-
Mpfuletelo 2
1 “Tsralela ntsrumi ya bandla dzra le Efesa, uku: Lweyi atameliki tinyeleti ta ntlhanu na tibizri avokweni dzrakwe dzra xinene atlhela afambafamba amakazri ka ntlhanu wa svikhomamotsre na svibizri ali:
2 ‘Ndzramitiva mintizro yaku, ni kutihita kwaku, ni kutiyisela kwaku, ni lesvaku awupfumeli kuhanya ni vhanu va kubiha, ni lesvaku udzringi lavaliki i vapostola, nakuve ahi vone, nakone uvatsrumbulile lesvaku i vahembi.
3 Wene watiyisela, nakone ukumani ni svikazratu svinyingi hi nkonta ya vito dzranga, kambe awukazralanga.
4 Nambitanu, lesvi ndzrikusolaka ha svone hi lesvaku utsrhike lizrandzru ledzri afaka uli nadzru akusunguleni.
5 “‘Xilesvo, dzrimuka lomu uwiki kone, utisola uva uyenca mintizro leyi afaka umiyenca akusunguleni. Loko svinge tanu, ndzritakubuyela ndzrisusa xikhomamotsre xaku ambangwini wa xone, loko ungatisoli.
6 Kambe u ni lexi xindzrinyonxisaka, hi lesvaku, unyenya mintizro ya xikole lexitsravukiki xa Nikolawu, leyi na mine ndzriminyenyaka.
7 Lweyi anga ni tindleve aayingele lesvi moya wusvibzelaka mabandla: Lweyi atakahlula ndzritamupfumelela kuda mihandzru ya muzri wa vutomi, lowunga Paradeyisini dzra Xikwembu Nkulukumba.’
8 “Tsralela ntsrumi ya bandla dzra le Smirna, uku: ‘Lwewa Kusungula ni Lwewa Vugamu’, lweyi afiki atlhela ahanya, ali:
9 ‘Ndzrasvitiva lesvaku waxaniseka ni lesvaku usvelile, kambe u xipfundzri; nakone wazruketeliwa hi lavativitanaka vayuda nakuve ahi vone, i sinagoga dzra Sathana.
10 Ungachave minchumu lemijulaka kukuwela. Lavisa! Diyavulosi ajula kuteka van’we amakazri kwenu avanhingenisa abohelweni akuva n’widzringiwa sviphela, nakone n’witaxaniseka hi khume dzra masiku. Dumbeka kuyatlhasa akufeni, kutani ndzritakunyika ngiyana ya vutomi.
11 Lweyi anga ni tindleve aayingele lesvi moya wusvibzelaka mabandla: Lweyi atakahlula, lifu dzra vubizri dzringatimuyenca nchumu ni wutsrongo.’
12 “Tsralela ntsrumi ya bandla dzra le Pergamu, uku: Lweyi atameliki lipanga dzra kuleha ni dzra kutsremana, dzra kuloteka hala ni hala, ali:
13 ‘Ndzrakutiva lomu utsrhamaka kone, lomu xiluvelo xa Sathana xinga kone; kambe ukhomelela avitweni dzranga, nakone awutsrhikanga kuva mhunu lwapfumelaka ku mine, nambi amasikwini ya Antipa, mboni yanga ya kudumbeka, lweyi angadlayiwa amahlweni kwenu, lomu Sathana atsrhamaka kone.
14 “‘Nambitanu, ndzri ni sva kukazri ndzrikusolaka ha svone, hikusa halanu u ni van’we lavanamazrelaka dondzro ya Balamu, lweyi adondzrisiki Balaki kuphasa vana va Yisrayele hi ntlhamu, akuva vada timhamba ta svithombe ni kuyenca vugangu.
15 Kutani, hi ndlela leyifanaka, na wene u ni lavanamazrelaka dondzro ya xikole lexitsravukiki xa Nikolawu.
16 Xilesvo, tisole. Loko svinge tanu, ndzritakubuyela hi kuhangwesa, ndzritatalwa na vone hi lipanga dzra kuleha ledzrihumaka anon’wini wanga.
17 “‘Lweyi anga ni tindleve aayingele lesvi moya wusvibzelaka mabandla: Lweyi atakahlula ndzritamunyika mana ledzrifihliwiki, nakone ndzritamunyika zribze dzra kubasa, na zribzeni dzra kone kutsraliwi vito ledzrimpsha, ledzri kungeke na mhunu lwadzritivaka handle ka lweyi adzriyamukelaka.’
18 “Tsralela ntsrumi ya bandla dzra le Tiyatira, uku: Ahlaya lesvi N’wana wa Xikwembu Nkulukumba, lweyi anga ni mahlo ya kufana ni langavi dzra ndzrilo ni lweyi minkondzro yakwe mifanaka ni nsuku lowa kuphatima:
19 ‘Ndzramitiva mintizro yaku, ni lizrandzru dzraku, ni lipfumelo dzraku, ni vutizreli bzaku, ni kutiyisela kwaku, ni lesvaku mintizro yaku ya vugamu mitlula leya kusungula.
20 “‘Nambitanu, lesvi ndzrikusolaka ha svone hi lesvaku upfumelela lwiya wansati, Jezebele, lwativitanaka muprofeta, ava adondzrisa malandzra yanga, amawonga akuva mayenca vugangu ni kuda timhamba ta svithombe.
21 Ndzrivi ndzrimunyika nkama wa kutisola, kambe angasvijuli kutisola avugangwini bzakwe.
22 Lavisa! Ndzritamuba hi mavabzi atsrhama na ayetlelile, yene ni lavambuyetaka na yene vataxaniseka svinene, loko vangatisoli amintizrweni yakwe.
23 Kutani ndzritahelisa vanakwe hi lifu, akuva mabandla hinkwawu matasvitiva lesvaku hi mine lwakambaka tinso ni timbilu, kutani ndzritanyika mun’wana ni mun’wana wenu hi kuya hi mintizro yenu.
24 “‘Kambe, ku n’wine vambenyana n’winga Tiyatira, hinkwenu n’wingalandzrikiki dondzro leyi, n’wine lava n’wingativangakiki minchumu ya kuyeta ya Sathana, ndzrili: Andzrijuli kun’wizrwexa ntsrhwalu wun’wana.
25 Kambe khomelelani ku lesvi n’winga nasvu ndzriko ndzritlhasa.
26 Lweyi atakahlula ava abekisa mintizro yanga kuyatlhasa vugamu, ndzritamunyika vuhosi ahenhla ka matiko,
27 nakone atamabzisa hi nhonga ya nsimbi, kutani matapfotlotiwa kufana ni svibza sva vumba, svanga hesvi na mine ndzringanyikisiwa xisvone hi Tatana wanga.
28 Nakone ndzritamunyika nyeleti ya mixo.
29 Lweyi anga ni tindleve aayingele lesvi moya wusvibzelaka mabandla.’