BRX

1   Kutani ndzrivona tilo ledzrimpsha ni misava lemimpsha; hikusa tilo ledzra kusungula ni misava leya kusungula afa svihundzrile; ni lwandle adzrehe kone.

2   Ndzritlhela ndzrivona doropa ledzra kuxwenga, Yerusalema Lwemumpsha, na dzrixika hi le tilweni dzripfa ku Xikwembu Nkulukumba na dzrilulamiseliwi svanga mutekiwa lwatixongiseliki nuna wakwe.

3   Kutani ndzriyingela zritu ledzrikulu dzrihuma axiluvelweni, dzriku: “Lavisani! Tende dzra Xikwembu Nkulukumba dzri le vhanwini, nakone atatsrhama navu, kutani vatava tiko dzrakwe. Kutani Xikwembu Nkulukumba hi ntshima atava na vone.

4   Nakone atasula minyembeti hinkwayu amahlweni yavu; kutani lifu dzringahativa kone, nambi nkosi ni svidzrilo, ni kutwa kuvavisa, svingahativa kone, hikusa lesva kusungula svihundzrile.”

5   Kutani Lweyi atsrhamisiki axiluvelweni aku: “Lavisani! Ndzriyenca hinkwasvu sviva lesvimpsha.” Atlhela aku: “Tsrala, hikuva mazritu lawa madumbeka nakone i ya xihlayelamfuzri.”

6   Agama aku ku mine: “Svihetisekile! Hi mine Alfa na Omega, masungulu ni vugamu. Lweyi anga ni tozra, ndzritamunyika mati ya svihlovo sva mati ya vutomi hi mahala.

7   Lweyi ahlulaka atada pfindla dzra minchumu leyi, nakone ndzritava Xikwembu Nkulukumba wakwe, na yene atava n’wananga.

8   Kambe loko mali matoya, ni lavangeke na lipfumelo, ni lava kunyenyentsa ansileni yavu, ni vadlayi, ni vhanu va vugangu, ni vangoma, ni lavagandzrelaka svithombe, ni vahembi hinkwavu, lexi vatakakuma xone i tiva ledzripfuzraka hi ndzrilo ni marilana. Lesvi i lifu dzra vubizri.”

9   Kutani kuhuma yin’we ya tintsrumi leta ntlhanu na tibizri leti afaka ti ni ntlhanu wa svibza na svibizri lesvi afaka svitali hi makhombo laya ntlhanu na mabizri ya vugamu, yiku ku mine: “Buya ndzrikukomba mutekiwa, nsati wa Xihambana.”

10   Kutani yindzritlakula hi moya yindzriyisa anhaveni leyikulu ni ya kutlakuka, yindzrikomba doropa ledzra kuxwenga, Yerusalema, na dzrixika hi le tilweni, dzripfa ku Xikwembu Nkulukumba,

11   na dzri ni kuphatima ka Xikwembu Nkulukumba. Kuvaninga ka dzrone afa kufana ni ka zribze ledzra lisima ngopfu, kufana ni zribze dzra yaspi ledzriphatimaka svanga krixtali,

12   na dzri ni phangu ledzrikulu ni dzra kutlakuka ledzringa ni khume dzra tinyangwa na tibizri ni khume dzra tintsrumi na tibizri atinyangweni, nakone atinyangweni ta kone afa kutsraliwi mavito ya khume dzra tinxaka na tibizri ta vana va Yisrayele.

13   Hi le vuxeni afa ku ni tinyangwa tizrazru, le n’walungu tinyangwa tizrazru, ni le nyingitimu tinyangwa tizrazru, ni le mpeladambu tinyangwa tizrazru.

14   Nakone phangu dzra doropa afa dzri ni khume dzra mazribze na mabizri ya masungulu, mfuzri ku wone afa ku ni khume dzra mavito na mabizri ya khume dzra vapostola na vabizri va Xihambana.

15   Kutani lweyi afaka avulavula na mine afa atameli lihlanga dzra gole dzra kupima ha dzrone, akuva apima doropa ni tinyangwa dzra dzrone ni phangu dzra dzrone.

16   Kutani doropa dzriyakiwi ahenhla ka mune wa makhona, nakone kuleha ka dzrone kudzringana ni kuyanama ka dzrone. Kutani apima doropa hi lihlanga, makume mabizri ya madzana na madzana mabizri ya makilometru; kuleha ka dzrone ni kuyanama ka dzrone ni kutlakuka ka dzrone kafana.

17   Atlhela apima phangu dzra dzrone, ntlhanu na dzrin’we wa makume ni ntlhanu wa mametru; mpimu wa mhunu wa nyama, hi wo mpimu wa ntsrumi.

18   Kutani phangu afa dzriyakiwi hi yaspi, nakone doropa afa dzrihambiwi hi gole dzra kubasa, kufana ni vhidru dzra kubasa.

19   Masungulu ya phangu dzra doropa afa maxongiseliwi hi mixaka hinkwayu ya mazribze ya lisima: laya kusungula afa mali ya yaspi, laya vubizri afa mali ya safira, laya vuzrazru afa mali ya kalsedoni, laya vumune afa mali ya emeralda,

20   laya vuntlhanu afa mali ya sardoniksi, laya vuntlhanu na dzrin’we afa mali ya sardu, laya vuntlhanu na mabizri afa mali ya krizolite, laya vuntlhanu na mazrazru afa mali ya berilu, laya vuntlhanu na mune afa mali topazyu, laya vukhume afa mali ya krizopraze, laya vukhume na dzrin’we afa mali ya yasintu, laya vukhume na mabizri afa mali ametixta.

21   Nakone tinyangwa leta khume na tibizri afa tili khume dzra tindzralama na tibizri; yin’wana ni yin’wana ya tinyangwa afa yihambiwi hi ndzralama yin’we. Nakone xitaratu xa doropa afa xili xa gole dzra ntlhohe, kufana ni vhidru dzra kuvonekela.

22   Andzrivonanga tempele ku dzrone, hikuva Yehovha, Xikwembu Nkulukumba wa Ntamu Hinkwawu, hi yene tempele dzra dzrone, na xone Xihambana.

23   Kutani doropa afa dzringavileli dambu kumbe hweti kudzrivaningela, hikuva kuphatima ka Xikwembu Nkulukumba afa kudzrivaningela, nakone livaningo dzra dzrone afa kuli Xihambana.

24   Kutani matiko matafamba hi livaningo dzra dzrone, nakone tihosi ta misava titadzribuyisela kuphatima ka tone.

25   Tinyangwa ta dzrone tingatipfaliwa ni kan’we ni nhlikanhi, hikuva vusiku bzingativa kone ambangwini lowo.

26   Kutani vatadzritisela kuphatima ni xichavu xa matiko.

27   Kambe kone kungaka kunganhingeni xin’wana ni xin’wana lexinyamiki ni lavayencaka sva kunyenyentsa ni lava kuhemba; ntsena kutanhingena lavatsraliwiki abukwini dzra vutomi dzra Xihambana.