-
Vaheberu 6
1 Xilesvo, lesvi hihetiki minchumu ya masungulu ya dondzro ya Kriste, ahiyeneni mahlweni hilwela kuwupfa; hingahatlheleni hibeka masungulu: amhakeni ya kutisola amintizrweni lemifiki ni ya kupfumela ku Xikwembu Nkulukumba,
2 dondzro ya babatiso, kutlhanteka ka mavoko, kupfuxiwa ka vafi ni yavanyiso ledzringahelikiki.
3 Kutani lesvo hitasviyenca loko Xikwembu Nkulukumba ahipfumelela.
4 Hikusa asvikoteki ku lavasamiki vavaningeliwa, lavangadzringa nyiko ya le tilweni, lavanganyikiwa ni moya wa kuxwenga,
5 lavangatwa kunandzrika ka zritu dzra Xikwembu Nkulukumba ni kuhlamalisa ka misava lemitaka,
6 kambe vagamiki vaduka, lesvaku vangatlhela vapfuxetiwa vatisola, hikusa vatlhela vagongondzrela N’wana wa Xikwembu Nkulukumba amhandzreni, vamudanisa avhanwini.
7 Hikusa loko misava minwa mpfula leyitsrhamaka hi kuna ahenhla ka yone, migama mipsala svimila lesvipfunaka lavayidzrimaka, mikuma nkateko wa Xikwembu Nkulukumba.
8 Kambe loko mihumexa mitwa ni svitlhavana, madzreliwa nakone mi kusuhi ni kuzruketeliwa, mfuzri mitagama hi kuhisiwa.
9 Kambe ku n’wine, vazrandzriwa, hidumba lesvaku hitavona sva kuyampsa, lesviyelanaka ni huluku, nambilesvi hikanelaka hi ndlela leyi.
10 Hikusa Xikwembu Nkulukumba ahi lwemfani lakakuva angadzrivala ntizro wenu ni lizrandzru dzrenu ledzri n’widzrikombisiki vito dzrakwe hi kutizrela vhanu vakwe lava kuxwenga, ni lesvi n’wahayaka mahlweni n’wivatizrela.
11 Kambe hinavela lesvaku mun’wana ni mun’wana wenu ava ni nkhinkhi leyifanaka akuva atava ni kudumba lokuheleliki ka kukuma lesvi alaviselaka svone kuyatlhasa vugamu,
12 lesvaku n’wingachuki n’wiloloha, kambe n’wiyetisela lava hi lipfumelo ni kulehisa mbilu vavonaka kuhetiseka ka lesvi vadumbisiwiki svone.
13 Hikusa loko Xikwembu Nkulukumba ayenci xidumbiso xakwe ku Abrahamu, lesvi afaka ange na kufunga hi mun’wana lwanga nkulu kutlula yene, afungi ha yene hi ntshima,
14 aku: “Kunene ndzritakutovokisa ndzriva ndzrikuyandzrisa.”
15 Kutani loko Abrahamu alehisi mbilu, avoni kuhetiseka ka xidumbiso lexi.
16 Hikusa vhanu vafunga hi mhunu lweyi avatlulaka hi vukulu, nakone kufunga kwavu kuheta mapongwe, hikuva i xitiyiso xa le nawini ku vone.
17 Hi ndlela leyifanaka, loko Xikwembu Nkulukumba avoni sviyampsa kukombisa hi kukhanya vamadapfindla va xidumbiso lesvaku nkongometo wakwe awucinci, axitiyisi hi kufunga,
18 kuyencela lesvaku, hi kola ka minchumu mibizri lemingacincikiki, leyi ku yone svingakotekikiki kuva Xikwembu Nkulukumba ahemba, hine, lava hitsrutsrumiki hitatatumbela ku yene, hingakuma kuchaveleliwa lokukulu svinene akuva hikhomelela svitiya ku dumbo ledzri hibekeliwiki dzrone.
19 Dumbo ledzri dzrifana ni nsoma leyidumbekaka ni leyitiyiki, ya kuhuluxa vutomi bzezru, nakone dzrinhingena ni lomu kupfaliwiki hi xisizrelo,
20 lomu muzrangeli wezru, Yesu, anhingeniki kone kupfuna hine, yene lweyi svosvi anga muprista lwenkulu hi la kungahelikiki, hi xiyimu xa Melkizedeki.