BRX

1   Ndzrigama ndzrivona loko Xihambana xipfula xin’we xa svinameko sva ntlhanu na svibizri, ndzriva ndzriyingela xin’we xa mune wa svivumbiwa lesvihanyaka na xihlaya lesvi hi zritu dzra kutsrhama ingiki i kudzruma ka tilo: “Tana!”

2   Ndzriti ndzrilangusa, ndzrovona hanxi dzra ntlhohe! Kutani lweyi afaka atsrhami ku dzrone afa a ni ligubu; kutani anyikiwa ngiyana ya vuhosi, ahuma na ahlula ava ayaheta kuhlula kwakwe.”

3   Loko xipfuli xinameko xa vubizri, ndzriyingeli xivumbiwa xa vubizri lexihanyaka, na xiku: “Tana!”

4   Kutani kuhuma hanxi dzrin’wana dzra muvala wa libungu, kutani lweyi atsrhamiki ku dzrone anyikiwa ntamu wa kususa kuzrula amisaveni akuva vhanu vadlayanana; anyikiwa ni lipanga ledzrikulu.

5   Loko xipfula xinameko xa vuzrazru, ndzriyingela xivumbiwa xa vuzrazru lexihanyaka, na xiku: “Tana!” Ndzriti ndzrilangusa, ndzrovona hanxi dzra ntima! Kutani lweyi atsrhamiki ku dzrone afa a ni xikalu xa kupima svakuda avokweni dzrakwe.

6   Kutani ndzriyingela lesvi afaka svitwala ingiki i mpfumawulu wa zritu makazri ka mune wa svivumbiwa lesvihanyaka, na sviku: “Kilu dzrin’we dzra tizriku i denari ni makilu mazrazru ya sevhada i denari. Ungatlange hi mafuzra ni vhinyo.”

7   Loko xipfula xinameko xa vumune, ndzriyingela zritu dzra xivumbiwa lexihanyaka xa vumune, na dzriku: “Tana!”

8   Ndzriti ndzrilangusa, ndzrovona hanxi dzra kunkwalala! Ni lweyi atsrhamiki ku dzrone afa a ni vito dzra Lifu, kutani afa alandzriwa hi Xizra. Kutani anyikiwa ntamu ahenhla ka xiyenge xa vumune xa misava, akuva adlaya hi lipanga dzra kuleha, ni hi ndlala, ni hi ntungu, ni hi svihazri sva nhova sva misava.

9   Loko xipfula xinameko xa vuntlhanu, ndzrivona ahansi ka alitari mahika ya lavadlayiwiki hi mhaka ya zritu dzra Xikwembu Nkulukumba ni hi mhaka ya vumboni lebzi vabzinyikeliki.

10   Kutani mabandlukana hi zritu ledzrikulu, maku: “Utatsrhika kuyatlhasa siku muni, Hosi Leyikulu, ya kuxwenga ni ya xihlayelamfuzri, kuyavanyisela ni kudzrihisela ngati yezru ku lavatsrhamaka amisaveni?”

11   Kutani mun’wana ni mun’wana wa vone anyikiwa nkhancu wa ntlhohe, vabzeliwa kuwisanyana kutsrongo kuko kutlhangana nhlayu ya malandzrakulobze ni vamakwavu lava afaka vayimela kudlayiwa svanga ha vone vadlayiwiki.

12   Kutani ndzrilangusa loko xihambana xipfula xinameko xa vuntlhanu na xin’we, kutani kuhumelela ximbeta lexikulu! Kutani dambu dzrihamba dzra ntima kufana ni saka dzra kutsrindzra dzra nkosi, ni hweti hinkwayu yihamba ingiki i ngati,

13   kutani tinyeleti ta tilo tiwela amisaveni svanga hi loko nkuwa wuhlakahliwa hi moya lowukulu kuhululeka makuwa ya wone ya mambisi.

14   Kutani tilo dzrisuka hi kusongana kufana ni mukhwepa lowusongiwaka, kutani tinhava hinkwatu ni svihlale hinkwasvu svisuka ambangwini wa svone.

15   Kutani tihosi ta misava, ni lavakulu, tihosi ta masocha, svipfundzri, lava ntamu, ni svikazrawa hinkwasvu, ni vhanu hinkwavu lavantsrhunxekiki, vatumbela atimhakweni ni le makazri ka mazribze ya tinhava.

16   Kutani vabzela tinhava ni mazribze, vaku: “Hiwelani n’wihifihla amahlweni ka vuso bza Lweyi atsrhamiki axiluvelweni ni le mahlundzrwini ya Xihambana,

17   hikusa siku ledzrikulu dzra mahlundzru yavu dzritlhasile; kutani i mani angadzritiyelaka?”