-
Vaheberu 1
1 Khale svinene, Xikwembu Nkulukumba avulavuli ni vatatana vezru hi vaprofeta hi minkama ya kutala ni hi tindlela ta kutala.
2 Svosvi, amasikwini lawa ya vugamu, avulavuli na hine hi N’wanakwe, lweyi amubekiki lesvaku ava madapfindla wa minchumu hinkwayu, lweyi mfuzri ayenciki misava ha yene,
3 lweyi anga kuvaninga ka kuphatima ka Xikwembu Nkulukumba ni xifaniso xa ntshima xa tsrhamela dzrakwe, lweyi atamelaka minchumu hinkwayu hi zritu dzra ntamu wakwe, lweyi loko aheti kuhamba basisiwo dzra svidoho svezru, atsrhamiki axineneni xa Nkulukumba lwanga henhla.
4 Andzruluki lwatlulaka tintsrumi ngopfu svinene, hikusa anyikiwi vito ledzritlulaka ngopfu dzra tone.
5 Hikusa, hi yini ya tintsrumi leyi Xikwembu Nkulukumba angasama aku ku yone: “U n’wananga; kusukela namunhla mine ndzri tatana waku”, atlhela aku: “Ndzritava tatana, kutani yene atava n’wananga”?
6 Kambe loko atlhela abuyisa Mativula yakwe amisaveni, ali: “Tintsrumi hinkwatu ta Xikwembu Nkulukumba atimukhinsamele!”
7 Atlhela ahlaya lesvi mayelanu ni tintsrumi: “Ayenca tintsrumi takwe mimoya, ni malandzra yakwe malangavi ya ndzrilo.”
8 Kambe mayelanu ni N’wana, ali: “Xikwembu Nkulukumba i xiluvelo xaku hi masiku ni masiku, ni nhonga ya Mfumu waku i nhonga ya vululami.
9 Uzrandzri vululami, uvenga vubihi. Hi nkonta ya lesvo, Xikwembu Nkulukumba, Xikwembu Nkulukumba waku, akutotile hi mafuzra ya kunyonxa lokukulu, kutlula vanakuloni.”
10 Ava aku: “Akusunguleni, we Hosi, ubeki masungulu ya misava; ni matilo i mintizro ya mavoko yaku.
11 Wone matahoneka, kambe wene utatsrhama na uli kone; mataguga kufana ni xiyambalu,
12 nakone utamasonga kufana ni xigumatana, nakone svanga hi xiyambalu matandzruluka svin’wana. Kambe wene u yelweyi wa mun’we, nakone malembe yaku mangaka mangavi na vugamu.”
13 Kambe hi yini ya tintsrumi leti, leyi asamiki akanela ha yone, aku: “Tsrhamisa axineneni xanga ndzriko ndzribeka valala vaku svanga vunalavutelo bza minkondzro yaku”?
14 Xana hinkwatu ka tone ahi mimoya lemitizrelaka vhanu, lemingazrumiwa akuva mitizrela lavatakada pfindla dzra huluku?