BRX

1   Lipfumelo i kudumba minchumu lemilaviseliwaka hi kuhelela; hi lexitiyisaka lesvaku minchumu lemingavoniwikiki mi kone.

2   Hikusa ha dzrone, vhanu va khale vatiyenceli ndhuma leyinene.

3   Hi lipfumelo, hasvitwisisa lesvaku tilo ni misava svihambiwi hi kuleleta ka Xikwembu Nkulukumba, xilesvo minchumu lemivoniwaka mivi kone na svisukela ku minchumu lemingavoniwikiki.

4   Hi lipfumelo, Abele ahumexeli Xikwembu Nkulukumba xitlhavelo xa lisima dzrikulu kutlula xa Kayini, nakone hi lipfumelo ledzro akumi ndhuma leyinene ya lesvaku alulamile, hikusa Xikwembu Nkulukumba anyonxeli magandzrelo yakwe. Nakone nambilesvi afiki, ahavulavula hi lipfumelo dzrakwe.

5   Hi lipfumelo, Enoki azruzrisiwile akuva angavoni lifu, nakone afa angehe na kukumiwa hikusa Xikwembu Nkulukumba afa amuzruzrisile; hikusa na angasizruzrisiwa akumi ndhuma leyinene ya lesvaku anyonxisi Xikwembu Nkulukumba svinene.

6   Nangweso, handle ka lipfumelo asvikoteki kunyonxisa Xikwembu Nkulukumba, hikusa lweyi atsrhindzrekelaka ku yene afanela kupfumela lesvaku a kone ni lesvaku i muhakeli wa lavamujuletelaka hi mbilu hinkwayu.

7   Hi lipfumelo Nowa, antsrhaku ka kuyamukela xitiviso xa Xikwembu Nkulukumba mayelanu ni minchumu lemingasikivoniwa, achavi Xikwembu Nkulukumba ava ayaka ngalawa akuva kuhuluka ndangu wakwe. Nakone hi lipfumelo ledzri akombi lesvaku misava afa mifaneliwa hi kukhatisiwa, atlhela ava mudi wa pfindla wa vululami lebzipfelaka ku lipfumelo.

8   Hi lipfumelo, loko Abrahamu, avitaniwile, ayingisetile hi kuhuma aya ku mbangu lowu afaka atawukuma svanga pfindla. Ahumi afamba, nambilesvi afaka angakutivi lomu afaka aya kone.

9   Hi lipfumelo, ahanyi svanga muluveli atikweni dzra xidumbiso, ingiki ova ku tiko dzra vambeni, ahanya amatendeni na Izaki na Yakobe, lava afaka vali vadapfindla va xidumbiso xo xa xin’we kun’we na yene.

10   Hikusa afa ayimela doropa ledzringa ni masungulu lamatiyiki, ledzri mukhandhi ni muyaki wa dzrone anga Xikwembu Nkulukumba.

11   Hi lipfumelo, na yene Sara ayamukeli ntamu wa kubeleka, nambilesvi afaka ahundzri ntanga, hikuva afa avona lweyi ayenciki xidumbiso svanga mhunu lwadumbekaka.

12   Hi xivangelo lexi, kusukela ku mhunu mun’we lweyi kungahlayiwaka lesvaku afa afile, kubelekiwi vana, va kutala kufana ni tinyeleti ta tilo, ni va ntsrandzravahlayi kufana ni misava leminga lwandle.

13   Hinkwavu lava vafi na va ni lipfumelo, nambilesvi vakalaka vangakuvonanga kuhetiseka ka svidumbiso; kambe vakuvonile hi le kule nakone vanyonxi ngopfu ha svone, vava vabzela vhanu lesvaku i vayeni ni valuveli amisaveni.

14   Hikusa lavavulavulaka hi ndlela leyo vasvibeka alivaleni lesvaku vajuletela tiko dzravu hi ntshima.

15   Nangweso, loko kunene afa vedzrimukela mbangu lowu vahumiki ku wone, inha vakumi mukhandlu wa kutlhelela ku wone.

16   Kambe svosvi vajula mbangu wa kuyampsa, wunga lowa le tilweni. Xilesvo, Xikwembu Nkulukumba angadani hi kuvitaniwa Xikwembu Nkulukumba wavu, hikusa avalulamiseli doropa.

17   Hi lipfumelo, loko Abrahamu adzringiwile, anyikeli Izaki. Nambilesvi ayamukeliki svidumbiso, mhunu lweyi afa ajula kuhamba gandzrelo hi n’wanakwe wa mun’we,

18   nakuve afa abzeliwi lesvi: “Lesvitakavitaniwa lixaka dzraku svitava kone hi Izaki.”

19   Kambe afa ayanakanya lesvaku Xikwembu Nkulukumba afa atasvikota kumupfuxa nambi kufeni, nakone amuyamukelile hi ndlela ya kufanekisela.

20   Hi lipfumelo, na yene Izaki atovokisi Yakobe na Isawu mayelanu ni minchumu leyi afaka mahata.

21   Hi lipfumelo Yakobe, loko ali kusuhi ni kufa, atovokisi mun’wana ni mun’wana wa vana va Yosefa, ava akhinsamela Xikwembu Nkulukumba na atiyi hi nhloko ya nhonga yakwe.

22   Hi lipfumelo, loko Yosefa ali kusuhi ni kufa, akaneli hi kuhuma ka vana va Yisrayele, ava anyikela svileleto mayelanu ni mazrambu yakwe.

23   Hi lipfumelo, Moxe afihliwi hi vapsele vakwe hi tihweti tizrazru antsrhaku ka kubelekiwa kwakwe, hikusa vasvivonile lesvaku xin’wanana afa xixongile, nakone avachavanga xileleto xa hosi.

24   Hi lipfumelo, loko Moxe akulile, ayali kuvitaniwa n’wana wa MeFaru,

25   ahlawula kuxanisiwa ni vhanu va Xikwembu Nkulukumba amatsrhan’wini ya kutinyonxisa sva nkamanyana hi xidoho,

26   hikusa avoni lesvaku kuzruketeliwa hi mhaka ya Kriste afa svili vukosi bzikulu kutlula nhlengwe ya Gibita, hikusa mahlo yakwe afa malavisa hakelo ntsena.

27   Hi lipfumelo, ahumi Gibita, kambe kunge hi kuchava mahlundzru ya hosi, hikusa afa ayimi atiya svanga hi loko avona lweyi angavoniwikiki.

28   Hi lipfumelo, abekisi Paxkwa ni kuxuviwa hi ngati, lesvaku mudlayi angamayenci nchumu mativula yavu.

29   Hi lipfumelo, vatsremakanyi Lwandle dzra Libungu svanga hi loko kuli ntlhava, kambe loko vagibita vadzringisi kuyenca lesvo, vamitiwi hi mati.

30   Hi lipfumelo, maphangu ya Yeriko mawile antsrhaku ka loko vhanu vazrendzrelekele amatlhelweni ya wone ntlhanu wa masiku na mabizri.

31   Hi lipfumelo, Rahabe, lweyi afaka ali nghwavana, angalovanga ni lavatiyalisiki, hikusa ayamukeli tinhloli hi kuzrula.

32   Kutani ndzrahatahlaya lesvaku yini? Hikusa nkama afa wutandzrisiya loko ndzrahaya mahlweni ndzridzrungula ta Gidiyoni, Baraki, Samsoni, Yefta, Davhida, na Samuweli ni vaprofeta vambeni.

33   Hi lipfumelo, volavo vahluli mimfumu, vayenci ntizro wa vuyavanyisi, vakumi lesvi vadumbisiwiki svone, vasivi milomu ya tindzrawu,

34   vatimi ntamu wa ndzrilo, vahuluki kudlayiwa hi lipanga, vahumi ku xiyimu xa kutsrana vayenciwa lava ntamu, vavi tinhenha ta yimpi, vahlongolisi mabutsrhu ya valala.

35   Vavasati vayamukeli vafi vavu hi kupfuxiwa kufeni, kambe vhanu vambeni vaxanisiwile hikusa afa vangapfumeli kuntsrhunxiwa hi tizrulo dzra kukazri, akuva vatakuma kupfuxiwa lokuyampsaka.

36   Nakone vambeni vakumi ni ya kuhlekiwa ni kubeteteliwa hi minkhavi, vatlhela vatsrimbiwa ni kupfaleliwa mabohelweni.

37   Vakhandliwi hi mazribze; vayavanyisiwile; vasahiwi hi makazri; vadlayiwi hi lipanga; vafambi vayingayinga na vayambali svikhumba sva tihamba ni sva timbuti, na vali svisiwana sva vugamu, na vadisiwa mbhinyeto hala na vaxanisiwa;

38   mfuzri misava afa mingavafaneli; na vatsrhama hi kutsrendzreleka le huleni ni le tinhaveni, ni le timhakweni ta misava.

39   Nambitanu, lavo hinkwavu, nambilesvi vakumiki ndhuma leyinene hi kola ka lipfumelo dzravu, avakuvonanga kuhetiseka ka xidumbiso,

40   hikusa Xikwembu Nkulukumba ahibekiseli nchumu wa kuyampsa kutlula lesvo, akuva vangachuki vayenciwa lavahetisekiki na vange na hine.