-
Vagalatiya 5
1 Kriste ahintsrhunxile lesvaku hikuma ntsrhunxeko wolowo. Xilesvo, tiyani n’wikunde, nakone n’wingapfumeleni kutlhela n’witsrimbeleliwa kangi dzra vukazrawa.
2 Vonani! Mine, Pawlu, ndzron’wibzela lesvaku loko n’wopfumela kusoka, ku n’wine Kriste angahatipfuna nchumu.
3 Mfuzri ndzribeka vumboni ku mani na mani lwapfumelaka kusoka lesvaku asindzriseka kubekisa ni nawu hinkwawu.
4 N’wine n’widzringisaka kuhlayiwa lavalulamiki hi kulandzrelela nawu n’wihambanisiwi na Kriste; n’wilahlekeliwi hi vumbilu bzakwe.
5 Kambe hine, hi kola ka moya, hitsrhama na hiyimela vululami lebzidumbisiwiki, lebzikotekaka hi lipfumelo.
6 Hikusa ku Kriste Yesu, kusoka kumbe kuka kusoka asvipfuni nchumu, kambe xa lisima i lipfumelo ledzritizraka hi kola ka lizrandzru.
7 Afa n’witsrutsruma hi ndlela ya kone. I mani lwan’wisiveliki kutama n’wiyingiseta lesvi xihlayelamfuzri xisvijulaka?
8 Nkucetelo lowu awuhumi ku yene lweyi an’wivitaniki.
9 Handzrelo dzritsrongonyana dzrikukumuxa tizriku hinkwadzru ledzripfuviwiki.
10 Ndzran’widumba amahlweni ka Hosi lesvaku n’wingatipimisa sva kuhambana ni lesvi. Kambe lweyi an’widzolonganisaka tinhloko, nambi ota hi kwini, atakuma xikhatiso xakwe.
11 Kambe, vamakwezru, loko afa ndzrotama ndzrizrezra lesvaku vhanu vafanela kusoka, xana anha ndzrahatatama ndzrixanisiwela yini kee? Loko afa svili tanu, vhanu afa vatatsrhika kukhunguvanyeka hi kuyingela lesvaku huluku dzripfela kufeliweni amhandzreni.
12 Ingiki vhanu lavatsrhamaka hi kun’widzolonganisa tinhloko vangayatisusa vununa!
13 N’wine, vamakwezru, n’wivitaneliwi ntsrhunxeko; ntsena n’wingatizriseni ntsrhunxeko lowu svanga mukhandlu wa kuyenca kuzrandzra ka nyama, kambe tizrelanani hi lizrandzru.
14 Hikuva nawu hinkwawu wuhetiseki azritwini dzrin’we, ledzriliki: “Zrandzra walekwenu kufana ni lesvi utizrandzrisaka xisvone.”
15 Kambe, loko n’wine n’witsrhama hi kulumana ni kudetetelana, tivonelani lesvaku n’wingahetananani.
16 Kambe ndzrili: Fambani hi moya; laha n’wingatiyenca kunavela ka nyama ni kutsrongo.
17 Hikuva lesvi nyama yinavelaka svone svilwa ni moya; na wone moya wulwa ni nyama. Lesvibizri svalwisana; xilesvo, lesvi n’wijulaka kusviyenca an’wisviyenci.
18 Kasi loko n’wifambisiwa hi moya, an’wi hansi ka nawu.
19 Kutani mintizro ya nyama mivoneka ha hombe, minga leyi: Vugangu, mahanyela ya xambza, mahanyela ya tingana,
20 kugandzrela svithombe, vungoma, kuvengana, kuhanya hi gundurugunduru, vukwele, mahlundzru, timholova, kuyavana, mintlawa leyitsravukaniki,
21 matsrhoho, vumpopsi, minkhuvu ya mabzala ni pongwe, ni minchumu ya kufana ni leyi. Mayelanu ni lesvi, ndzran’wimamulela, hi la ndzrin’wimamuleliki ha kone, lesvaku lavayencaka minchumu leyo vangatida pfindla dzra Mfumu wa Xikwembu Nkulukumba.
22 Kambe handzru wa moya i lizrandzru, kunyonxa, kuzrula, kulehisa mbilu, vunene, kulunga, lipfumelo,
23 kunabzala ni kutikhoma. Aku na nawu wa kulwisana ni lesvo.
24 Nakone lava valumbaka Kriste Yesu vagongondzreli nyama yavu amhandzreni, ni kupsha ni kunavela ka yone.
25 Loko hihanya hi moya, ahifambeni hi kulandzra moya.
26 Hingatibzeleni lesvaku hitlula van’wana, hitsrhama hi kuphikisana ni kuxondzrolotana.