-
Vaheberu 7
1 Hikusa Melkizedeki lweyi, lweyi afaka ali hosi ya Salema, muprista wa Xikwembu Nkulukumba Lwanga Henhlahenhla, atlhangaveti Abrahamu loko abuya hi kudlayeni ka tihosi, amutovokisa,
2 kutani Abrahamu amupumbela vukhume bza hinkwasvu. Kusungula, vito dzrakwe dzrindzrulutiwa dzriya ku lidzrimi dzrin’wana dzriku “Hosi ya Vululami”, dzritlhela dzriku “Hosi ya Salema, hi lesvaku, “Hosi ya Kuzrula.”
3 Lesvi angeke na tatana, ni mamana, nambi vudzrunguli bza ndangu lowu asukelaka ku wone, ni lesvi mfuzri angeke na masungulu ya masiku nambi vugamu bza vutomi, kambe afanaka ni N’wana wa Xikwembu Nkulukumba, atsrhama na ali muprista nkama hinkwawu.
4 Vonani lesvaku wanuna lweyi afa ali nkulu svinene lakakuva Abrahamu, nhloko ya ndangu, amupumbela vukhume bza lesva lisima ku lesvi asviphangiki ayimpini.
5 Kunene, hi kuya hi Nawu, vana va Levhi lavayamukelaka vuprista bzavu vafanela ku va ni xileleto xa kuhlengisa vukhume ku vhanu, hi lesvaku, ku vamakwavu, nambilesvi volavo vanga vana ni vatukulu va Abrahamu.
6 Kambe wanuna lweyi, lweyi afaka ange na vuxaka navu, ateki sva vukhume ku Abrahamu ava atovokisa lweyi afaka anyikiwi svidumbiso.
7 Kutani anga kone angakanetaka lesvaku lwentsrongo atovokisiwa hi lwenkulu.
8 Nakone ku lesvi, i vhanu lavafaka lavayamukelaka sva vukhume, kambe ku svin’wana, i mhunu lweyi kunyikeliwaka vumboni bza lesvaku awahanya.
9 Nakone kungahlayiwa lesvaku nambi Levhi, lweyi ayamukelaka sva vukhume, ahakelile sva vukhume hi kola ka Abrahamu,
10 hikusa afa ehe ndzreni ka kokwana wakwe loko Melkizedeki amutlhangavetile.
11 Kutani ke, loko afa svikoteka kuva mhunu ava lwahetisekiki hi kutizrisa vuprista bza Levhi (svanga hesvi afaka xili xiyenge xa Nawu lowunyikiwiki vhanu), xana anha kahatava ni xivileleko xini xa kuva kuhumelela muprista mumbeni lweyi kuhlayiwaka lesvaku i wa xiyimu xa Melkizedeki kunge xiyimu xa Aroni?
12 Hikusa lesvi vuprista bzicinciwaka, kujuleka kucinca ni wo Nawu.
13 Hikusa wanuna lweyi ha yene kuhlayiwaka minchumu leyi ahumi ku lixaka dzrin’wana, ledzri ku dzrone kungeke na mhunu angasama atizrela alitarini.
14 Hikusa svile livaleni lesvaku Hosi yezru yihuma ku Yuda, kambe Moxe angahlayanga nchumu hi vaprista lavahumaka ku lixaka ledzro.
15 Nakone svitlhela svikhanyisisa loko kuhumelela mun’wana muprista lwafanaka na Melkizedeki,
16 lweyi aviki tanu, kunge hi leleto dzra nawu ledzritizraka hi kubelekiwa ka nyama, kambe hi ntamu wa vutomi lebzingeke na kusuvisiwa.
17 Hikusa abekeliwa vumboni lebzi: “U muprista hi la kungahelikiki hi xiyimu xa Melkizedeki.”
18 Kutani ke, xileleto xa kusungula xibekiwa hi tlhelo hikusa axi na ntamu nakone axitizri.
19 Hikusa Nawu awuyencanga nchumu ni wun’we wuhetiseka, kambe lexiyenciki lesvo i kunhingenisiwa ka dumbo ledzriyampsaka, ledzri hitsrhindzrekelaka ku Xikwembu Nkulukumba ha dzrone.
20 Nangweso, ngopfungopfu lesvo asvikotekanga na svingayencanga hi kufungiwa,
21 (hikusa, kunene, ku ni vhanu lavandzrulukaka vaprista na kungasamanga kufungiwa nchumu, kambe yene ava muprista na sveyenca hi kufungiwa, hi kola ka lweyi ahlayiki ha yene, aku: “Yehovha afungile, nakone angaka angatitwi nandzru, aku: ‘U muprista hi la kungahelikiki’”,
22 Xilesvo, Yesu avi xitiyiso xa xipfumelelanu lexa kuyampsa.
23 Handle ka lesvo, vanyingi vasindzriseki kuva vaprista hi kupfaleta vambeni hikusa lifu dzrivasiveli kutama vava vaprista,
24 kambe lesvi yene atamaka ahanya hi la kungahelikiki, vuprista bzakwe abzi na vapfaleti.
25 Kutani awasvikota ni kuhuluxa hi kuhelela lavatsrhindzrekelaka ku Xikwembu Nkulukumba ha yene, hikusa minkama hinkwayu awahanya akuva avakombelela.
26 Hikusa svafanela lesvaku hiva ni muprista lwenkulu wa kufana ni lweyi, lwaxwengiki, lwangeke na nandzru, lwewa kuka anganyamanga, lwahambaniki ni vadohi, ni lwatlakuxeliwiki ahenhla ka kutlula ni matilo,
27 lweyi, kuhambana ni vaprista lavakulu va khale, angavilelikiki kuva siku ni siku ahumexa svitlhavelo sva svidoho svakwe hi ntshima kusungula, kugama kuyela sva vhanu, hikusa lesvo asviyenci kan’we ntsena ankama lowu angatinyikela ha wone.
28 Hikusa Nawu wubeka vhanu va kukala kuhetiseka vava vaprista lavakulu, kambe zritu dzra kufunga, ledzrihlayiwaka antsrhaku ka Nawu, dzribeka N’wana, lweyi ayenciwiki lwewa kuhetiseka hi la kungahelikiki.