BRX

1   He n’wine vagalatiya! N’wine an’wipimisi ha hombe! Hi mani lwangan’wimphuntisela, nakuve n’witlhamuxeliwi ha hombe mafela ya Yesu Kriste amhandzreni?

2   Ndzrijula kun’wivutisa nchumu wun’we ntsena: Xana n’wiyamukeli moya hi kulandzrelela nawu kumbe hi kupfumela lesvi n’wisviyingeliki?

3   N’wimphuntisi xilesvi kee? Lesvi n’wingasungula kutsrutsruma hi tlhelo dzra moya, xana n’wijula kuhetisa hi tlhelo dzra nyama?

4   Xana n’wixaniseki ngopfu mahala ntsena? Loko kuli lesvaku mpela n’wexaniseka mahala!

5   Ina ka, xana lweyi an’winyikaka moya atlhela ayenca mahlolana amakazri kwenu ayenca lesvo hi mhaka ya lesvi n’wilandzrelelaka nawu kumbe hi mhaka ya lesvi n’wipfumelaka ku lesvi n’wisviyingeliki kee?

6   Svafana na Abrahamu; apfumeli ku Xikwembu Nkulukumba, kutani svihlayiwa lesvaku ku yene i vululami.

7   Svitivani, ke, lesvaku vana va Abraham hi lava vanga ni lipfumelo.

8   Kutani, loko dzriprofeta lesvaku Xikwembu Nkulukumba afa atahlaya vhanu va matiko lesvaku valulamile hi kola ka lipfumelo, tsralwa dzrizrangi dzritwalisa madzrungula lamanene ku Abrahamu, dzriku: “Matiko hinkwawu matakatekisiwa hi kola kwaku.”

9   Xilesvo, lavanga ni lipfumelo vakatekisiwa kun’we na Abrahamu, lweyi afaka ali ni lipfumelo.

10   Hikuva hinkwavu lavadumbaka kulandzrelela nawu vale hansi ka xizruku, hikusa kutsraliwi lesvi: “Azruketeliwile mani na mani lwakalaka angatsrhami hi kulandzra svileleto hinkwasvu lesvitsraliwiki abukwini dzra Nawu.”

11   Nakone svakhanya lesvaku aku na mhunu angahlayiwaka lwalulamiki ku Xikwembu Nkulukumba hi kulandzrelela nawu, hikusa “mululami atahanya hi lipfumelo”.

12   Kutani Nawu awusukeli alipfumelweni. Kambe, “mani na mani lwayencaka minchumu leyi atahanya ha yone.”

13   Kriste ahihakelelile, ahihumexa ku xizruku xa Nawu hi kuzrukiwa ambangwini wezru, hikusa kutsraliwi lesvi: “Azruketeliwile mani na mani lwahayekiwaka amhandzreni.”

14   Lesvo afa sviyencela akuva nkateko wa Abrahamu wutlhasa amatikweni hi kola ka Kriste Yesu, akuva hiyamukela moya lowudumbisiwiki hi kola ka lipfumelo dzrezru.

15   Vamakwezru, ndzrijula kun’wifanisela hi vhanu: Loko xipfumelelanu xisungula kutizra, nambi xehambiwa hi mhunu, akehe na lweyi angaxisulaka kumbe kuyengetela xanchumu ku xone.

16   Kutani svidumbiso sviyenciwi ku Abrahamu ni lixaka dzrakwe. Akuhlayiwi lesvaku “ni ku tinxaka taku”, ingiki tova tinyingi. Kambe, kuhlayiwa lesvaku “ni ku lixaka dzraku”, na kuhlayiwa mun’we, anga Kriste.

17   Lesvi ndzrijulaka kuhlaya svone hi lesvi: Antsrhaku ka kuva kuhundzri mune wa madzana na ntlhanu wa makume ya malembe na Xikwembu Nkulukumba ahambi xipfumelelanu na Abrahamu, nawu lowungagama wunhingenisiwa awuxihelisi xipfumelelanu lexo, lesvaku kuhelisiwa xidumbiso.

18   Hikusa loko pfindla dzriyamukeliwa hi kulandzrelela nawu, adzrahayamukeliwi hi kuhetiseka ka xidumbiso; kambe Xikwembu Nkulukumba avi ni timpsalu ta kunyika pfindla ledzro Abrahamu hi xidumbiso.

19   Kutani ke, Nawu wutizrela yini? Wuyengeteliwi akuva wukomba vhanu svidoho svavu, kuko kutlhasa lixaka ledzri afaka dzriyenceliwi xidumbiso; nakone wunyiketiwi hi tintsrumi hi voko dzra mutlhanganisi.

20   Kutani mutlhanganisi ajuleka loko ku ni kutlula mhunu mun’we, kambe Xikwembu Nkulukumba i mun’we ntsena.

21   Svili nawu wulwisana ni svidumbiso sva Xikwembu Nkulukumba? Svingeyenceki lesvo! Hikusa loko afa kenyikeliwa nawu wa kukazri lowukotaka kuhanyisa, anha svikotekile kuva mhunu alulama hi kulandzrelela nawu.

22   Kambe Tsralwa dzrinyiki xidoho ntamu wa kukhoma hinkwasvu, akuva xidumbiso lexikotekaka hi kupfumela ku Yesu Kriste xinyikiwa lavapfumelaka.

23   Kutani, na lipfumelo dzringasitlhasa, afa hivoneleliwa hi nawu, hikhomiwile hipfaleliwa, na hiyimela lipfumelo ledzri afaka dzrijula kupfuleteliwa.

24   Kutani nawu wuvi mukombi wezru wa ndlela lweyi ahiyisiki ku Kriste, akuva hikota kuhlayiwa lavalulamiki hi kola ka lipfumelo.

25   Kambe lesvi kutani kutlhasiki lipfumelo, ahehe hansi ka mukombi wa ndlela.

26   Hikusa hinkwenu n’wi vana va Xikwembu Nkulukumba hi kola ka kupfumela kwenu ku Kriste Yesu.

27   Hikusa hinkwenu n’wingababatisiwa ku Kriste n’wiyambali Kriste.

28   Aku na muyuda nambi mugrika; aku na xikazrawa nambi muntsrhunxeki; aku na wanuna nambi wansati, hikusa hinkwenu n’wi kun’we na Kriste Yesu.

29   Kutani loko n’wili va Kriste, ke, n’wi lixaka dzra Abrahamu; n’wi vadi va pfindla, hi kulandzra xidumbiso.