-
Tito 2
1 Kambe wene vulavula minchumu lemitwananaka ni dondzro leyinene.
2 Vavanuna lavakulu vafanela kutsrhama na vangapopsanga, vava ni xinthunzi, vayenca minchumu ya kutwisiseka, vava vahanya ha hombe alipfumelweni ni le lizrandzrwini, ni le kutiyiseleni.
3 Na vone vavasati lavakulu, vafanela kuva ni mahanyela ya xichavu, vangazrandzri kuhanya hi mahlevo, vangavi lavafumiwaka hi bzala bza bzinyingi, vava vadondzrisi va lesvinga svinene,
4 akuva vakota kudondzrisa vavasati lavatsrongo kuzrandzra vanuna vavu ni vanavu,
5 kuva lavayencaka minchumu ya kutwisiseka, kuva lavabasiki, kuva lavativaka kubekisa muti, kuva lavanene, kuva lavatibekaka hansi ka vanuna vavu, akuva zritu dzra Xikwembu Nkulukumba dzringachuki dzrisoliwa.
6 Na vone vampsha vatsratsriye akuva vayenca minchumu ya kutwisiseka,
7 hi nkama wuli wun’we, na ubeka xikombiso xa mintizro leminene aminchun’wini hinkwayu, udondzrisa kudumbeka, xinthunzi,
8 ni mavulavulela lamanene lamangasolekikiki, lesvaku lweyi akanetaka adana, angakumi nchumu wa kubiha ni wa wun’we wa kuwuhlaya ha hine.
9 Lavanga malandzra vafanela kutibeka hansi ka vinyi va vone aminchun’wini hinkwayu, valwela kuvanyonxisa, vangaphikisani navu,
10 vangavayiveli nchumu, kambe vakombisa kudumbeka hinkwaku, akuva atimhakeni hinkwatu vatakota kuxongisa dondzro ya Muhuluxi wezru, Xikwembu Nkulukumba.
11 Hikusa vumbilu bza Xikwembu Nkulukumba bzikombisiwile, lebzihuluxaka vhanu va matsrhamela hinkwawu.
12 Bzihidondzrisa kutsrhika kuyeyisa Xikwembu Nkulukumba ni kunavela ka misava, kambe hihanya hi kuyenca minchumu ya kutwisiseka, hihanya hi ndlela ya kululama hitlhela hichava Xikwembu Nkulukumba amisaveni leyi hinga ku yone,
13 na hiyimela dumbo ledzrinyonxisaka ni kuhumelela lokuphatimaka ka Xikwembu Nkulukumba lwanga ni vukulu ni ka Muhuluxi wezru, Yesu Kriste,
14 lweyi angahifela akuva ahintsrhunxa avusombolokini hinkwabzu, akuva atibasisela vhanu vakwe va kuhlawuleka, lavahisekelaka mintizro leminene.
15 Vulavula hi minchumu leyi, utsratsriya utlhela ukhwavela na ungachavi nchumu. Kungave na mhunu lwakuvonelaka hansi.