca lesvi ndzrin’wileletaka svone.

15   Andzrahan’wivitani malandzra yanga, hikusa nandzra angasvitivi lesvi n’winyi wakwe asviyencaka. Kambe ndzrin’wivitani vanakulozri, hikusa ndzrin’witivisile hinkwasvu lesvi ndzrisviyingeliki ku Tatana wanga.

16   Ahi n’wine n’wingandzrihlawula, kambe hi mine ndzringan’wihlawula, kutani ndzrin’wibeki akuva n’wifamba ni kuva n’wipsala mihandzru ni lesvaku mihandzru yenu mitsrhama na mili kone, akuva Tatana atan’winyika xin’wana ni xin’wana lexi n’wixikombelaka ku yene hi vito dzranga.

17   “Ndzrin’wileleta lesvi: Zrandzrananani.

18   Loko misava min’wivenga, n’wasvitiva lesvaku mizrangi mivenga mine na mingasin’wivenga.

19   Loko n’wine afa mova va misava, misava inhaka mizrandzri sva yone. Kutani lesvi n’wingeke va misava, kambe ndzrin’wihlawuliki akuva n’wihuma amisaveni, hi mhaka leyo, ke, misava man’wivenga.

20   Dzrimukani zritu ledzri ndzrin’wibzeliki dzrone, loko ndzriku: Nandzra ahi nkulu ku n’winyi wakwe. Loko vandzrixanisile, na n’wine vatan’wixanisa; loko valandzrile zritu dzranga, ni dzrenu vatadzrilandzra.

21   Kambe vatan’wiyencela hinkwasvu lesvo hi mhaka ya vito dzranga, hikusa avamutivi lweyi andzrizrumiki.

22   Loko afa ndzringabuyanga ndzrikanela navu, inha vangavanga na xidoho. Kambe svosvi ava na xa kutisusa nandzru ha xone hi xidoho xavu.

23   Lweyi andzrivengaka avenga ni Tatana wanga.

24   Loko afa ndzroka ndzringayencanga mintizro amakazri kwavu leyi kungeke na mun’wana angamiyenca, inha vange na xidoho; kambe svosvi vamivonile vatlhela vavenga mine na Tatana.

25   Kambe lesvo svihumeleli akuva kuhetiseka zritu ledzritsraliwiki abukwini dzra Nawu, ledzriliki: ‘Vandzrivengi mahala.’

26   Loko kutatlhasa mupfuni lweyi ndzritakan’wizrumela yene na apfa ku Tatana, kunga moya wa xihlayelamfuzri, lowubuyaka hi le ku Tatana, yelweyo atandzribekela vumboni;

27   kutani na n’wine n’witabeka vumboni, hikusa n’wivi na mine kusukela akusunguleni.