BRX

1   Kumbe n’woka n’wingasvitivi, vamakwezru, (hikuva ndzrikanela ni lavativaka nawu) lesvaku Nawu wufuma mhunu loko ahahanya?

2   Hikuva wansati lwachatiki abohiwi hi nawu ku nuna wakwe loko ahahanya; kambe loko nuna wakwe afa, wansati lweyo antsrhunxekile ku nawu wa nuna wakwe.

3   Kutani ke, na nuna ahahanya, wansati lweyo anha atavitaniwa muyenci wa vumbuye loko afa ova wa wanuna mun’wana. Kambe loko nuna wakwe afa, wansati lweyo antsrhunxekile anawini wa nuna wakwe; kutani ahi muyenci wa vumbuye loko ava wa wanuna mun’wana.

4   Xilesvo, vamakwezru, na n’wine n’widlayiwile hi tlhelo dzra Nawu hi kola ka mizri ya Kriste, lesvaku n’witava va mhunu mun’wana, anga lweyi apfuxiwiki akufeni, akuva hitahumexela Xikwembu Nkulukumba mihandzru.

5   Hikuva ankama lowu afaka hihanya hi kulandzra nyama, kunavela ka vudoho loku afaka kupfuxiwa hi Nawu afa kutizra amizrini yezru akuva hihumexela lifu mihandzru.

6   Kambe svosvi hintsrhunxiwile ku Nawu, hikusa hifile hi tlhelo dzra lesvi afaka hibohiwile ku svone, lesvaku hikota kuva svikazrawa hi vumpsha bza moya, kunge hi vukhale bza nawu lowutsraliwiki.

7   Kutani ke, hitaku yini? Xana Nawu i xidoho? Svingeyenceki lesvo! Ntsena anha ndzringaxitivanga xidoho loko afa kungavanga hi kola ka Nawu. Hikuva anha ndzringasvitivanga lesvaku kunavela sva vhanu i yini loko Nawu afa wungahlayanga wuku: “Ungachuke unavela sva vhanu.”

8   Kambe xidoho, lesvi xikumiki mukhandlu lowu xinyikiwiki wone hi xileleto, xipsali mixaka hinkwayu ya kunavela sva vhanu andzreni kwanga, hikuva handle ka nawu, xidoho afa xifile.

9   Kambe ndzrasami ndzrihanya na ndzringe na nawu. Kambe loko xileleto xitlhasile, xidoho xitlheli xipfuka mfuzri, kutani mine ndzrifa.

10   Kutani xileleto lexi afaka xiyisa avuton’wini, ku mine xiyisi akufeni.

11   Hikuva, lesvi xidoho xikumiki mukhandlu lowu xinyikiwiki wone hi xileleto, xindzriwongile, xindzridlaya hi xileleto.

12   Xilesvo, Nawu kunene wuxwengile, ni xileleto xixwengile, xilulamile nakone i xinene.

13   Kutani ke, xana lesvi svinga svinene ku mine svindzruluki lifu? Svingeyenceki lesvo! Kambe xidoho, akuva xitikomba lesvaku i xidoho, ku mine xipsala lifu hi lesvi svinga svinene, lesvaku, hi kola ka xileleto, xidoho xitava lexitlulisaka hi kudoha.

14   Hikuva hasvitiva lesvaku Nawu i wa moya, kambe mine ndzri wa nyama, lesvi ndzrixavisiwiki ahansi ka xidoho.

15   Hikuva lesvi ndzrisviyencaka andzrisvitwisisi. Hikuva andzriyenci lesvi ndzrinavelaka svone, kambe ndzriyenca lesvi ndzrisvivengaka.

16   Kambe, nhambi ndzriyenca lesvi ndzringasvijulikiki, ndzrapfumela lesvaku Nawu i wunene.

17   Kutani, ankameni lowo, angehe mine ndzrisviyencaka, kambe i xidoho lexitsrhamaka andzreni kwanga.

18   Hikuva ndzrasvitiva lesvaku andzreni kwanga, kunga anyameni yanga, akutsrhami nchumu wa wunene; hikuva kunavela ka kuyenca lesvinene ku kone kwanga kambe vusvikoti bza kuyenca abzi kone.

19   Hikuva lesvinene lesvi ndzrijulaka kusviyenca, andzrisviyenci, kambe lesva kubiha lesvi ndzringajulikiki kusviyenca, ndzrasviyenca.

20   Kutani ke, loko ndzriyenca lesvi ndzringasvijulikiki, angehe mine lwasviyencaka, kambe i xidoho lexitsrhamaka andzreni kwanga.

21   Xilesvo, ndzrikuma nsinya lowu wa nawu, lesvaku loko ndzrinavela kuyenca lesvinene, lesva kubiha svi kola kusuhi na mine.

22   Hikuva ndzrawuzrandzra nawu wa Xikwembu Nkulukumba hi kuya hi mhunu lweyi ndzringa yene hi le ndzreni,

23   kambe ndzrivona amizrini yanga nawu wun’wana lowulwaka ni nawu wa miyanakanyu yanga, wuva wundzriyenca xib’ochwa xa nawu wa xidoho lexinga mizrini yanga.

24   Ndzritsretsrisani, vakithi! Xana i mani lwatakandzrintsrhunxa amizrini lemifisaka xilesvi?

25   Svone ndzro khanimambu ku Xikwembu Nkulukumba hi kola ka Yesu Kriste Hosi yezru! Kutani ke, mine wa kone, hi miyanakanyu ndzri xikazrawa xa nawu wa Xikwembu Nkulukumba, kambe hi nyama yanga ndzri xikazrawa xa nawu wa xidoho.