BRX

1   Kutani, hine hinga ni ntamu, hifanela kuzrwala magome ya lavangeke na ntamu, hingalweli kutinyonxisa.

2   Mun’wana ni mun’wana wezru aalwele kunyonxisa mhunukulobze akuva amuyencela lesvinene ni kumuyaka.

3   Hikuva nambi Kriste angatinyonxisanga, kambe svanga hesvi kutsraliwiki ha kone: “Svizruku lesvi vakuzrukaka hi svone sviweli mine.”

4   Hikuva hinkwasvu lesvitsraliwiki khale svitsraleliwi kudondzrisa hine, lesvaku, hi kutiyisela kwezru ni hi nchavelelo lowunga ndzreni ka Matsralwa, hitakota kuva ni dumbo.

5   Kutani afa ndzrinavela lesvaku Xikwembu Nkulukumba, lwanyikanaka kutiyisela ni nchavelelo, angan’wiyenca n’wikota kuva ni mapimisela ya kufana ni ya Kriste Yesu ku ndlela leyi n’wivonanaka ha yone,

6   lesvaku hi vumun’we, hi nomu wun’we, n’witakota kudzrumisa Xikwembu Nkulukumba ni Tatana wa Hosi Yesu Kriste.

7   Kutani hoyozelanani, svanga hesvi na ye Kriste an’wihoyozeliki, akuva kudzrumisiwa Xikwembu Nkulukumba.

8   Hikuva ndzran’wibzela lesvaku Kriste andzruluki mutizreli wa lavasokiki akuva aseketela xihlayelamfuzri xa Xikwembu Nkulukumba, akuva atatiyisa svidumbiso lesvi Xikwembu Nkulukumba asviyenceliki vatatana vavu,

9   ni lesvaku matiko matakota kudzrumisa Xikwembu Nkulukumba hi mhaka ya timpsalu takwe. Svanga hesvi kutsraliwiki lesvi: “Hi svosvo ndzritakakudzrumisa ha svone amakazri ka va matiko, ndzriyimbelelela vito dzraku svidzrumiso.”

10   Nakone ndzrimana yitlhela yiku: “Nyonxani, n’wine va matiko, ni tiko dzrakwe!”

11   Yitlhela yiku: “Dzrumisani Yehovha, n’wine va matiko hinkwawu; svitsrhungu hinkwasvu asvimudzrumise!”

12   Nakone Ezaya atlhela aku: “Kutava ni limitsru dzra Yese, lweyi apfukaka akuva afuma matiko; kutani matiko matalavisela yene.”

13   Kutani afa ndzrinavela lesvaku Xikwembu Nkulukumba, lwanyikanaka dumbo, angan’witata hi kutsrhava hinkwaku ni kuzrula akupfumeleni, akuva n’witakota kutala n’wikhapakhapa hi dumbo ni hi ntamu wa moya wa kuxwenga.

14   Kutani mine hi ntshima ndzri ni kudumba mayelanu na n’wine, vamakwezru, lesvaku na n’wine hi ntshima n’witali hi vunene, n’witali hi vutivi hinkwabzu, nakone n’wasvikota kutsratsriyana.

15   Nambitanu, andzriganaganekanga kun’witsralela. Xin’we xa svivangelo afa ali kuva ndzrin’widzrimuxa, hi nkonta ya vumbilu lebzi ndzrikombiwiki bzone ha Xikwembu Nkulukumba,

16   akuva ndzriva mutizreli wa le livaleni wa Kriste Yesu ku va matiko, svanga lwayencaka ntizro wa kuxwenga wa kuzrezra madzrungula lamanene ya Xikwembu Nkulukumba, lesvaku vhanu lava va matiko vatakota kuva gandzrelo ledzriyamukelekaka, ledzrixwengisiwiki hi moya wa kuxwenga.

17   Xilesvo, ndzri ni xivangelo xa kutidzrumisa ha Kriste Yesu aminchun’wini lemiyelanaka na Xikwembu Nkulukumba.

18   Hikuva ndzringesingiti ndzrikanela hi nchumu handle ka lesvi Kriste asviyenciki ha mine akuva vhanu va matiko vava lavayingisetaka, hi zritu dzranga ni ntizro wanga,

19   hi ntamu wa mahlolana ni svihlamaliso, hi ntamu wa moya wa Xikwembu Nkulukumba, lesvaku kusukela Yerusalema ndzriyatlhasa le Iliriku ndzrikota kuzrezra madzrungula lamanene ya Kriste hi kuhelela.

20   Kutani ke, laha ndzringa kone ndzrobila hi kujula kutwalisa madzrungula lamanene lomu vito dzra Kriste dzringasikitiviwa kone, akuva ndzringayaki ahenhla ka masungulu ya mumbeni;

21   kambe svanga hesvi kutsraliwiki ha kone: “Lavangativisiwangakiki timhaka takwe vatasvivona; ni lavangikisama vasviyingela, vatasvitwisisa.”

22   Xisvosvo, ni svolesvo hi svone ndzrisiveliwiki kunyingi hi mhaka ya svone kun’wibuyela.

23   Kambe, lesvi svosvi ndzringeheke na mbangu amigangeni leyi, kutani ndzri ni malembe manyingi na ndzrinavela kun’witlhasela.

24   Xilesvo, loko ndzriya le Xipanya, ndzrilavisela kuhundzra ndzrin’wivona ndzriva ndzriheleketiwa kutsrongo hi n’wine antsrhaku ka loko ndzritava na ndzrizrangi hi kudlaya kuxuva loku ndzrin’wixuvaka ha kone nkamanyana.

25   Kambe svosvi ndzriya Yerusalema ndzriyatizrela vhanu va Xikwembu Nkulukumba lava kuxwenga.

26   Hikuva lavanga Masedonya ni le Akaya vanyonxeli kuhlenga sva kukazri sva kupfuna svisiwana amakazri ka vhanu va Xikwembu Nkulukumba lava kuxwenga lavanga Yerusalema.

27   Hikusa, vasvinyonxelile, nakone vatitwi na va ni xikweneti ku kone; hikuva loko va matiko vayaveliwi minchumu yavu ya moya, na vone vafanela kuvatizrela hi minchumu yavu ya nyama.

28   Xilesvo, antsrhaku ka loko ndzritava na ndzrihetile lesvi ni kuvanyiketa xipfunu lexi ha hombe, ndzritahundzra ndzrin’wipfuxela na ndzriya Xipanya.

29   Nangweso, ndzrasvitiva lesvaku loko ndzrin’witlhasela, ndzritabuya na ndzrin’witameleli matovoko hinkwawu ya Kriste.

30   Xilesvo, vamakwezru, ndzran’witsratsriya hi Hosi yezru Yesu Kriste ni hi lizrandzru dzra moya, lesvaku n’wikhinyela kundzrikombelela ku Xikwembu Nkulukumba hi svikhongoto,

31   lesvaku ndzrintsrhunxiwa ku lava va kuka vangapfumeli le Yudeya ni lesvaku vutizreli bzanga bza kupfuna Yerusalema bziva lebziyamukelekaka ku vhanu va Xikwembu Nkulukumba lava kuxwenga,

32   lesvaku, hi kuzrandzra ka Xikwembu Nkulukumba, ndzritakota kun’witlhasela na n’winyonxile, ndzriva ndzripepisiwa kun’we na n’wine.

33   Ingiki Xikwembu Nkulukumba, lwanyikanaka kuzrula, angava na n’wine hinkwenu! Amen.