-
Varoma 4
1 Kutani ke, hingaku i yini lesvi Abrahamu, tatana wezru hi le nyameni, asvikumiki?
2 Hikuva, loko Abrahamu afa ahlayiwi lwalulamiki hi mhaka ya mintizro, anha atava ni xivangelo xa kutibuma, kambe kunge amahlweni ka Xikwembu Nkulukumba.
3 Hikuva, xana ndzrimana yili yini kee? “Abrahamu avi ni lipfumelo ku Yehovha, kutani svinkontiwa ku yene lesvaku i vululami.”
4 Kambe lweyi atizraka, muholo wakwe awunkontiwi svanga vumbilu kambe svanga xikweneti.
5 Kambe, lweyi angatizrikiki kambe apfumelaka ku Lweyi ahlayaka mhunu wa mubihi lesvaku i mululami, lipfumelo dzrakwe dzrinkontiwa svanga vululami.
6 Svanga hesvi Davhida na yene ahlayaka ha kone njombo ya mhunu lweyi Xikwembu Nkulukumba amunkontelaka vululami handle ka mintizro:
7 “Va ni njombo lava svihoxo svavu svidzrivaleliwiki ni lava svidoho svavu svifuneketiwiki!
8 A ni njombo mhunu lweyi xidoho xakwe Yehovha atakakala angaxihlayeli nchumu!”
9 Kutani ke, xana njombo yoleyo yobuyela lavasokiki ntsena kumbe ni volava vakuka vangasokanga? Hikuva hili: “Lipfumelo dzra Abrahamu dzrinkontiwi lesvaku ku yene i vululami.”
10 Kutani, kuhlayiwi vululami ahansi ka sviyimu svini? Loko asokile kumbe loko angasisoka kee? Akuvanga loko asokile kambe kuvi loko angasisoka.
11 Kutani ayamukeli xikombiso xa kusoka, kunga mfungu wa vululami hi lipfumelo ledzri aviki nadzru na angasisoka, akuva atava tatana wa hinkwavu lavanga ni lipfumelo na vangasokanga, akuva vatahlayeliwa vululami;
12 ni tatana wa vana lavasokiki, kunge lavasokiki ntsena kambe ni lava valandzraka xikombiso xa lipfumelo ledzri tatana Abrahamu aviki nadzru na angasisoka.
13 Hikuva xidumbiso lexiyenceliwiki Abrahamu kumbe lixaka dzrakwe, xa lesvaku atada pfindla dzra misava, axivanga hi kola ka nawu, kambe xivi hi kola ka vululami lebzipfelaka ku lipfumelo.
14 Hikuva loko vadi va pfindla kuli lavalandzraka nawu, lipfumelo adzrehe na ntizro ni xidumbiso xa kone axehe na ntizro.
15 Hikuva Nawu wutisa mahlundzru, kambe lomu kungeke na nawu, ni kutlula nawu asvi kone.
16 Hi svosvo xidumbiso xikotekaka ha svone hi lipfumelo, akuva svitayelana ni vumbilu, akuva xidumbiso lexi xitiyisiwa ku lixaka dzrakwe hinkwadzru, kunge ntsena ku lava valandzraka Nawu kambe ni volava valandzraka lipfumelo dzra Abrahamu, lweyi anga tatana wezru hinkwezru.
17 Svanga hesvi kutsraliwiki lesvi: “Ndzrikuyenci uva tatana wa matiko laya kutala.” Lesvi sviyenceki amahlweni ka Xikwembu Nkulukumba, lweyi Abrahamu apfumeliki ku yene, lwapfuxaka lavafiki ni lwavitanaka minchumu lemingeke kone ingi hi loko mili kone.
18 Na kungehe na dumbo, Abrahamu apfumelile hi kuva ni dumbo, lesvaku atava tatana wa matiko laya kutala hi kuya hi lesvi afaka svihlayiwile, lesvaku: “Lixaka dzraku dzritava xisvosvo.”
19 Kutani, nambilesvi akalaka angagodolanga alipfumelweni, asvivonile lesvaku mizri yakwe kutani afa mifile, lesvi afaka ali kusuhi ni kupfala dzana dzra malembe, ni lesvi mbeleko wa Sara afaka wufile.
20 Kambe hi kola ka xidumbiso xa Xikwembu Nkulukumba, angakotanga akokela ntsrhaku hi kupfumala lipfumelo; kambe avi ni ntamu alipfumelweni, anyika Xikwembu Nkulukumba lidzrumu,
21 ava akholwisisa hi kuhelela lesvaku lesvi Xikwembu Nkulukumba asvidumbisiki, afa atatlhela asviyenca.
22 Xilesvo, “kuhlayiwi lesvaku ku yene lesvo i vululami.”
23 Nambitanu, zritu ledzriliki “kuhlayiwi” adzritsraliwanga hi mhaka yakwe ntsena,
24 kambe ni hi mhaka yezru, lava hitakahlayeliwa vululami, lesvi hipfumelaka ku Lweyi apfuxiki Yesu, Hosi yezru, amakazri ka lavafiki,
25 lweyi anganyikeliwa akuva afela svihoxo svezru, ava apfuxiwa akuva hitahlayiwa lavalulamiki.