BRX

1   Xilesvo, wene mhunu, nambi ungava mani, awu naxu xa kutiyimelela ha xone loko uyavanyisa; hikuva ankama lowu uyavanyisaka mun’wana, watiyavanyisa na wene, hikusa ye wene uyavanyisaka uyenca minchumu yo ya min’we.

2   Kambe hine hasvitiva lesvaku mayavanyisela ya Xikwembu Nkulukumba matwanana ni xihlayelamfuzri, ahenhla ka lavayencaka minchumu leyo.

3   Kutani ke, wene mhunu ndzriwene, uyavanyisaka lavayencaka minchumu leyo nakuve na wene wamiyenca, xana upimisa lesvaku utahuluka kuyavanyisiwa hi Xikwembu Nkulukumba?

4   Kumbe udzrela kutala ka vunene bzakwe ni kutiyisela ni kulehisa kwakwe mbilu, hi kukala ungasvitivi lesvaku vunene bza Xikwembu Nkulukumba bzitizrela kukuyenca utisola?

5   Kambe hi kola ka nkanu yaku ni mbilu yaku leyingatisolikiki, utihlengeletelela mahlundzru hi siku dzra mahlundzru ni dzra kukombisiwa ka vuyavanyisi bza Xikwembu Nkulukumba lebzilulamiki,

6   lwatakanyika mun’wana ni mun’wana hi kuya hi mintizro yakwe:

7   anga vutomi lebzingahelikiki ku lavajuletelaka kuphatima, ni xinthunzi, ni kukala kufa hi kutiyisela antizrweni lowunene;

8   kasi lavapfuxaka kuyavana ni lavayalaka kuyingiseta xihlayelamfuzri, kambe vayingisetaka vubihi, vakuma mahlundzru ni vukazri;

9   kuxaniseka ni kukameka mbilu ahenhla ka mun’wana ni mun’wana lwayencaka lesva kubiha, ku muyuda kusungula, kuyela ni ku mugrika;

10   kambe kuphatima ni xinthunzi ni kuzrula ku mani na mani lwayencaka lesvinene, ku muyuda kusungula, kuyela ni ku mugrika.

11   Hikusa Xikwembu Nkulukumba anga na xihlawuhlawu.

12   Hikuva hinkwavu lavadohiki na vange na nawu vatatlhela vafa na vange na nawu; kambe hinkwavu lavadohiki ahansi ka nawu vatayavanyisiwa hi nawu.

13   Hikuva lavalulamiki amahlweni ka Xikwembu Nkulukumba ahi lavayingelaka nawu ntsena; kambe lavatakahlayiwa lesvaku valulamile hi lavayencaka lesvi nawu wusvihlayaka.

14   Hikuva loko vhanu va matiko, lavangeke na nawu, vayenca minchumu leyi nawu wumihlayaka hi ntumbuluku, vhanu lava, nambilesvi vangeke na nawu, vone i nawu ku vone hi ntshima.

15   Vakombisa lesvaku ntizro wa nawu wutsraliwi timbilwini tavu, nakone lipfalu dzravu dzravabekela vumboni, mfuzri miyanakanyu yavu mivabzela lesvaku vahoxile kumbe mivabzela lesvaku avahoxanga,

16   hi siku ledzri Xikwembu Nkulukumba atakayavanyisa minchumu lemifihlekiki ya vhanu hi kutizrisa Yesu Kriste, hi kuya hi madzrungula lamanene lawa ndzrimatwalisaka.

17   Kutani ke, loko uli muyuda hi vito uva udumba nawu, utlhela utibuma hi Xikwembu Nkulukumba,

18   utlhela utiva kuzrandzra kwakwe uva uyamukela minchumu leminga ya lisima ledzrikulu leyi udondzrisiwaka na misukela ku Nawu,

19   uva ukholwa lesvaku u mufambisi wa lavangavonikiki, ni livaningo dzra lavanga munyameni,

20   mulayi wa svimphunta, mudondzrisi wa vatsrongwana, utivisisaka Nawu hi vuyeti ni hi xihlayelamfuzri,

21   wene ke, lweyi udondzrisaka mun’wana, awutidondzrisi kee? Wene, lwazrezraka uku: “Ungayive”, xana wayiva?

22   Wene, uliki “Ungachuke uyenca vumbuye”, xana wayenca vumbuye? Wene, lweyi unyenyaka svikwembu sva svivatliwa, xana utlhanya matempele uyiva?

23   Wene lweyi utibumaka hi Nawu, xana uzrukisa Xikwembu Nkulukumba hi kutlula kwaku Nawu?

24   Hikuva “vito dzra Xikwembu Nkulukumba dzrazrukiwa amakazri ka matiko hi mhaka yenu”, svanga hesvi kutsraliwiki ha kone.

25   Kusoka, kunene, kapfuna ntsena loko uyenca lesvi nawu wusvihlayaka; kambe loko uli mutluli wa nawu, kusoka kwaku kundzruluki kuka kusoka.

26   Xilesvo, loko lwakaka angasokanga alandzra svileleto sva kululama sva Nawu, xana angatihlayiwa lesvaku asokile nambilesvi akaka angasokanga?

27   Kutani, hi kuhetisisa Nawu, lwewa kuka angasokanga hi ntumbuluku atakuyavanyisa, wene lweyi unga mutluli wa nawu nambilesvi unga ni nawu lowutsraliwiki ni lesvi usokiki.

28   Hikuva muyuda ahi lweyi anga muyuda hi le handle, ni kusoka ahi nchumu wa le handle ni wa le nyameni.

29   Kambe mhunu i muyuda hi le ndzreni, ni kusoka hi loka le mbilwini, hi moya, kunge hi nawu lowutsraliwiki. Kudzrumisiwa ka mhunu lweyi akupfeli vhanwini kambe kupfela ku Xikwembu Nkulukumba.