-
Mpfuletelo 3
1 “Tsralela ntsrumi ya bandla dzra le Sarda, uku: Ahlaya lesvi lweyi anga ni mimoya ya ntlhanu na mibizri ya Xikwembu Nkulukumba ni ntlhanu wa tinyeleti na tibizri: ‘Ndzramitiva mintizro yaku, lesvaku u ni vito dzra lesvaku wahanya, nakuve ufile.
2 Tsrhama hi kuvonelela, utiyisa lesvisaliki lesvinga kusuhi ni kufa, hikuva mintizro yaku andzrimikumanga na mihelelile amahlweni ka Xikwembu Nkulukumba wanga.
3 Xilesvo, dzrimuka lesvi usviyamukeliki ni lesvi usviyingelisiki xisvone. Kutani svibekise, utisola. Hikusa loko ungavoneleli, ndzritata kufana ni muyivi, kutani ungatiwutiva nkama lowu ndzritakakutela ha wone.
4 “‘Nambitanu, u ni vhanu vange vangani le Sarda lavakaka vanganchimisanga sviyambalu svavu, kutani lava vatafambafamba na mine na vayambali sviyambalu sva ntlhohe, hikusa svavafanela.
5 Lweyi atakahlula atayambexisiwa xisvosvo sviyambalu sva ntlhohe, kutani mine ndzringaka ndzringatimi vito dzrakwe abukwini dzra vutomi, kambe ndzritahlaya lesvaku ndzradzritiva vito dzrakwe amahlweni ka Tatana wanga ni le mahlweni ka tintsrumi takwe.
6 Lweyi anga ni tindleve aayingele lesvi moya wusvibzelaka mabandla.’
7 “Tsralela ntsrumi ya bandla dzra le Filadelfiya, uku: Ahlaya lesvi lweyi axwengiki ni lweyi anga wa xihlayelamfuzri, lweyi anga ni mpfungulu wa Davhida, lweyi apfulaka kungavi na mhunu lwapfalaka, ni lweyi apfalaka kungavi na mhunu lwapfulaka:
8 ‘Ndzramitiva mintizro yaku. Lavisa! Ndzribeki amahlweni kwaku nyangwa leyekemphaa, leyi kungeke na mhunu lwangayipfalaka, hikusa nambilesvi unga ni ntamu wutsrongo, ubekisi zritu dzranga nakone awulandzrulanga vito dzranga.
9 Lavisa! Ndzritanyikela lavanga va sinagoga dzra Sathana, lavaliki i vayuda nakuve ahi vone, kambe vokohemba. Lavisa! Ndzritavatisa vatatakhinsama amahlweni ka minkondzro yaku, vatasvitiva lesvaku ndzrakuzrandzra.
10 Lesvi ubekisiki zritu dzra kutiyisela kwanga, na mine ndzritakuhuluxa ku nkama wa ndzringo lowujulaka kuwela misava hinkwayu, akuva wudzringa lavatsrhamaka ku yone.
11 Ndzrata hi kuhangwesa. Khomelela ku lesvi unga nasvu, akuva kungavi na mhunu lwakutekelaka ngiyana yaku.
12 “‘Lweyi atakahlula ndzritamuhamba nsika ya temple dzra Xikwembu Nkulukumba wanga, kutani angaka angahasuki ku dzrone, nakone ndzritatsrala ahenhla kwakwe vito dzra Xikwembu Nkulukumba wanga ni vito dzra doropa dzra Xikwembu Nkulukumba wanga, Yerusalema Lwemumpsha, ledzrixikaka hi le tilweni ku Xikwembu Nkulukumba wanga, ni vito dzranga ledzrimpsha hi ntshima.
13 Lweyi anga ni tindleve aayingele lesvi moya wusvibzelaka mabandla.’’
14 “Tsralela ntsrumi ya bandla dzra le Lawodikiya, uku: Ahlaya lesvi Amen, mboni ya kudumbeka ni ya xihlayelamfuzri, masungulu ya vutumbuluxi bza Xikwembu Nkulukumba:
15 ‘Ndzramitiva mintizro yaku, lesvaku awutitimeti mfuzri awuhisi. Mawaku loko afa utitimeta kumbe uhisa.
16 Kutani, lesvi wokokufumela, ungahisikiki kumbe kutitimeta, ndzritakuthuka anon’wini wanga.
17 Hikusa uli: “Mine ndzri xipfundzri nakone laha ndzringa kone ndzretala hi vukosi, mfuzri andzripfumali nchumu”, kambe awusvivoni lesvaku u n’wambuyangwana, uchelana vusiwana nakone u xisiwana, awuvoni, mfuzri awuyambalanga nchumu.
18 Ndzrikukuca lesvaku uxava ku mine gole ledzriphatimisiwiki hi ndzrilo akuva uva xipfundzri; ni sviyambalu sva ntlhohe akuva uyambala, akuva tingana ta vusveti bzaku tingativoneka; ni muzri wa mahlo akuva utota mahlo, utakota kuvona.
19 “‘Hinkwavu lava ndzrivazrandzraka ndzravakhwavela ndzriva ndzrivatshinya. Xilesvo hiseka, utisola.
20 Lavisa! Ndzri kola axipfalwini ndzrigongondzraka. Loko mhunu ayingela zritu dzranga apfula xipfalu, ndzritanhingena andlwini yakwe ndzrida naye, na yene ada na mine.
21 Lweyi atakahlula ndzritamunyika kutsrhamisa na mine axiluvelweni xanga, svanga hesvi na mine ndzrihluliki ndzriva ndzritsrhamisa ni Tatana wanga axiluvelweni xakwe.
22 Lweyi anga ni tindleve aayingele lesvi moya wusvibzelaka mabandla!’”