BRX

1   Xana kulwisana ni timholova lesvinga makazri kwenu svivangiwa hi yini? Asvivangiwi hi kunavela kwenu ka nyama lokulwisanaka andzreni ka svizro svenu kee?

2   N’wanavela, kambe an’wi na nchumu. Hala n’wadlaya, hala n’wanavela; kambe an’wikoti kukuma nchumu. N’waholovisana n’witlhela n’wilwisana. An’wi na nchumu hikusa an’wikombeli.

3   Hi svone lesvaku n’wakombela, kambe an’winyikiwi hikusa lesvi n’wikombelaka svone ahi svinene; n’wikombelela kusvitizrisa akunyonxiseni ka kunavela kwenu ka nyama.

4   Vavasati va vumbuye! An’wisvitivi lesvaku kuva munghanu wa misava i kuva nala wa Xikwembu Nkulukumba? Xilesvo, mani na mani lwajulaka kuva munghanu wa misava atiyenca nala wa Xikwembu Nkulukumba.

5   Kumbe n’wipimisa lesvaku ndzrimana yohlaya mahala, loko yiku: “Moya lowutsrhamaka ndzreni kwezru wunavela hi mhaka ya matsrhoho”?

6   Nambitanu, vumbilu lebzi Xikwembu Nkulukumba anyikanaka bzone i bzikulu kutlulisa. Xilesvo ndzrimana yili: “Xikwembu Nkulukumba alwa ni lavatitlakuxaka, kambe lavatitsrongahataka avakomba vumbilu.”

7   Xilesvo, tibekani hansi ka Xikwembu Nkulukumba, n’witsezrama n’wilwa na Diyavulosi; kutani atan’witsrutsruma.

8   Tsrhindzrekelani ku Xikwembu Nkulukumba, kutani na yene atatsrhindzrekela ku n’wine. Hlambani mandla n’wibasa, n’wine vadohi; n’wibasisa timbilu tenu, n’wine lava kuganaganeka.

9   Chelekani vusiwana n’wiba nkosi, n’widzrila. Mahleko yenu amandzruluke nkosi, ni kunyonxa kwenu akundzruluke mbitsi.

10   Titsrongahatani amahlweni ka Yehovha, kutani yene atan’witlakuxa.

11   N’wingahlevananeni, vamakwezru. Mani na mani lwahlevaka makwavu, kumbe ayavanyisaka makwavu, ahleva Nawu nakone ayavanyisa Nawu. Kutani, loko uyavanyisa Nawu, awu mulandzri wa Nawu kambe muyavanyisi.

12   Kova ni Mubeki wa Nawu ni Muyavanyisi wun’we ntsena, lweyi akotaka kuhuluxa ni kusuvisa. Kambe wene, u mani akuva ungayavanyisa walekwenu?

13   Tanani, svosvi, n’wine n’wiliki: “Namunhla kumbe mundzruku hitaya adoropeni dzra kukazri hiyaheta lembe kone, na hifamba hixavisa, hikuma mali”,

14   nakuve an’wisvitivi lesvitakayenceka hi vutomi bzenu mundzruku. Hikusa n’wi hunguva leyihumelelaka hi nkamanyana yigama yinyamalala.

15   Amatsrhan’wini ya lesvo, afa n’wifanela kuhlaya lesvi: “Loko Yehovha asvijula, hitahanya hitlhela hiyenca lesvi kumbe lesviyani.”

16   Kambe svosvi n’watibuma n’witata ni milomu. Kutibuma koloko hinkwaku kubihile.

17   Xilesvo, loko mhunu wa kukazri ativa lesvaku vayencisa kuyini sva svinene, kambe angasviyenci, i xidoho ku yene.