BRX

1   Vadzrimuxe kutibeka hansi ka vuhosi ni vazrangeli va mfumu, valandzra nawu, vatsrhama na vatibekiselile akuva vayenca ntizro wun’wana ni wun’wana lowunene,

2   vangakaneli kubiha hi mhunu, vangazrandzri kuhanya hi timholova, kambe vava va kunabzala, vava ni moya wa kuzrula amahlweni ka vhanu hinkwavu.

3   Hikusa na hine hisama hiva vhanu va kumphunta, va nkanu, va kulahleka, va kufumiwa hi kunavela lokubihiki ka tinxakanxaka ni kuzrandzra kutlanga, va kuyencelana nsele ni mona, va kunyenyentsa ni va kunyenyana.

4   Kambe, loko hikombekisiwi vumbilu bza Muhuluxi wezru, kunga Xikwembu Nkulukumba, ni lizrandzru ledzri anga nadzru hi vhanu,

5   ahihuluxile, na kunge hilesvi afaka hiyenci mintizro ya kululama, kambe ahihuluxi hi nkonta ya timpsalu takwe, hi kuhihlampsa, hibelekiwa ximpsha, hiva hipfuxetiwa hi moya wa kuxwenga,

6   lowu awuchululiki ahenhla kwezru hi mpimu lowukulu hi kutizrisa Yesu Kriste, Muhuluxi wezru,

7   kuyencela lesvaku, antsrhaku ka kuva hihlayiwi lavalulamiki hi vumbilu lebzo bzakwe, hitakota kuva vamadapfindla hi kulandzra dumbo dzra vutomi lebzingahelikiki.

8   Mazritu lawa madumbeka; xilesvo ndzrijula lesvaku utsrhama hi kukanela hi timhaka leti, akuva lavapfumeliki ku Xikwembu Nkulukumba vatsrhama hi kuyenca mintizro leminene. Lesvi i svinene nakone svipfuna vhanu hinkwavu.

9   Kambe ungatinhingeniseli akuphikisaneni loka kuka ndlela ni kudondzra matimu ya mindangu, ni timholova ni kulwisana hi mhaka ya Nawu, hikusa lesvo i sva kuka ndlela nakone asvipfuni nchumu.

10   Loko mhunu ajula kuyavanisa bandla, nakuve umumamulelile kan’we kumbe kubizri, mufulazrele,

11   na utiva lesvaku mhunu lweyo ahonekile mfuzri awadoha, nakone atiyavanyisile ha bzakwe.

12   Loko ndzrikuzrumela Artema kumbe Tikiku, hangwesa utatandzrikuma le Nikopolisi, hikusa hi lomu ndzrivoniki kutsrhama kone hi vuxika.

13   Longelela ha hombe Zena, ntivi ya Nawu, na Apolu, akuva vangapfumali nchumu aliyendzrweni dzravu.

14   Kambe vhanu vezru kujuleka vatlhela vadondzra kutinyiketela amintizrweni leminene, akuva vapfunisa loko svivileleka, akuva vangativa vhanu lavangapfunikiki nchumu.

15   Hinkwavu lavanga na mine vakudzrungula. Dzrungula lava vahizrandzraka alipfumelweni. Hinkwenu ndzrin’winavelela vumbilu.