BRX

1   Xilesvo, svosvi aku na xikhatiso ku lavanga kun’we na Kriste Yesu.

2   Hikuva nawu wa moya wa vutomi lowunga ku Kriste Yesu wun’wintsrhunxile anawini wa xidoho ni wa lifu.

3   Hikuva lesvi Nawu afaka wunge na ntamu wa kusviyenca hilesvi afaka wuhetiwa ntamu hi nyama, Xikwembu Nkulukumba asviyencile hi kuzrumela N’wanakwe hi xifaniso xa nyama leyidohaka, na atela kususa xidoho, ava ayavanyisa xidoho anyameni,

4   akuva vululami bza Nawu bzihetiseka ku hine lavangafambikiki hi kulandzra nyama, kambe hifambaka hi kulandzra moya.

5   Hikuva lavahanyaka hi kulandzra hi nyama vapimisa sva nyama, kambe lavahanyaka hi kulandzra moya, vapimisa sva moya.

6   Hikuva kupimisa sva nyama i lifu, kambe kupimisa sva moya i vutomi ni kuzrula;

7   hikusa kupimisa sva nyama i vulala ni Xikwembu Nkulukumba, hikuva akutibeki hansi ka nawu wa Xikwembu Nkulukumba, hikusa kungesvikoti ni kusvikota.

8   Xilesvo, lavatitwananisaka ni nyama vangemunyonxisi Xikwembu Nkulukumba.

9   Nambitanu, n’wine an’witwanani ni nyama, kambe ni moya, loko kunene moya wa Xikwembu Nkulukumba wutsrhama andzreni kwenu. Kambe loko mhunu ange na wone moya wa Kriste, ahi wa Kriste.

10   Kambe loko Kriste ali na n’wine, mizri mifile hi tlhelo dzra xidoho, kambe moya i vutomi hi mhaka ya vululami.

11   Kutani, loko moya wa lweyi apfuxiki Yesu akufeni wutsrhama andzreni kwenu, lweyi apfuxiki Kriste Yesu akufeni atatlhela ahanyisa ni mizri yenu lemifaka hi kola ka moya lowutsrhamaka andzreni kwenu.

12   Kutani ke, vamakwezru, ahi na xikweneti ku nyama xa kuva xihisindzrisa kuhanya hi kuya hi nyama;

13   hikuva loko n’wihanya hi kulandzra nyama, kunene n’witafa; kambe loko n’widlaya mintizro ya mizri hi moya, n’witahanya.

14   Hikuva hinkwavu lavafambisiwaka hi moya wa Xikwembu Nkulukumba, lava i vana va Xikwembu Nkulukumba.

15   Hikuva n’wine an’wiyamukelanga moya wa vukazrawa akuva n’witlhela n’wihanya hi nchavu, kambe n’wiyamukeli moya wa kuyenciwa vana, lowu ha wone hibandlukanaka, hiku: “Abba, we Tatana wanga!”

16   Moya hi ntshima wubeka vumboni kun’we ni moya wezru lesvaku hi vana va Xikwembu Nkulukumba.

17   Kutani ke, loko hili vana, na hine hi vadi va pfindla; kunene hi vadi va pfindla va Xikwembu Nkulukumba, nakone hi vadi va pfindla kun’we na Kriste, loko kunene hixaniseka kun’we naye lesvaku na hine hikota kuphatimisiwa kun’we.

18   Hikuva ndzrivona lesvaku tinxanisa ta nkama lowu atitlhasi ni kutsrongo ku vuphatimi lebzitakakombekisiwa ku hine.

19   Hikuva svivumbiwa, hi manyawu lamakulu, sviyimela kukombekisiwa ka vana va Xikwembu Nkulukumba.

20   Hikuva svivumbiwa svibekiwi ahansi ka sva kuka ndlela, kunge hi kuzrandzra ka svone, kambe hi kola ka lweyi asvibekiki hansi, na ku ni dumbo,

21   dzra lesvaku svivumbiwa hi ntshima na svone svitantsrhunxiwa vukazraweni bza kubola, sviva ni ntsrhunxeko wa kuphatima ka vana va Xikwembu Nkulukumba.

22   Hikuva hasvitiva lesvaku svivumbiwa hinkwasvu svikonya kun’we svitlhela svitwa kuvavisa kun’we kutatlhasa svosvi.

23   Na kunge lesvo ntsena, kambe nambi hi hine hi ntshima, hinga ni mihandzru ya kusungula ya moya, hakonya, na hiyimela kuyenciwa vana hi kuhiseka, kunga kuva mizri yezru mintsrhunxiwa.

24   Hikuva hihuluxiwile akulaviseleni loku; kambe kulavisela lokuvoniwaka ahi kulavisela, hikuva loko mhunu avona nchumu, i yini lexi ahaxilaviselaka kee?

25   Kambe loko hilavisela lesvi hingasvivonikiki, hisvilavisela hi kuhiseka na hilehisa mbilu.

26   Hi ndlela leyifanaka, na wo moya wubuya wuhipfuna akutsraneni kwezru; hikuva ahisvitivi lesvi hikombelaka svone hi ndlela leyi hifanelaka kukhongota ha yone, kambe moya hi ntshima wahikombelela hi kukonya lokungatwalikiki hi mazritu.

27   Kambe lweyi akambaka timbilu awasvitiva lesvi moya wusvipimisaka, hikusa wukombelela vhanu va Xikwembu Nkulukumba lava kuxwenga xilesvi Xikwembu Nkulukumba asvijulisaka xisvone.

28   Kutani hasvitiva lesvaku ku lavazrandzraka Xikwembu Nkulukumba, Xikwembu Nkulukumba ayenca hinkwasvu svitizrisana akuva kuhuma lesvinene, kupfuna lavavitaniwaka hi kuya hi nkongometo wakwe;

29   ku lava angazranga avativa na kehe khale atlhela avahlawula akuva vatafana ni tsrhamela dzra N’wanakwe, lesvaku atava mativula amakazri ka vamakwavu lava kutala.

30   Kutani lava angazranga avahlawula, atlheli avavitana; nakone lava angavavitana atlheli avahlaya lavalulamiki; kutani lava avahlayiki lavalulamiki atlheli avaphatimisa.

31   Kutani ke, hitaku yini hi minchumu leyi? Loko Xikwembu Nkulukumba ayima na hine, i mani lweyi atakalwa na hine?

32   Kunene, lesvi nambi N’wanakwe akalaka angamufelelanga, kambe amunyikeliki akuva ahifela hinkwezru, xana angaka angahinyiki hi mahala minchumu hinkwayu kun’we na yene?

33   Hi mani lwatakalumbeta vahlawuliwa va Xikwembu Nkulukumba? Xikwembu Nkulukumba hi yene avahlayaka lavalulamiki.

34   I mani lweyi atakavatsremela xikhatiso kee? Kriste Yesu hi yene afiki, kambe atlheliki apfuka, lweyi anga xineneni xa Xikwembu Nkulukumba ni lweyi ahikombelelaka.

35   I mani lweyi atakahihambanisa ni lizrandzru dzra Kriste? Angava nhlomulo, kumbe kukameka mbilu, kumbe nxanisa, kumbe ndlala, kumbe vusveti, kumbe khombo, kumbe lipanga?

36   Svanga hesvi kutsraliwiki lesvi: “Siku hinkwadzru hadlawa hi nkonta yaku; hivoniwa svanga tihamba ta kuya kudlayiweni.”

37   Nambitanu, ku hinkwasvu lesvi hahlula hi kuhlula lokukulu hi kola ka lweyi ahizrandzriki.

38   Hikuva ndzrakholwisisa lesvaku nambi lifu kumbe vutomi, kumbe tintsrumi, kumbe mimfumu, kumbe minchumu ya svosvi, kumbe minchumu lemahataka, kumbe ntamu,

39   kumbe lesvitlakukiki, kumbe lesviyetiki, kumbe xivumbiwa xin’wana, svingatisvikota kuhihambanisa ni lizrandzru dzra Xikwembu Nkulukumba ledzringa ku Kriste Yesu, Hosi yezru.