BRX

1   Xilesvo, vamakwezru lavazrandzrekaka ni lava ndzrivaxuvaka, n’wine n’winga kutsrhava kwanga ni ngiyana yanga, tiyani n’wikunde andleleni leyi kun’we ni Hosi, vazrandzriwa vanga!

2   Ndzritsratsriya Evhodya, ndzritlhela ndzritsratsriya Sintika, akuva vatlhangana hi miyanakanyu amahlweni ka Hosi.

3   Ina, ndzrikombela na wene, svanga mutizrikulozri wa xihlayelamfuzri, akuva upfuna vavasati lava, lavatizrisaniki na mine akulweleni ka madzrungula lamanene, kupatsra na Klementi, ni vatizrikulozri lavan’wana, lava mavito yavu manga bukwini dzra vutomi.

4   Tsrhamani na n’winyonxile amahlweni ka Hosi. Ndzritatlhela ndzriphindha: Nyonxani!

5   Yencani vhanu hinkwavu vasvivona lesvaku n’winabzalile. Hosi yi kusuhi.

6   N’wingahlatiyeleni hi nchumu, kambe atimhakeni hinkwatu, hi xikhongoto ni xikombelo kun’we ni kukhensa, tivisani Xikwembu Nkulukumba lesvi n’wijulaka kusvikombela;

7   kutani kuzrula ka Xikwembu Nkulukumba lokutlulaka kutwisisa hinkwaku kutazrindzra timbilu tenu ni miyanakanyu yenu hi kola ka Kriste Yesu.

8   Hi vugamu, vamakwezru, hinkwasvu lesvinga sva xihlayelamfuzri, hinkwasvu lesvinga sva lisima, hinkwasvu lesvilulamiki, hinkwasvu lesvibasiki, hinkwasvu lesvixongiki, hinkwasvu lesvi kukaneliwaka ha hombe ha svone, hinkwasvu lesvinga sva svinene, hinkwasvu lesvikhensekaka, pimisani ha svone.

9   Lesvi n’wisvidondzriki n’witlhela n’wisviyamukela, ni kusviyingela n’witlhela n’wisvivona ku mine, sviyencani, kutani Xikwembu Nkulukumba wa kuzrula atava na n’wine.

10   Ndzrinyonxa svinene amahlweni ka Yehovha lesvi kuzron’weka kwenu ha mine kutlheliki kupfuka. Svone, kuzron’weka afa n’wizron’weka ha mine, kambe n’wipfumali mukhandlu wa kusvikombisa.

11   Andzrikaneli hi kuva ndzropfumala xanchumu, hikusa ndzridondzri kunyonxa axiyin’wini xini na xini lexi ndzringa ku xone.

12   Ndzrasvitiva kupfumala svakuda, ndzrasvitiva kuva ni svakuda sva svinyingi. Aminchun’wini hinkwayu ni le sviyin’wini hinkwasvu, ndzridondzri xihundla xa kuxuzra ni xa kutwa ndlala, ni ko kuva ni sva svinyingi ni kupfumala.

13   Aminchun’wini hinkwayu, ndzri ni ntamu hi kola ka lweyi andzrinyikaka ntamu.

14   Nambitanu, n’wine n’wiyenci svone hi kutipatsra na mine akuxanisekeni kwanga.

15   Nakunene, n’wine vafilipiya mfuzri n’wasvitiva lesvaku ankama lowu madzrungula lamanene mangan’witlhasela ha wone, loko ndzrisuki Masedonya, akuvanga na bandla ledzrikhomisaniki na mine amhakeni ya kuhanana ni kuyamukela, handle ka n’wine ntsena;

16   hikusa na ndzrehe le Tesalonika, n’wine n’windzrizrumeleli xa kukazri lexi afaka ndzrixivilela; n’wasviyenci kan’we n’witlhela n’wiku kubizri.

17   Ahi kuva ndzrojula kuhananiwa minchumu, kambe ndzrojula mihandzru lemiyengeselaka kukhensiwa kwenu.

18   Kambe ndzri ni hinkwasvu lesvi ndzrisvivilelaka ndzritlhela ndzritlulisa. Kutani ndzriyanelisekile lesvi ndzriyamukeliki minchumu leyi n’wingamizrumela ha Epafroditu, dzringa gandzrelo dzra kunun’hwela svinene, ledzriyamukelekaka ni ledzrinyonxisaka ku Xikwembu Nkulukumba.

19   Kutani Xikwembu Nkulukumba wanga atan’winyika hinkwasvu lesvi n’wisvivilelaka hi kuya hi vukosi bzakwe hi ndlela ya kuphatima ha Kriste Yesu.

20   Kutani ndzrili Xikwembu Nkulukumba ni Tatana wezru aanyikiwe lidzrumu hi la kungahelikiki! Amen.

21   Ndzridzrungulelani hinkwavu vhanu va Xikwembu Nkulukumba lava kuxwenga amahlweni ka Kriste Yesu. Vamakwezru lavanga na mine van’widzrungula.

22   Hinkwavu vhanu va Xikwembu Nkulukumba lava kuxwenga, kambe ngopfungopfu va ndangu wa ka Khezari, van’widzrungula.

23   Vumbilu bza Hosi Yesu Kriste abzive ni moya lowu n’winga nawu!