BRX

1   Hi vugamu, vamakwezru, nyonxani amahlweni ka Hosi. Mine andzrigingimi kun’witsralela minchumu yoleyi ya min’we; nakone yin’wibekisa kule ni khombo.

2   Tivonelani timbzana; tivonelani vatizri va lesva kubiha; tivonelani kusoka ka madzrimi.

3   Hikusa hi hine hisokiki hi xihlayelamfuzri, hine lavagandzrelaka hi moya wa Xikwembu Nkulukumba, hivaka hikina hi kunyonxa hi Kriste Yesu, na hingadumbi tsrhamela dzra nyama,

4   nambilesvi mine inhaka ndzri ni svivangelo sva kudumba tsrhamela dzra nyama. Loko mhunu mun’wana apimisa lesvaku a ni svivangelo sva kudumba tsrhamela dzra nyama, mine ndzramutlula:

5   Ndzrisoki hi siku dzra vuntlhanu na mazrazru; ni wa tiko dzra Yisrayele, wa lixaka dzra ka Benjamini, muheberu lwapsaliwiki hi vaheberu; hi kulandzra nawu, afa ndzrili mufarisi;

6   hilesvi afaka ndzrihisekisa xisvone, afa ndzrixanisa bandla; hi tlhelo dzra vululami bza kufambelana ni nawu, afa kunge na lexi afaka ndzrisoliwa ha xone.

7   Nambitanu, lesvi afaka ndzrisvivona na svi ni bindzru, ndzrisvivoni na svili kuheteliwa nkama hi mhaka ya Kriste.

8   Kambe, handle ka lesvo, mfuzri lesvo hinkwasvu ndzrisvivona na svili kuheteliwa nkama hi nkonta ya lisima ledzritlulisaka dzra vutivi bza Kriste Yesu, Hosi yanga, lweyi ndzripfumeliki kulahlekeliwa hi minchumu hinkwayu, ndzriva ndzriminkonta nsila, akuva ndzrikota kukuma Kriste,

9   ni kukumiwa na ndzrili mun’we wa vhanu vakwe, kunge hi mhaka ya kululama kwanga lokupfelaka ka kulandzrelela Nawu, kambe hi kola ka vululami lebzinga kone hi kuva ni lipfumelo ku Kriste, bzinga vululami lebzipfelaka ku Xikwembu Nkulukumba ahenhleni ka lipfumelo.

10   Lexi ndzrixijulaka i kumutiva, ndzritiva ni ntamu wa kupfuxiwa kwakwe, ni kutwa tinxanisa leti atitwiki, ndzripfumela mafela ya kufana ni yakwe,

11   akuva kumbexana ndzringakuma kupfuxiwa makazri ka lavafiki.

12   Andzrihlayi lesvaku kutani ndzridzrikumile hakelo kumbe ndzriyenciwi lwahetisekiki, kambe ndzritsrutsruma hi nkhinkhi akuva kumbexana ndzringakota ndzrikuma lesvi Kriste Yesu andzrihlawuleliki svone.

13   Vamakwezru, andzritibzeli svone lesvaku kutani ndzridzrikumile hakelo; kambe lexi ndzrixiyencaka i xin’we: ankama lowu ndzridzrivalaka minchumu leminga ntsrhaku ndzritlhela ndzritikazratela kukuma minchumu leminga mahlweni,

14   ndzritsrutsruma hi nkhinkhi na ndzrikongoma ku lexi ndzrijulaka xone, akuva ndzrikuma hakelo dzra kuvitaniwa ndzriya tilweni ha Xikwembu Nkulukumba kun’we na Kriste Yesu.

15   Xilesvo, hinkwavu lavawupfiki hi matlhelo hinkwawu vafanela kuva ni mapimisela lawa; nakone loko hi ndlela ya kukazri n’wine n’wi ni mapimisela mambeni ya kuhambana ni lawa, Xikwembu Nkulukumba atan’wikhanyisela lesvi.

16   Kambe, lesvi hingafambisa xisvone hikota hitatatlhasa lani, ahifambeni hi fambela dzroledzro.

17   Ndzriyetiselani hinkwenu, vamakwezru, n’wilavisisa lavafambaka hi ndlela leyitwananaka ni xikombiso lexi hin’wibekeliki xone.

18   Hikusa vanyingi vahanya svanga valala va lesvi Kriste afeliki svone amhandzreni, vanga volava afaka ndzritekisa kun’wibzela ha vone, lava svosvi ndzripatsraka ni kudzrila loko ndzrikanela ha vone.

19   Lava vatagama hi kuheliseliwa vugamu; xikwembu xavu i khuzri dzravu; lesvi vativonaka lisima ha svone i minchumu yavu lemichelanaka tingana; tinhloko tavu topimisa minchumu ya misava ntsena.

20   Kambe mfumu lowu hinga svizro sva wone wule matilweni, lomu hilaviselaka hi manyawu lesvaku kutahuma muhuluxi, Hosi Yesu Kriste,

21   lweyi atakandzruluta mizri yezru lemidzrelekiki amiyenca mifana ni mizri yakwe lemiphatimaka hi ntamu wakwe lowukulu, lowu ha wone akotaka kubeka minchumu hinkwayu ahansi kwakwe.