BRX

1   Kutani ndzrili loko madapfindla ehe ntsrongwana, angahambani ni xikazrawa, nambilesvi anga n’winyi wa hinkwasvu,

2   kambe ale hansi ka valaviseli ni vatameli va muti kuko kutlhasa nkama lowubekisiwiki hi tatana wakwe.

3   Hi ndlela leyifanaka, na hine, ankama lowu afaka hehe vatsrongwana, afa hili wukazraweni bza minchumu ya masungulu ya misava.

4   Kambe loko kutlhasi nkama lowubekisiwiki, Xikwembu Nkulukumba azrumeli N’wanakwe, lwangabelekiwa hi wansati lweyi afaka ali hansi ka nawu,

5   akuva ahakelela ntsrhunxeko lava afaka vali hansi ka nawu, lesvaku hikota kuyenciwa vana.

6   Kutani lesvi n’winga vana, Xikwembu Nkulukumba azrumeli moya wa N’wanakwe atimbilwini tezru, lowuhiyencaka hibandlukana, hiku: “Abba, we Tatana wanga!”

7   Xilesvo, wene awehe xikazrawa kambe u n’wana; nakone lesvi unga n’wana, svijula kuhlaya lesvaku na wene u madapfindla hi tlhelo dzra Xikwembu Nkulukumba.

8   Kambe, ke, ankama lowu afaka n’wingamutivi Xikwembu Nkulukumba, afa n’wili svikazrawa sva minchumu lemingeke svikwembu hi xihlayelamfuzri.

9   Kambe lesvi kutani n’witivaka Xikwembu Nkulukumba, kumbe lesvi kutani n’witibziwaka ha Xikwembu Nkulukumba, n’wisvikotisa kuyini kutlhela n’wilandzrelela minchumu lemingeke na ntamu ni minchumu ya masungulu lemingapfunikiki nchumu, n’witlhela n’wijula ku tiyenca svikazrawa sva yone?

10   N’wikulungela masiku ya kukazri ni tihweti, tinguva ni malembe.

11   Ndzrichava lesvaku kumbexana ndzretikazrata mahala hi mhaka yenu.

12   Vamakwezru, ndzrin’wikombela lesvaku n’wifana na mine, hikusa na mine khale afa ndzrifana na n’wine. An’windzrihonelanga nchumu.

13   Kambe n’wasvitiva lesvaku lexingandzriyenca ndzrin’wizrezrela madzrungula lamanene hi khambi dzra kusungula hilesvi afaka ndzrivabza anyameni.

14   Kambe, nambilesvi kuvabza kwanga afaka kuli xikazratu ku n’wine, an’windzridzrelanga mfuzri an’winyenyentsekanga ha mine; kambe n’windzrihoyozeli kufana ni ntsrumi ya Xikwembu Nkulukumba, kufana na Kriste Yesu.

15   Kutani ke, kuyi kwini kunyonxa loku afaka n’wili naku? Hikusa ndzrin’wibekela vumboni bza lesvaku, loko afa svekoteka, anha n’witixokoli mahlo n’windzrinyika.

16   Kutani ke, svosvi ndzrindzruluki nala hilesvi ndzrin’wibzelaka xihlayelamfuzri?

17   Van’wihisekela ngopfu, kambe avan’wijuleli sva svinene; vojula kun’wihambanisa na hine, lesvaku n’witahamba n’wivalandzrelela hi nkhinkhi.

18   Kambe i svinene loko mhunu an’wihisekela ngopfu na an’wijulela sva svinene minkama hinkwayu, nakone kunge ntsena loko ndzrili na n’wine;

19   n’wine, vananga, lava ndzritlhelaka ndzrilun’wa ha n’wine kuko Kriste avumbeka amakazri kwenu.

20   Afa ndzrinavela lesvaku ndzringava na n’wine svosvi munene, ndzriva ndzricinca mavulavulela yanga, hikusa ndzrihlamala ndzringagami ha n’wine.

21   Ndzribzelani, n’wine n’wijulaka kuva hansi ka nawu: Xana an’wiwutwi nawu kee?

22   Hikuva, tsralwa dzrili Abrahamu afa a ni vana vabizri, mun’we wa kubelekiwa hi xitizri, mun’wana wa kubelekiwa hi wansati wa kuntsrhunxeka;

23   Kambe lweyi abelekiwiki hi xitizri kunene abelekiwi hi ndlela ya ntumbuluku kambe lwemun’wana wa kubelekiwa hi wansati wa kuntsrhunxeka abelekiwi hi kulandzra xidumbiso.

24   Minchumu leyi mingavoniwa svanga xifaniso; hikusa vavasati lava vafanekisela svipfumelelanu svibizri: lexa Nhava ya Sinayi, lexipsalaka vana va vukazrawa, lexi kunga Hagari.

25   Kutani Hagari afanekisela Sinayi, kunga nhava leyinga le Arabiya, nakone afana na Yerusalema wa namunhla, hikuva yene ni vanakwe vale vukazraweni.

26   Kambe Yerusalema wa le henhla antsrhunxekile, nakone hi yene mamana wezru.

27   Hikusa kutsraliwi lesvi: “Nyonxa, wene wansati wa kupfumala n’wana, wene lwangapsalikiki vana; bana nkulungwana wa kutsrhava, wene wansati lwangikisama alun’wa; hikuva vana va wansati wa kutsrhikiwa i vanyingi ngopfu kutlula va lweyi anga ni nuna.”

28   Kutani n’wine, vamakwezru, n’wi vana va xidumbiso kufana ni lesvi Izaki afaka ali svone.

29   Kambe, svanga hesvi lweyi abelekiwiki hi ndlela ya ntumbuluku asunguliki kuxanisa lweyi abelekiwiki hi ndlela ya moya, hi svosvo ni svosvi.

30   Kambe, xana tsralwa dzrili yini? Dzrili: “Hlongola xitizri ni n’wana wa xone, hikusa n’wana wa xitizri angaka angadi pfindla ni n’wana wa wansati lwantsrhunxekiki.”

31   Xilesvo, vamakwezru, hine ahi vana va wansati wa xitizri, kambe hi vana va wansati lwantsrhunxekiki.