BRX

1   Vamakwezru, lesvi mbilu yanga yisvinavelaka ni lesvi ndzrivakombelelaka svone ku Xikwembu Nkulukumba i kuva kunene vahuluxiwa.

2   Hikuva ndzravabekela vumboni lesvaku vahisekela Xikwembu Nkulukumba, kambe ahi kuva votiva nchumu.

3   Hikuva, lesvi afaka vangabzitivi vululami bza Xikwembu Nkulukumba, ni lesvi vajuliki kutibekela bzavu hi ntshima, avatibekanga hansi ka vululami bza Xikwembu Nkulukumba.

4   Hikuva Kriste i vugamu bza Nawu, lesvaku mani na mani lwapfumelaka ava ni vululami.

5   Hikuva Moxe atsrala lesvi hi vululami bza kufambelana ni Nawu: “Mhunu lweyi ayencaka minchumu leyi atahanya ha yone.”

6   Kambe vululami lebzipfelaka alipfumelweni bzili: “Ungahlaye ambilwini yaku, uku: ‘I mani lwatakatlhantukela atilweni?’, hi lesvaku, akuva axixa Kriste,

7   kumbe: ‘I mani lwatakaxikela axikheleni xa xidziva?’, hi lesvaku, akuva ayatlhantukisa Kriste amakazri ka vafi.”

8   Kambe kutsraliwi yini? “Zritu dzrile kusuhi na wene, anon’wini waku ni le mbilwini yaku”; anga “zritu” dzra lipfumelo, ledzri hidzrizrezraka.

9   Hikuva loko uhlaya avhanwini hi nomu waku lesvaku Yesu i Hosi, utlhela upfumela ambilwini yaku lesvaku Xikwembu Nkulukumba amupfuxile akufeni, utahuluxiwa.

10   Hikuva mhunu apfumela hi mbilu akuva akuma vululami, kambe ahlaya hi nomu avhanwini akuva akuma kuhuluxiwa.

11   Hikuva ndzrimana yili: “Anga kone lweyi apfumelaka ku yene atakakhomisiwa tingana.”

12   Hikuva aku na kuhambana makazri ka muyuda ni mugrika. Ku ni Hosi yoleyi ya yin’we ahenhla ka hinkwavu, leyingatala hi vukosi kunyika hinkwavu lavayivitanaka.

13   Hikuva “mani na mani lwavitanaka vito dzra Yehovha atahuluxiwa.”

14   Nambitanu, vatamuvitanisa kuyini lweyi vangapfumelangakiki ku yene? Kutani, vatapfumelisa kuyini ku lweyi vangayingelangakiki nchumu ha yene? Kutani, vatayingelisa kuyini na kunge na lweyi azrezraka?

15   Kutani, vatazrezrisa kuyini loko vangazrumiwanga? Svanga hesvi kutsraliwiki lesvi: “Ahi kuxonga ka yone minkondzro ya lavatwalisaka madzrungula lamanene ya lesvinene!”

16   Nambitanu, ahi hinkwavu valandzriki lesvi madzrungula lamanene majulaka svone. Hikuva Ezaya ali: “Yehovha, i mani lwapfumeliki mhaka leyi hiyidzrunguliki?”

17   Kutani lipfumelo dzrilandzra lesvi dzrisviyingeliki. Kutani lesvi sviyingeliwaka sviyenceka na svipfela ku zritu dzra Kriste.

18   Kambe ndzravutisa: Svili avayingelanga nchumu? Phela, “zritu dzravu dzrihumi dzriya amisaveni hinkwayu, ni lesvi vasvihlayaka sviyitlhasa ni le mimbangwini ya le kule ya misava.”

19   Kambe ndzravutisa: Svili Yisrayele afa angativi nchumu? Kusungula, Moxe ali: “Ndzritakuvangela vukwele hi vhanu lavangeke tiko; ndzritakuhlundzrukisa hi tiko dzra kumphunta.”

20   Kambe Ezaya akuma nhlana wa kuhlaya lesvi: “Ndzrikumiwi hi lava afaka vangandzrijuleteli; ndzritivonekisi ku lava afaka vangafambi vavutisela hi mine.”

21   Kambe ahlaya lesvi hi Yisrayele: “Siku hinkwadzru ndzritikazrati hi kujula kupfuna vhanu lavangayingisetikiki ni va nkanu.”