BRX

1   Ndzrikanela xihlayelamfuzri amahlweni ka Kriste; andzrihembi, hikusa lipfalu dzranga dzrandzribekela vumboni hi moya wa kuxwenga,

2   lesvaku ndzrivaviseka ngopfu svinene nakone ndzritlhaveka na ndzringawisi ambilwini yanga.

3   Hikuva afa ndzritanavela lesvaku ndzringazruketeliwa ndzriva ndzrihambanisiwa na Kriste svanga mhunu lwazrukiwiki hi nkonta ya vamakwezru, manga maxaka yanga hi tlhelo dzra nyama,

4   vanga vayisrayele. Lava hi vone svivalumbaka kuyenciwa vana, ni kuphatima, ni svipfumelelanu, ni kunyikiwa ka Nawu, ni ntizro wa Xikwembu Nkulukumba, ni svidumbiso;

5   hi vone valumbiwaka hi vatatana, ni lava Kriste ahumaka ku vone hi tlhelo dzra nyama. Akudzrumisiwe Xikwembu Nkulukumba lwanga henhla ka hinkwavu, hi masiku ni masiku! Amen.

6   Nambitanu, asvihlayi svone lesvaku zritu dzra Xikwembu Nkulukumba dzreba hansi. Hikuva ahi hinkwavu lavahumka ku Yisrayele vanga “Yisrayele.”

7   Nakone ahi hinkwavu vanga vana va Abrahamu hilesvi vapsaliwiki hi yene ntsena; kambe, “lesvitakavitaniwa lixaka dzraku svitava hi kola ka Izaki.”

8   Lesviliki, ahi vone vana hi tlhelo dzra nyama vanga vana va Xikwembu Nkulukumba, kambe lavahlayiwaka lesvaku i “lixaka” i vana va xidumbiso.

9   Hikuva zritu dzra xidumbiso dzrili: “Hi nkama lowu ndzritata, kutani Sara atava ni n’wana wa jaha.”

10   Kambe kunge lesvo ntsena, kambe na yene Rebeka akumi nyimba ku mun’we wanuna, anga Izaki, tatana wezru;

11   hikuva na mahahla ya kone ni kubelekiwa mangasibelekiwa kumbe mangasiyenca nchumu lowunene kumbe wa kubiha, lesvaku nkongometo wa Xikwembu Nkulukumba mayelanu ni kuhlawula kwakwe wutakota kutiya, na svingasukeli ku mintizro, kambe na svisukela ku Lweyi avitanaka,

12   Rebeka abzeliwi lesvi: “Lwenkulu atatizrela lwentsrongo.”

13   Svanga hesvi kutsraliwiki lesvi: “Ndzrizrandzri Yakobe, kambe Isawu ndzrimuvengile.”

14   Kutani ke, hitaku yini? Svili ku ni vusomboloki ku Xikwembu Nkulukumba? Svingeyenceki lesvo!

15   Hikuva ahlaya lesvi hi kutizrisa Moxe: “Ndzritava ni timpsalu ku lweyi ndzritakava ni timpsalu ku yene, ndzriva ndzritsretsrelela lweyi ndzritakamutsretsrelela.”

16   Kutani ke, asviyi hi kunavela kumbe kutsrutsruma ka mhunu, kambe sviya hi Xikwembu Nkulukumba, lwanga ni timpsalu.

17   Hikuva ndzrimana yihlaya lesvi ha Faru: “Hi mhaka leyi, ndzrikupfuxile: akuva ndzrikombisa ntamu wanga ha wene ni kuva vito dzranga dzritahlayiwa amisaveni hinkwayu.”

18   Kutani ke, akombisa timpsalu takwe ku mani na mani lweyi asvizrandzraka, kambe lweyi asvizrandzraka, amutsrhika ava ni nkanu.

19   Xilesvo, n’witaku ku mine: “Ahasolela yini ke? Hikuva i mani lweyi asiveliki kuzrandzra kwakwe?”

20   Kambe we mhunu, wova mani wene, uphikisanaka na Xikwembu Nkulukumba? Xana nchumu lowuvumbiwiki wungabzela lweyi awuvumbiki, wuku: “Undzrihambeli yini hi ndlela leyi?”

21   Kumbe muvumbi oka anga na ntamu ahenhla ka vumba wa kuhamba hi buvu dzrin’we xibza xin’we akuva xitizrela ntizro wa kukhenseka, ni xin’wana akuva xitizra ntizro lowungakhensekikiki?

22   Kutani, kungahlayiwa yini loko Xikwembu Nkulukumba atiyiselile na ahanyika nkama svibza sva mahlundzru lesvifaneliwaka hi kuhelisiwa, nhambilesvi afaka ajula kukombisa mahlundzru yakwe ni kuyenca lesvaku ntamu wakwe wutiveka kee?

23   Nakone kungahlayiwa yini loko kuzrandzra kwakwe afa kuli kuyenca lesvaku kutiveka kutala ka lidzrumu dzrakwe ahenhla ka svibza sva timpsalu, lesvi azrangiki asvihlawula khale akuva svikuma lidzrumu,

24   hinga hine, lava ahivitaniki, kunge ntsena amakazri ka vayuda kambe ni le amakazri ka va matiko?

25   Svi svanga hilesvi na ye Hoseya ahlayaka ha kone, aku: “Lava vangeke vhanu vanga ndzritavachula ‘vhanu vanga’, nakone wansati lweyi angazrandzriwangakiki ndzritamuvitana ‘lwazrandzriwaka’;

26   nakone amatsrhan’wini ya lomu afaka kuhlayiwa lesvi ku vone: ‘An’wi vhanu vanga’, kone vatavitaniwa ‘vana va Xikwembu Nkulukumba lwahanyaka.’”

27   Na yene Ezaya ahuwelela lesvi ha Yisrayele: “Nambilesvi nhlayu ya vana va Yisrayele yitakava svanga hi sava dzra le lwandle, kutahuluka ntsena nsalu.

28   Hikuva Yehovha atayavanyisa misava, asvihetisa hi kuhangwesa.”

29   Nangweso, svanga hesvi sviprofetiwiki ha kone hi Ezaya: “Loko Yehovha wa makhandzra afa angahisiyelanga mbewu, inhaka hindzruluki lavafanaka na Sodoma; inhaka hifani na Gomora.”

30   Kutani ke, xana hitaku yini? Lesvaku nambilesvi vhanu va matiko afaka vangajuleteli vululami, vakumi vululami, kunga vululami lebzi kutani bzipfelaka ku lipfumelo;

31   kambe Yisrayele, nambilesvi ahlongoliseliki nawu wa vululami, angakotanga awutlhaselile nawu lowo.

32   Hayini? Hikusa akuvanga hi lipfumelo, kambe hi mintizro. Vawisiwi hi “zribze dzra kuwisana”;

33   svanga hesvi kutsraliwiki lesvi: “Lavisani! Ndzribeka Ziyoni zribze dzra kuwisana, anga zribze dzra xikhunguvanyiso; kambe lweyi apfumelaka ku yene angaka angakhomisiwi tingana ni siku ni dzrin’we.”