BRX

1   Hikusa ndzrijula lesvaku n’witwisisa lesvi ndzrilwisaka xisvone hi ntamu lowukulu hi nkonta ni ya lavanga le Lawodikiya ni ya hinkwavu lavangasamikiki vandzrivona hi kukongoma hi vuso hi tlhelo dzra nyama,

2   akuva timbilu tavu tichaveleliwa, vatlhanganisiwa hi ntwananu alizrandzrwini, ni kuva vava ni vukosi hinkwabzu bza kudumba lokuheleliki ka kutwisisa kwavu, lesvaku vaxitwisisa ha hombe xihundla xa Xikwembu Nkulukumba, anga Kriste,

3   lweyi kungafihliwa ku yene vukosi hinkwabzu bza vutlhazri ni bza vutivi.

4   Lesvi ndzrisvihlayela akuva kungavi na mhunu ni mun’we lwan’wilahlekisaka hi kukota kukholwisana hi mazritu.

5   Nambiloko ndzringe kone hi mizri, ndzri na n’wine hi moya, ndzrinyonxaka hi kun’wivona na n’wifamba hi kulandzra nawu ni kutiya ka lipfumelo dzrenu ku Kriste.

6   Xilesvo, lesvi, ke, n’wingayamukela Hosi Kriste Yesu, fambani kun’we na yene,

7   n’widzimeka mitsru, n’wiyakiwa ahenhla kwakwe, n’wiva n’witiyisiwa alipfumelweni, svanga hesvi n’widondzrisiwiki xisvone, na n’wikhapakhapa hi mazritu ya kukhensa.

8   Tivonelani akuva kungavi na mhunu lwan’wiyencaka svib’ochwa hi lizrandzru dzra vutlhazri bza misava ni vukanganyisi bza phanga, lebzitiseketeliki amikhuveni ya vhanu, lemitiyaka hi masungulu ya misava, kunge hi Kriste.

9   Hikusa kuhelela hinkwaku ka xiyimu xa vukwembu kutsrhama ku yene hi nyama,

10   kutani n’wine n’wihelelile lesvi n’winga kun’we naye; yene lweyi anga nhloko ya mimfumu hinkwayu ni vuhosi hinkwabzu.

11   Nakone hi kuva kun’we naye, n’witlheli n’wisoka hi kusoka loka kuka kungayenciwi hi mavoko, lokuya ka kususa mizri ya nyama, kambe hi kusoka ka Kriste,

12   loko n’wilahliwi na yene axizreni hi kola ka babatiso, laha n’witlheliki n’wipfuxiwa kun’we na yene hilesvi n’wipfumeliki ntamu wa Xikwembu Nkulukumba, lweyi amupfuxiki akufeni.

13   Nangweso, ankama lowu afaka n’wifile asvihonweni svenu ni lowu afaka n’wingasokanga anyameni yenu, Xikwembu Nkulukumba an’wihanyisile kun’we na yene, ahidzrivalela svihono svezru hinkwasvu,

14   atlhela atima papela ledzri afaka dzrihilondzra, anga milawu, ledzri afaka dzrilwa na hine; adzrisusi andleleni hi kudzrigongondzrela amhandzreni.

15   Ahlivilisi tihosi ni vazrangeli, avadanisa avhanwini, avazruma vachololoka na vahlaleliwa svanga svib’ochwa lesvihluliwiki hi mhandzre ya Kriste.

16   Xilesvo, n’wingatsrhikeni mhunu ni mun’we an’wiyavanyisa hi mhaka ya lesvi n’widaka ni lesvi n’winwaka kumbe hi mayelanu ni kukulungela nkhuvu wa kukazri kumbe siku dzra kuhuma ka hweti, kumbe siku dzra Savata,

17   svinga xintsrhuti xa minchumu lemitaka, kambe ntshimantshima ya yone i Kriste.

18   Kungave na mhunu ni mun’we lwan’wisivelaka kukuma hakelo, lwanyonxaka hi kutiyenca ingiki awatitsrongahata ni kugandzrela tintsrumi, atsrhama hi kutsrhandzra minchumu leyi amivoniki, nakuve otikukumuxa mahala hi mhaka ya mapimisela yakwe ya nyama;

19   nakone angakhomeleli svitiya ku lweyi anga nhloko, lweyi mizri hinkwayu miphameliwaka na misukela ku yene mitlhela mitlhanganisiwa hi kutwanana hi kola ka matlhanganu ni minsiha, mikula hi kukula lokupfaka ku Xikwembu Nkulukumba.

20   Lesvi n’wifiki kun’we na Kriste mayelanu ni minchumu ya masungulu ya misava, n’wahahanyela yini ingiki n’wi va misava hi kutama n’witibeka hansi ka svileleto lesvi kee?

21   Svili: “Ungakhumbe hi voko; ungadzringe; ungatamele.”

22   Svileleto lesvo svihlaya minchumu leyi hinkwayu ka yone mihonekaka hi kutizrisiwa, hi kulandzra milawu ni tidondzro ta vhanu.

23   Svileleto lesvo nakunene svivoneka ingiki i sva vutlhazri, hikusa sviyenca mhunu alandzra vukhongoti lebzi angatinyika bzone, svitlhela svimuyenca avoneka ingiki awatitsrongahata, ava atixanisa mizri; kambe asvimupfunisi kulwa ni kunavela ka ku kunyonxisa nyama.