-
Mpfuletelo 20
1 Kutani ndzrivona ntsrumi yin’we na yixika hi le tilweni na yi ni mpfungulu wa xikhele xa xidziva ni mpencana leyikulu avokweni dzra yone.
2 Kutani yikhoma dragona, nyoka ya le kusunguleni, lweyi anga Diyavulosi na Sathana, yidzritsrimba kudzringana khume dzra madzana ya malembe.
3 Yigama yidzricukumetela axidziveni, yixipfala yiva yisemendhela ahenhla ka dzrone, akuva dzringahakanganyisi matiko kuko kuhela khume dzra madzana ya malembe. Antsrhaku ka lesvi dzrifanela kuntsrhunxiwa sva nkamanyana.
4 Ndzrigama ndzrivona sviluvelo. Kutani kutsrhamisa vhanu ku svone, vava vanyikiwa ntamu wa kuyavanyisa, anga mahika ya lavatsremiwiki tinhloko hi mhaka ya vumboni bza Yesu ni hi mhaka ya zritu dzra Xikwembu Nkulukumba, lava mfuzri vakaka vangagandzrelanga xihazri xa nhova kumbe xifaniso xa xone nambi kupfumela kubekeliwa xifungu amimombzeni yavu kumbe avokweni dzravu. Kutani vatlhela vahanya vava vafuma na Kriste kudzringana khume dzra madzana ya malembe.
5 (Vafi lavasaliki avatlhelanga vahanya kuko kuhela malembe laya khume dzra madzana.) Loku i kupfuka loka kusungula.
6 A ni njombo, mfuzri axwengile mhunu lwanyikiwaka kupfuxiwa loka kusungula! Lifu dzra vubizri adzri na ntamu ahenhla ka lava, kambe vatava vaprista va Xikwembu Nkulukumba ni va Kriste, nakone vatafuma na yene kudzringana khume dzra madzana ya wa malembe.
7 Kutani loko kuhela khume dzra madzana ya malembe, Sathana atantsrhunxiwa abohelweni dzrakwe,
8 kutani atahuma ayakanganyisa matiko lamanga ku mune wa makhona ya misava, Goge wa Magoge, kumahlengeleta akuva mapfuxa yimpi. Nhlayu yavu yitele kufana ni sava dzra lwandle.
9 Kutani vachololoka ahenhla ka misava hinkwayu, vayima amatlhelweni hinkwawu ya nxaxa wa vhanu va Xikwembu Nkulukumba lava kuxwenga ni ya doropa ledzrizrandzriwaka. Kambe kuxika ndzrilo hi le tilweni wuvaheta.
10 Kutani Diyavulosi, lweyi afaka avakanganyisa, acukumeteliwa ativeni dzra ndzrilo ni marilana, lomu afaka ku li ni xihazri xa nhova ni muprofeta wa madzrimi; kutani vataxanisiwa nhlikanhi ni vusiku hi masiku ni masiku.
11 Kutani ndzrivona xiluvelo xa ntlhohe ni Lweyi atsrhamiki ku xone. Amahlweni kwakwe misava ni tilo afa svitsrutsruma, kungakumiwi mbangu wa kuva svitsrhama ku wone.
12 Kutani ndzrivona vafi, lavakulu ni lavatsrongo, na vayimi amahlweni ka xiluvelo, kutani mabuku mapfuliwa. Kambe kupfuliwa ni buku dzrin’wana, dzringa buku dzra vutomi. Kutani vafi vayavanyisiwa hi minchumu lemitsraliwiki amabukwini hi kuya hi mintizro yavu.
13 Kutani lwandle dzrihumexa vafi lava afaka vali ku dzrone, ni lifu ni Xizra svihumexa vafi lava afaka vali ku svone, kutani vayavanyisiwa ha mun’wemun’we hi kuya hi mintizro yakwe.
14 Kutani lifu ni Xizra svicukumeteliwa ativeni dzra ndzrilo. Tiva dzra ndzrilo i lifu dzra vubizri.
15 Kutani loko mhunu angakumiwanga na atsraliwi abukwini dzra vutomi acukumeteliwa ativeni dzra ndzrilo.