BRX

1   Tanani, svosvi, n’wine svipfundzri. Dzrilani n’wibongosa hi mhaka ya maxangu laman’wibuyelaka.

2   Timali tenu tibolile, nakone timpahla tenu tiphehliwile hi tinsumba.

3   Gole ni silivhela dzrenu svikuzrile, nakone kukuzra ka svone kutokombisa ntsena lesvaku n’wibihile kutlhela kuda nyama yenu kufana ni ndzrilo. N’wihlengeleteli minchumu amasikwini ya vugamu.

4   Phela, muholo wa vatizri lavatsrhoveliki masimu yenu lowu n’witsrhamiki nawu wabandlukana, nakone tinyandha ta vatsrhoveli titlhasi atindleveni ta Yehovha wa makhandzra.

5   N’wihanyi hi mafehlefehle ni kutinyonxisa amisaveni. N’winonisi timbilu tenu hi siku dzra kudlayiwa ka svihazri.

6   N’witsremeli xikhatiso mhunu wa kululama n’wiva n’wimudlaya; yene angan’wihambeli nkanu.

7   Xilesvo, lehisani mbilu, vamakwezru, kuyatlhasa asikwini dzra kuhumelela ka Hosi. Phela mudzrimi ayimela mihandzru ya lisima lemihumaka misaveni na alehisa mbilu kuko kutlhasa mpfula ya kusungula ni ya kugamisa.

8   Na n’wine, lehisani mbilu. Tiyisani timbilu tenu, hikusa wutsrhindzrekelile nkama wa kutlhasa ka Hosi.

9   Vamakwezru, n’wingan’unun’uteni n’wisolana, akuva n’wingayavanyisiwi. Phela, Muyavanyisi eyima la mahlweni ka tinyangwa!

10   Vamakwezru, xikombiso xa kulehisa mbilu loko n’wihumeleliwa hi sva kubiha, n’wingaxikuma ku vaprofeta lavavulavuliki hi vito dzra Yehovha.

11   Phela, hili mawaku lavatiyiseliki. N’wiyiyingelile mhaka ya kutiyisela ka Yobe nakone n’wibzivonile vugamu lebzi Yehovha amunyikiki bzone, lesvikombaka lesvaku Yehovha atele lilondzro ni timpsalu.

12   Kambe, ahenhla ka hinkwasvu, vamakwezru, n’wingafungeni nchumu; n’wingafungeni nambi hi tilo nambi hi misava nambi hi yini na yini. Kambe “Ina” wenu aave ina, ni “Ihina” aave ihina, akuva n’wingaweli akuyavanyisiweni.

13   Xana ku ni mhunu amakazri kwenu lwahumeleliwaka hi sva kubiha? Aakhongote. Ku ni lweyi atinyonxeliki? Aayimbelele tinsimu.

14   Ku ni mhunu wa kukazri lwavabzaka amakazri kwenu? Aavitane vakulu va bandla; kutani avamukombelele hi xikhongoto, vamutota hi mafuzra hi vito dzra Yehovha.

15   Kutani xikhongoto xa lipfumelo xitayenca muvabzi ahanya, nakone Yehovha atamupfuxa. Nangweso, loko ali lesvaku ayenci svidoho, atadzrivaleliwa.

16   Xilesvo, bzelananani svidoho svenu n’wiva n’wihambelana svikhongoto, akuva n’witahanyisiwa. Xikombelo xa mhunu wa kululama xitizra ngopfu svinene.

17   Eliya afa ali mhunu wa matitwela ya kufana ni yezru, kambe loko akhongotile hi xiviti akuva kungani mpfula, ayinanga atikweni kudzringana malembe mazrazru ni ntlhanu wa tihweti na yin’we.

18   Antsrhaku atlheli akhongota, kutani tilo dzrinisa mpfula, tiko dzriva dzripsala mihandzru.

19   Vamakwezru, loko mhunu wa kukazri amakazri kwenu ahambukisiwa axihlayelamfuzrini kutani mun’wanyana amutlhelisa,

20   svitivani lesvaku lweyi asusaka mudohi andleleni yakwe ya kulahleka amubuyisela ambangwini wa kone, atamuhuluxa akufeni nakone atafuneketa svidoho lesvinyingi.