-
Yohani 10
1 “Ndzrihlayela mfuzri ndzrili ku n’wine: Lweyi anganhingenikiki hi nyangwa axib’ayeni xa tihamba, kambe atlulaka hi kun’wanyana, i muyivi ni muphangi.
2 Kambe lweyi anhingenaka hi nyangwa i mubzisi wa tihamba.
3 Muzrindzri wa nyangwa awamupfulela, kutani tihamba tiyingiseta zritu dzrakwe. Avitana tihamba takwe hi vito ava atihumexa handle.
4 Loko ahumexi hinkwatu letinga takwe, afamba amahlweni ka tone, kutani tihamba timulandzra, hikusa tadzritiva zritu dzrakwe.
5 Kambe tingaka tingalandzri mhunu wa kuka tingamutivi kambe titamutsrutsruma, hikusa atidzritivi zritu dzra vhanu va kuka tingavatvi.”
6 Yesu avahambeli xifananiso, kambe avasvitwisisanga lesvi afaka akanela hi svone na vone.
7 Kutani Yesu atlhela aku ku yene: “Ndzrihlayela mfuzri ndzrili ku n’wine: Hi mine nyangwa ya tihamba.
8 Hinkwavu lavangabuya amahlweni kwanga i vayivi ni vaphangi; kambe tihamba ativayingisetanga.
9 Hi mine nyangwa; lweyi anhingenaka ha mine atahuluxiwa, nakone atanhingena atlhela ahuma ayakuma svakuda.
10 Muyivi angateli xin’wana loko kunge kuyiva, kudlaya ni kuhelisa ntsena. Mine ndzriteli kuva tikuma vutomi, ni lesvaku tikuma vutomi bza bzinyingi ngopfu svinene.
11 Hi mine mubzisi lwenene; mubzisi lwenene apfumela kufela tihamba.
12 Kambe mhunu wa kutizrela mali, lweyi angeke mubzisi ni lweyi tihamba tingeke takwe, loko avona hava na dzrita, otsrhika tihamba vusvatone atsrutsruma, kutani hava dzritikhoma, dzritihangalasela,
13 hikusa otizrela mali ntsena, xilesvo anga na mhaka ni tihamba.
14 Hi mine mubzisi lwenene. Ndzratitiva tihamba letinga tanga; na tone letinga tanga tandzritiva.
15 Svanga hesvi Tatana andzritivaka, na mine ndzramutiva Tatana; kutani ndzripfumela kufela tihamba.
16 “Nakone ndzri ni tihamba tin’wana, letingeke ta xib’aya lexi. Na tone ndzrifanela kutitisa; nakone titayingiseta zritu dzranga, kutani kuta va ni ntlhambi wun’we ni mubzisi mun’we.
17 Hi svosvo Tatana andzrizrandzraka ha svone, hikusa ndzrinyikela vutomi bzanga, akuva ndzritatlhela ndzribzikuma.
18 Aku na mhunu lweyi andzritekelaka bzone, kambe hi mine ndzrokobzinyikela hi kusvizrandzra. Ndzri ni ntamu wa kubzinyikela, nakone ndzri ni ntamu wa kutlhela ndzribzikuma. Xileleto lexi ndzrinyikiwi hi Tatana wanga.”
19 Kutlheli kuva ni kuyavana amakazri ka vayuda hi mhaka ya mazritu lawa.
20 Kutani vanyingi va vone afa vaku: “A ni demona nakone awahlanya. N’wimuyingisetela yini?”
21 Van’wana afa vaku: “Lawa ahi mazritu ya mhunu lwanga ni demona. Xana demona dzringasvikota kupfula mahlo ya lavangavonikiki?”
22 Ankameni lowo kuva ni Nkhuvu wa Kukhanguliwa ka Tempele le Yerusalema. Afa ali vuxika,
23 kutani Yesu afa afambafamba atempeleni, aligumbeni dzra Salomoni.
24 Kutani vayuda vayima vamutsrandzrela, vaku ku yene: “Utagama siku muni kuhitlhakameta timbilu? Loko uli ye Kriste, hibzele svitwala.”
25 Yesu avahlamula, aku: “Ndzrin’wibzelile, kambe n’wine an’wipfumeli. Mintizro leyi ndzrimiyencaka hi vito dzra Tatana wanga hi yone mindzribekelaka vumboni.
26 Kambe n’wine an’wikholwi, hikusa an’wi va tone tihamba tanga.
27 Tihamba tanga tiyingiseta zritu dzranga; na mine ndzratitiva, mfuzri tandzrilandzra.
28 Ndzritinyika vutomi lebzingahelikiki, xilesvo tingaka tingasuvi ni siku ni dzrin’we, nakone anga kone lweyi atakatiwutla avokweni dzranga.
29 Lesvi Tatana wanga angandzrinyika svone i svikulu kutlula hinkwasvu, kutani anga kone lweyi angatiwutlaka avokweni dzra Tatana.
30 Mine na Tatana hi xin’we.”
31 Vayuda vatlhela vazrola mazribze akuva vamukhandla ha wone.
32 Yesu avayangula, aku: “Ndzrin’wikombi mintizro minyingi leminene lemihumaka ku Tatana. Hi wini wa mintizro leyi lowu n’wijulaka kundzridlaya hi mazribze hi mhaka ya wone kee?”
33 Vayuda vamuhlamula, vaku: “Ahijuli kukukhandla hi mazribze hi mhaka ya ntizro lowunene, kambe hijula kukudlaya hilesvi usandzraka; hikuva wene utiyenca Xikwembu Nkulukumba, nakuve u mhunu.”
34 Yesu avahlamula, aku: “Xana abukwini dzrenu dzra Nawu akutsraliwanga lesvaku: ‘Ndzriti: “N’wine n’wi svikwembu”?’
35 Loko Xikwembu Nkulukumba ati lava zritu dzrakwe afaka dzrikongomi vone i “svikwembu” (nakuve ndzrimana leyo yingetimiwi),
36 xana n’wibzela mine lweyi Tatana andzrixwengisiki ava andzrizrumela amisaveni, n’wiku: ‘Wasandzra’, hilesvi ndzritiki: ‘Ndzri N’wana wa Xikwembu Nkulukumba?!’
37 Loko ndzringayenci mintizro ya Tatana wanga, n’wingandzrikholweni.
38 Kambe loko ndzrimiyenca, nambiloko n’wingandzrikholwi, kholwani mintizro, akuva n’witasvitiva n’witlhela n’wisvitwisisa lesvaku Tatana a kun’we na mine, mfuzri na mine ndzri kun’we na Tatana.”
39 Kutani vatlhela vajula kumukhoma, kambe aphonyoka amavokweni yavu.
40 Atlhela asuka aya halahaya ka Yordani, ambangwini lowu Yohani afaka ababatisa kone kusungula, atsrhama kone.
41 Kutani vanyingi afa vamuyela na vaku: “Svone, Yohani angahambanga hlolana ni dzra dzrin’we, kambe hinkwasvu lesvi Yohani asvihlayiki hi mhunu lweyi i xihlayelamfuzri.”
42 Kutani vanyingi vapfumela ku yene kone.