BRX

1   Xilesvo, loko ku ni xa kukazri hingatsratsriyanaka ha xone ku Kriste, loko ku ni xa kukazri hingachavelelanaka ha xone hi lizrandzru, loko ku ni lexi hitlhanganaka ha xone hi tlhelo dzra moya, loko hijula kukombana lizrandzru ledzrikulu ni lizrezre,

2   tatisani kutsrhava kwanga hi kuva ni mimpimiso lemilongolokaka, n’wiva ni lizrandzru dzrin’we, n’witwanana svanga mhunu mun’we, n’wiva ni mayanakanyela man’we.

3   N’wingayenceni nchumu hi kukwetlembetana kumbe hi kutivonela henhla, kambe, hi kutitsrongahata, mun’wana ni mun’wana aavone van’wana na vamutlula,

4   na angatijuleli sva ka kwakwe ntsena, kambe ni sva van’wana.

5   Tekelelani mapimisela lawa na yene Kriste Yesu afaka ali nawu.

6   Afa a ni xivumbeko xa Xikwembu Nkulukumba, kambe ni kusvipimisa angachukanga asvipimisa kutinyika mfanelo ya kudzringana na Xikwembu Nkulukumba,

7   kambe atichululile, ateka xivumbeko xa nandzra, ahambiwa lwafanaka ni vhanu.

8   Nangweso, loko akumeki na ali wa tsrhamela dzra mhunu, atitsrongahatile, ayingiseta kuyatlhasa akufeni, hi mafela ya kudlayiwa mhandzreni.

9   Xilesvo, na ye Xikwembu Nkulukumba amutlakuxi ngopfu svinene. Hi kusvizrandzra, amunyiki vito ledzringa henhla ka mavito hinkwawu laman’wana,

10   kuyencela lesvaku hi vito dzra Yesu, matsrolo hinkwawu makhinsama, ya lavanga tilweni ni ya lavanga misaveni ni lavanga hansi ka misava,

11   ni lesvaku lidzrimi dzrin’wana ni dzrin’wana dzrihlaya alivaleni lesvaku Yesu Kriste i Hosi akuva kudzrumisiwa Xikwembu Nkulukumba, Tatana.

12   Xilesvo, vazrandzriwa, svanga hesvi minkama hinkwayu n’wiyingisetiki, kunge ntsena loko ndzrili kone kambe ngopfungopfu svosvi ndzringeke kone, yencani minchumu lemitakan’winyika kuhuluka, hi kuchava ni kuzruzrumela.

13   Hikusa Xikwembu Nkulukumba hi yene lweyi, hi kola ka kuzrandzra kwakwe, an’wichelaka ntamu, akuva n’winavela nchumu wa kukazri n’witlhela n’wiwuyenca.

14   Yencani hinkwasvu na n’wingan’unun’uti kumbe kuphikisana,

15   akuva n’witava lavangeke na xisolo n’witlhela n’wiva vhanu va timbilu ta kubasa, n’wiva vana va Xikwembu Nkulukumba lavangeke na xisandzru amakazri ka vhanu lavahonekiki ni lavahezrekiki, lava n’wivaningaka amakazri kwavu svanga svivaningo amisaveni,

16   na n’wiwomelela azritwini dzra vutomi, akuva ndzritava ni xa kusekeleka ha xone ndzrikina hi kunyonxa asikwini dzra Kriste, hi kutiva lesvaku andzritsrutsrumanga mahala mfuzri andzritizranga mahala.

17   Nambitanu, nambiloko ndzrichululiwa kufana ni bzala bza magandzrelo ahenhla ka xitlhavelo ni le ntizrweni wa kuxwenga wa lipfumelo dzrenu, mbilu yanga yebaa nakone ndzrinyonxa na n’wine hinkwenu.

18   Hi ndlela leyifanaka, na n’wine nyonxani, hinyonxa kun’we.

19   Kutani amahlweni ka Hosi Yesu, ndzrilavisela kun’wizrumela Timotewu kunge khale, akuva ndzritatiyisiwa nhlana loko ndzriyingela ndzrava yenu.

20   Hikusa andzri na mun’wana wa mbilu ya kufana ni leyi anga nayu, lweyi atakan’wipfuna hakunene ku lesvi n’wisvivilelaka.

21   Hikusa hinkwavu lavan’wana va phete ni kutiyencela svavu, kunge sva Yesu Kriste.

22   Kambe n’wine n’wakutiva kudumbeka kwakwe, lesvaku atizri na mine kufana ni lesvi n’wana na mpsele vatizrisaka xisvone, na hitizrela madzrungula lamanene.

23   Kutani ke, hi yene ntsena ndzrilaviselaka kumuzruma hi kuhangwesa loko ndzritava ndzrivonile lesvaku kutayenceka yini hi mine.

24   Kambe ndzradumba amahlweni ka Hosi lesvaku nambi mine hi ntshima ndzritata kunge khale.

25   Kambe svosvi ndzrivona svijuleka akuva ndzrin’wizrumela Epafroditu, makwezru ni musochakulozri, ni muzrumiwa wenu ni mutizreli lwandzripfunaka hi lesvi ndzrisvivilelaka,

26   hikusa i khale na an’wixuva hinkwenu, nakone abindzriwa hi mbilu hilesvi n’wingayingela lesvaku avabzile.

27   Nakone, kunene, avabzile lakakuva kutsrongo afile, kambe Xikwembu Nkulukumba amutsretsrelelile; mfuzri angatsretsrelelanga yene ntsena kambe na mine, akuva ndzringadi mbitsi ndzriyehlisa hi nhlomulo.

28   Xilesvo, ndzramuzrumela hi kuhangwesa svinene, akuva loko n’wimuvona, n’wikota kutlhela n’winyonxa ni kuva na mine ndzritapumba kuvaviseka.

29   Xilesvo, muhoyozelani xilesvi vahoyozelisanaka xisvone amahlweni ka Hosi hi kutsrhava hinkwaku; nakone vabekelani xichavu vhanu va muxaka lowo,

30   hikusa kutsrongo afile hi mhaka ya ntizro wa Kriste, apeta vutomi bzakwe akhombzeni akuva apfaleta n’wine hi kuka n’wingavi kone laha akuva n’windzripfuna.