BRX

1   Kutani ntsrumi ya vuntlhanu yichaya xipalapala xa yone. Kutani ndzrivona nyeleti leyiwiki amisaveni hi le tilweni, yinyikiwa mpfungulu wa xikhele xa xidziva.

2   Kutani yipfula xikhele xa xidziva, kuntlhantuka musi hi le xikheleni xa xidziva wa kufana ni musi wa xidzridzri lexikulu, kutani dambu dzricinca dzrihamba dzra ntima, na wo moya wa mpfhuka wucinca wuhamba wa ntima, hi mhaka ya musi wa xikhele.

3   Kutani kuhuma humbi amusini yiya amisaveni, yinyikiwa ntamu, wunga ntamu wa kufana ni lowu mibalana ya misava minga nawu.

4   Yibzeliwa kuka yingahoni bzanyi bza misava kumbe ximila xini na xini kumbe muzri wini na wini kambe ntsena lavangeke na xifungu xa Xikwembu Nkulukumba amimombzeni yavu.

5   Kutani humbi yinyikiwa kuka yingavadlayi, kambe kuvaxanisa hi ntlhanu wa tihweti. Nakone mafofozrela ya kone afa mafana ni kufofozra ka mubalana loko wuluma mhunu.

6   Amasikwini lawo vhanu vatajula tindlela ta kuva vafa kambe vangaka vangatikumi, mfuzri vatanavela kufa kambe lifu dzritavatsrutsruma.

7   Kutani humbi afa yijula kufana ni mahanxi lamabekiseliwiki yimpi. Kutani atinhlokweni ta yone afa ku ni lesvivonekaka ingiki i tingiyana ta gole, kutani vuso bza yone afa bzifana ni vuso bza vhanu,

8   kambe misisi ya yone afa mifana ni misisi ya vavasati. Kutani menyo ya yone afa mafana ni ya tindzrawu,

9   nakone afa mi ni mihelo ya kumpfenkela svifuva kufana ni mihelo ya nsimbi. Kutani pongwe dzra timpapa ta yone afa dzrifana ni pongwe dzra makalichi ya mahanxi lamatsrutsrumelaka ayimpini.

10   Nakone yi ni minkila leminga ni mintsrhombo ya kufana ni mibalana, kutani ntamu wa yone wa kuxanisa vhanu hi ntlhanu wa tihweti afa wuli minkileni.

11   Humbi yi ni hosi leyiyizrangelaka, anga ntsrumi ya xidziva. Vito dzra yone hi xiheberu i Abadoni, kambe hi xigrika yi ni vito dzra Apoliyoni.

12   Khombo ledzra kusungula dzrihundzrile. Lavisani! Kahabuya man’wana mabizri antsrhaku ka lesvi.

13   Kutani ntsrumi ya vuntlhanu na yin’we yichaya xipalapala xa yone. Kutani ndzriyingela zritu dzrin’we ledzrihumaka atimhondzrweni ta alitari dzra gole ledzringa amahlweni ka Xikwembu Nkulukumba,

14   na dzribzela ntsrumi ya vuntlhanu na yin’we leyi afaka yi ni xipalapala, dzriku: “Ntsrhunxa tintsrumi leta mune letitsrimbiwiki anambzeni wa Wufrata.”

15   Kutani tintsrumi leta mune leti afaka titibekiseli nkama, ni siku, ni hweti, ni lembe, tintsrhunxiwa kuyadlaya xiyenge xa vuzrazru xa vhanu.

16   Kutani nhlayu ya makhandzra ya kufamba hi mahanxi afa yili madzana mabizri ya madzana ya madzana ya madzana; ndzriyingeli nhlayu ya kone.

17   Kutani hi lesvi ndzrimavonisiki xisvone mahanxi axivonisweni, ni lavatsrhamiki ku wone: Afa va ni mihelo ya kumpfenkela svifuva sva muvala wa libungu ni wa nkuxe, ni wa marilana, kutani tinhloko ta mahanxi afa tifana ni tinhloko ta tindzrawu, nakone afa kuhuma ndzrilo ni musi ni marilana hi le minon’wini ya wone.

18   Xiyenge xa vuzrazru xa vhanu xidlayiwa hi makhombo lamazrazru, hi ndzrilo, ni musi, ni marilana, lesvi afaka svihuma amilon’wini ya wone.

19   Hikuva ntamu wa mahanxi wule milon’wini ni le minkileni ya wone, hikuva minkila ya wone yifana ni tinyoka nakone yi ni tinhloko, leti yivavisanaka ha tone.

20   Kambe vhanu lavasaliki, lavakaka vangadlayiwanga hi makhombo lawa, avatisolanga amintizrweni ya mavoko yavu. Xilesvo, avatsrhikanga kugandzrela mademona ni svikwembu sva svivatliwa sva gole ni silivhela, ni nsuku, ni zribze, ni ntsrandzra, lesvingakotikiki kuvona nambi kuyingela kumbe kufamba.

21   Nakone avatisolanga avudlayini bzavu, nambi avungomeni bzavu, ni le vugangwini bzavu, kumbe vuyivini bzavu.