BRX

1   Antsrhaku ka lesvi, ndzrivona mune wa tintsrumi na tiyimi ku mune wa makhona ya misava, tikhomi mimoya ya mune ya misava, akuva kungahungi moya ni wa wun’we ahenhla ka misava kumbe ka lwandle kumbe ka muzri.

2   Kutani ndzrivona yin’wana ntsrumi na yitlhantuka hi le vuxeni, na yi ni xifungu xa Xikwembu Nkulukumba lwahanyaka; kutani yivitana tintsrumi leta mune hi zritu ledzrikulu, leti afaka tinyikiwi ntamu wa kuhona misava ni lwandle,

3   yiku: “N’wingahoneni misava kumbe lwandle kumbe mizri, hiko hiheta kufunga malandzra ya Xikwembu Nkulukumba wezru amimombzeni!”

4   Kutani ndzriyingela nhlayu ya lavafungiwiki, khume dzra madzana ya madzana na mune wa madzana ya madzana, na mune wa makume ya madzana lavafungiwiki na vahuma ku lixaka dzrin’wana ni dzrin’wana dzra vana va Yisrayele:

5   Ku lixaka dzra Yuda, dzana dzra madzana na makume mabidzri ya madzana ya lavafungiwiki; ku lixaka dzra Rubeni, dzana dzra madzana na makume mabidzri ya madzana; ku lixaka dzra Gadi, dzana dzra madzana na makume mabidzri ya madzana;

6   Ku lixaka dzra Axeri, dzana dzra madzana na makume mabidzri ya madzana; ku lixaka dzra Naftali, dzana dzra madzana na makume mabidzri ya madzana; ku lixaka dzra Manase, dzana dzra madzana na makume mabidzri ya madzana;

7   Ku lixaka dzra Simiyoni, dzana dzra madzana na makume mabidzri ya madzana; ku lixaka dzra Levhi, dzana dzra madzana na makume mabidzri ya madzana; ku lixaka dzra Isakari, dzana dzra madzana na makume mabidzri ya madzana;

8   Ku lixaka dzra Zebuloni, dzana dzra madzana na makume mabidzri ya madzana; ku lixaka dzra Yosefa, dzana dzra madzana na makume mabidzri ya madzana; ku lixaka dzra Benjamini, dzana dzra madzana na makume mabidzri ya madzana ya lavafungiwiki.

9   Antsrhaku ka lesvi, ndzriti ndzrilangusa, ndzrovona xitsrhungu lexikulu, lexi afaka kunge na mhunu lwakotaka kuxinkonta, xa vhanu lavahumaka ku matiko hinkwawu, ni tinhlonge hinkwatu, ni svitsrhungu hinkwasvu, ni tindzrimi hinkwatu, na vayimi amahlweni ka xiluvelo ni le mahlweni ka Xihambana, na vayambali minkhancu ya ntlhohe, na vatameli minkindzru amavokweni.

10   Kutani afa vabandlukana hi zritu ledzrikulu, vaku: “Hikhensa Xikwembu Nkulukumba wezru, lwatsrhamiki axiluvelweni, ni Xihambana, hi kuhihuluxa!”

11   Kutani tintsrumi hinkwatu afa tiyimi hinkwaku amatlhelweni ka xiluvelo ni ka vakulu ni ka mune wa svivumbiwa lesvihanyaka; kutani tiwa hi mimombo amahlweni ka xiluvelo tigandzrela Xikwembu Nkulukumba,

12   tiku: “Amen! Lidzrumu, ni kuphatima, ni vutlhazri, ni kukhensiwa, ni xihluwa, ni ntamu, ni wukulu, asviyisiwe ku Xikwembu Nkulukumba wezru hi masiku ni masiku! Amen.”

13   Kutani mun’we wa vakulu andzriyangula, aku: “Xana lavayambaliki minkhancu ya ntlhohe i vamani nakone vabuya hi kwini?”

14   Kutani ndzriku ku yene: “Hosi yanga, hi wene usvitivaka.” Kutani aku ku mine: “Lava hi lava vahumaka anhlomulweni lowukulu, kutani vahlampsi minkhancu yavu mibasa mikumpaa hi ngati ya Xihambana.

15   Hi svosvo vanga amahlweni ka xiluvelo xa Xikwembu Nkulukumba, vamuyencela vutizreli bza kuxwenga nhlikanhi ni vusiku atempeleni dzrakwe; kutani Lweyi atsrhamiki axiluvelweni atavanalavutela tende dzrakwe.

16   Vangahatitlhela vatwa ndlala kumbe vatlhela vatwa tozra, nakone vangahatitlhaviwa hi dambu kumbe kuhisiwa hi mumu,

17   hikusa Xihambana, lexinga makazri ka xiluvelo, xitavabzisa xivakongomisa asvihlobzeni sva mati ya vutomi. Kutani Xikwembu Nkulukumba atasula minyembeti hinkwayu amahlweni yavu.”