BRX

1   Kutani ke, hitaku yini? Xana hitatama hidoha lesvaku vumbilu bziyengeteleka?

2   Svingeyenceki lesvo! Lesvi hifiki hi tlhelo dzra xidoho, hingasvikotisa kuyini kutama hihanya ku xone?

3   Kumbe n’woka n’wingasvitivi lesvaku hinkwavu lavababatisiwiki ku Kriste Yesu vababatisiwi andzreni ka lifu dzrakwe?

4   Kutani ke, hilahliwi na yene hi kubabatisiwa kwezru andzreni ka lifu dzrakwe, lesvaku svanga hesvi Kriste apfuxiwiki akufeni hi kola ka kuphatima ka Tatana, kutani na hine hitafamba hi vutomi lebzimpsha.

5   Hikuva loko hitlhanganisiwi na yene ku mafela lamafanaka ni yakwe, kunene na hine hitatlhanganisiwa na yene ni le ku mapfukela lamafanaka ni yakwe.

6   Hikuva hasvitiva lesvaku vumhunu bzezru lebza khale bzigongondzreliwi na yene amhandzreni akuva mizri yezru lemidohaka mitatsrhika kutizra, akuva hingahatami hiva svikazrawa sva xidoho.

7   Hikuva lweyi afiki antsrhunxiwile axidohweni xakwe.

8   Kutani, loko hifile kun’we na Kriste, hakholwa lesvaku hitatlhela hihanya na yene.

9   Hikuva hasvitiva lesvaku Kriste, lesvi apfuxiwiki akufeni, angahafi; lifu adzrahamufumi.

10   Lesvi afeliki svone, afi hi tlhelo dzra xidoho kan’we svihelela kolahu, kambe lesvi ahanyelaka svone, ahanya hi tlhelo dzra Xikwembu Nkulukumba.

11   Hi ndlela leyifanaka, na n’wine, tivonani na n’wifile hi tlhelo dzra xidoho kambe na n’wihanya hi tlhelo dzra Xikwembu Nkulukumba, ku Kriste Yesu.

12   Xilesvo, n’wingatsrhikeni xidoho xitama xifuma amizrini yenu lemifaka, akuva n’wiyingiseta kunavela ka xone.

13   Nakone n’winganyikeleni svizro svenu ku xidoho svanga svitizro sva kuyenca ha svone lesva kubiha, kambe tinyikelani ku Xikwembu Nkulukumba svanga lavapfuxiwiki akufeni n’wihanya, ni yo mizri yenu minyikelani ku Xikwembu Nkulukumba svanga svitizro sva kuyenca ha svone lesva kululama.

14   Hikuva xidoho axifanelanga kun’wifuma, hikusa an’wile hansi ka nawu kambe ahansi ka vumbilu.

15   Sviku yini kutani? Svili hitadoha hilesvi hingeke hansi ka nawu kambe hinga hansi ka vumbilu? Svingeyenceki lesvo!

16   Xana an’wisvitivi lesvaku loko n’witinyikela ku mhunu akuva n’wimuyingiseta svanga svikazrawa, n’wi svikazrawa sva lweyi n’wimuyingisetaka, angava sva xidoho akuva n’wikuma lifu, kumbe sva kuyingiseta, akuva n’wikuma vululami?

17   Kambe akukhensiwe Xikwembu Nkulukumba lesvi nambilesvi n’wisamiki n’wiva svikazrawa sva xidoho, n’wiyingisetiki hi mbilu hinkwayu muxaka wa dondzro leyi n’witlhasiseliwiki yone!

18   Kutani, lesvi n’wintsrhunxiwiki axidohweni, n’windzruluki svikazrawa sva vululami.

19   Ndzrivulavula na ndzritizrisa mavulavulela ya mhunu wa nyama hi mhaka ya kutsrana ka nyama yenu; hikuva svanga hesvi n’winyikeliki svizro svenu svanga svikazrawa sva mahanyela  ya xambza ni vubihi, hi svosvo, svosvi nyikelani svizro svenu svanga svikazrawa sva vululami, lesviyisaka akuxwengeni.

20   Hikuva ankama lowu afaka n’wili svikazrawa sva xidoho, afa n’wintsrhunxekile ku vululami.

21   Kutani ke, hi wini handzru lowu n’wiviki na wone ankameni lowo? I minchumu leyi namunhla n’widanaka ha yone. Hikuva vugamu bza minchumu leyo i lifu.

22   Nambitanu, lesvi svosvi n’wintsrhunxiwiki axidohweni ni lesvi n’windzrulukiki svikazrawa sva Xikwembu Nkulukumba, n’wipsala handzru wenu, lesviyisaka akuxwengeni; kutani vugamu bza kone i vutomi lebzingahelikiki.

23   Hikuva muholo wa xidoho i lifu, kambe nyiko ya Xikwembu Nkulukumba i vutomi lebzingahelikiki ha Kriste Yesu, Hosi yezru.