BRX

1   Kutiloko kahasali ntlhanu wa masiku na dzrin’we akuva kusungula Paxkwa, Yesu atlhasa Betanya, lomu afaka ku na Lazaro, lweyi angamupfuxa akufeni.

2   Kutani vahambela Yesu xilalelo kone; Marta afa ali kazri avayencela lesvi ni lesviyani, kambe Lazaro afa ali mun’we wa lava afaka vada naye.

3   Kutani Mariya ateka ngwama ya mafuzra ya kunun’hwela ni ya kudula svinene, ya kuhambiwa hi xiluva xa kunandzrika xa le Indya xa kuka xingapatsriwanga na nchumu, atota milenge ya Yesu, ava asula minkondzro yakwe hi misisi yakwe. Kutani yindlu hinkwayu yikumpfim hi moya wa mafuzra lawo ya kunun’hwela.

4   Kambe Yuda Iskariyota, mun’we wa vadondzrisiwa vakwe, lweyi afaka ajula kumuxavisa, aku:

5   “Hayini mafuzra lawa ya kunun’hwela mangaxavisiwanga hi madzana mazrazru ya madenari, mali ya kone yiphakeliwa svisiwana?”

6   Kambe afa angahlayi lesvo hi kuva afa ova ni mhaka ni svisiwana, kambe hilesvi afaka ali muyivi ni lesvi afaka atamela nkwama wa mali, nakone afa ahamba ayiva mali leyi afaka yipetiwa kone.

7   Kutani Yesu aku: “Mutsrhikani hi kuzrula, akuva alulamisela ntizro wa siku dzra kulahliwa kwanga.

8   Hikuva n’wine minkama hinkwayu n’wi ni svisiwana, kambe ahi minkama hinkwayu n’witakava na mine.”

9   Hi nkama wolowo, xitsrhungu lexikulu xa vayuda xiyingela lesvaku afa ali kone; kutani xiya, na kunge ntsena hi mhaka ya Yesu kambe ni hi kujula kuvona Lazaro, lweyi angamupfuxa akufeni.

10   Kambe vaprista lavakulu vahamba xikungu xa kudlaya na ye Lazaro,

11   hikusa hi mhaka yakwe, vanyingi va vayuda afa vasuka vavasiya, vayapfumela ku Yesu.

12   Mundzruku ka kone, xitsrhungu xa vhanu lava afaka vati ankhubzini xiyingela lesvaku Yesu afa abuya Yerusalema.

13   Kutani vhanu lavo vateka tinkambu ta minkindzru vahuma vamutlhangaveta, na vabandlukana, vaku: “Huluxa, hakukombela! Akukhensiwe lweyi ataka hi vito dzra Yehovha, Hosi ya Yisrayele!”

14   Kutiloko Yesu akumi ximbongolwana, atsrhama ahenhla ka xone, svanga hesvi kutsraliwiki lesvi:

15   “Ungachave, n’wana wa xisati wa Ziyoni. Lavisa! Hosi yaku yabuya, na yitsrhami ku ximbongolwana.”

16   Akusunguleni, vadondzrisiwa vakwe avasvitwisisanga lesvi, kambe loko Yesu aphatimisiwile, vadzrimuki lesvaku lesvi afa svitsraliwile mayelanu na yene ni lesvaku vamuyenceli minchumu leyo.

17   Kutani xitsrhungu lexi afaka xili naye loko avitana Lazaro lesvaku ahuma axizreni ava amupfuxa akufeni xivulavula lesvinene hi yene.

18   Hi svosvo na svone sviyenciki vanyingi vayamutlhangaveta, hikusa vayingeli lesvaku ayenci hlolana ledzri.

19   Kutani vafarisi vabzelana, vaku: “N’wasvivona lesvaku an’wiyi mbangu. Lavisani! Misava hinkwayu mamulandzra.”

20   Kutani afa ku ni vagrika vange vangani amakazri ka lava afaka vateli kutatagandzrela ankhubzini.

21   Kutani vatsrhindzrekelela Filipi, lweyi afaka ahuma Betsayda wa le Galileya, vamukombela, vaku: “Hosi, hijula kuvona Yesu.”

22   Filipi ayabzela Andreye. Andreye na Filipi vayabzela Yesu.

23   Kambe Yesu avahlamula, aku: “Nkama wutlhasile wa kuva N’wana wa Mhunu aphatimisiwa.

24   Ndzrihlayela mfuzri ndzrili ku n’wine: Loko mbewu ya tizriku yingaweli amisaveni yifa, yitsrhama na yili vusvayone; kambe loko yifa, yipsala mihandzru leminyingi.

25   Lweyi azrandzraka vutomi bzakwe atabzilahla, kambe lweyi avengaka vutomi amisaveni leyi atabzibekisa bzindzruluka vutomi lebzingahelikiki.

26   Loko mhunu ajula kundzritizrela, aandzrilandzre, nakone lomu ndzringa kone, nandzra wanga atava kone na yene. Loko mhunu ajula kundzritizrela, Tatana atamunyika lisima.

27   Svosvi hika dzranga dzrofoo! Kutani ndzritahlaya yini? Tatana, ndzrihuluxe ku nkama lowu. Nambitanu, ndzritlhasi ku nkama lowu hi mhaka ya svosvo.

28   Tatana, phatimisa vito dzraku.” Kutani kuhumelela zritu dzripfa tilweni, dzriku: “Ndzridzriphatimisile nakone ndzrahatatlhela ndzridzriphatimisa!”

29   Kutani xitsrhungu lexi afaka xiyimile xiva xisviyingela afa xiku: ‘Kudzrumi tilo’. Van’wana afa vaku: “I ntsrumi yikaneliki naye.”

30   Yesu ayangula, aku: “Zritu ledzri adzrihumelelanga hi mhaka yanga, kambe hi mhaka yenu.

31   Svosvi i nkama wa kuyavanyisiwa ka misava leyi; svosvi mufumi wa misava leyi atacukumetiwa handle.

32   Kambe mine, loko ndzritatlakuxiwa amisaveni, ndzritatikokela vhanu va matsrhamela hinkwawu.”

33   Kutani lesvi afa asvihlayela kukomba mafela lawa afaka atafa ha wone.

34   Kutani xitsrhungu ximuhlamula, xiku: “Hine hiyingeli abukwini dzra Nawu lesvaku Kriste atsrhama hi la kungahelikiki. Uhlayisa kuyini lesvaku N’wana wa Mhunu afanela kutlakuxiwa? I mani N’wana lweyi wa Mhunu?”

35   Kutani Yesu aku ku vone: “Livaningo dzrahatava konenyana na n’wine. Fambani na n’wehe ni livaningo dzra kone, akuva munyama wungan’wikumi; lweyi afambaka amunyameni angakutivi lomu ayaka kone.

36   Na n’wehe ni livaningo ledzri, pfumelani ku livaningo dzra kone, lesvaku n’witava vana va livaningo.” Ankama lowu Yesu ahlayiki lesvo, agami asuka ayatumbela kule navu.

37   Kambe, nambilesvi ahambiki mahlolana ya kutala svinene amahlweni kwavu, afa vangapfumeli ku yene,

38   akuva kuhetiseka zritu dzra muprofeta Ezaya, lweyi angaku: “Yehovha, i mani lwapfumeliki ku zritu dzrezru? Ni voko dzra Yehovha dzripfuleteliwi ku mani?”

39   Hi svosvo svingayenca vangasvikoti kupfumela hikusa Ezaya atlhela aku:

40   “Avadlayi mahlo atlhela anonon’hwisa timbilu tavu, lesvaku vangavoni hi mahlo yavu ni kuva vangatwisisi hi timbilu tavu, vava vandzruluka kutani mine ndzrivahanyisa.”

41   Ezaya ahlayi lesvo hikusa avoni kuphatima kwakwe, ava akanela ha yene.

42   Nambitanu, vanyingi va lava afaka vali vazrangeli vapfumelile ku yene, kambe afa vangasvihlayi alivaleni hi kuchava vafarisi, akuva vangahlongoliwi asinagogeni;

43   hikuva afa vazrandzra kudzrumisiwa hi vhanu kutlula kudzrumisiwa ha Xikwembu Nkulukumba.

44   Kutani Yesu ahuwelela, aku: “Lweyi apfumelaka ku mine angapfumeli ku mine ntsena kambe apfumela ni le ku Lweyi andzrizrumiki;

45   ni lweyi andzrivonaka avona ni Lweyi andzrizrumiki.

46   Ndzritile svanga livaningo amisaveni, akuva mani na mani lwapfumelaka ku mine angatsrhami amunyameni.

47   Kambe loko mhunu ayingela mazritu yanga agama angamalandzri, andzrimuyavanyisi; hikuva andzritelanga kuyavanyisa misava, kambe ndzriteli kutahuluxa misava.

48   Lweyi angeke na mhaka na mine atlhela angayamukeli mazritu yanga a ni lweyi amuyavanyisaka. Zritu ledzri ndzridzrikaneliki hi dzrone dzritakamuyavanyisa hi siku dzra vugamu.

49   Hikuva andzrikanelanga sva kusukela kwanga, kambe Tatana Lweyi andzrizrumiki hi yene andzrileletiki lesvi ndzrifaneliki kusvihlaya ni kusvikanela.

50   Nakone ndzrasvitiva lesvaku xileleto xakwe i vutomi lebzingahelikiki. Kutani lesvi ndzrisvikanelaka, ndzrisvikanela hi kulandzra lesvi Tatana a ndzribzeliki svone.”