BRX

1   Antsrhaku ka lesvi, ndzriyingela lesvi afaka svitwala ingiki i zritu dzrikulu dzra xitsrhungu lexikulu atilweni, na xibandlukana, xiku: “Haleluya! Huluku, ni lidzrumu, ni ntamu i sva Xikwembu Nkulukumba wezru,

2   hikusa mayavanyisela yakwe i ya xihlayelamfuzri nakone malulamile. Hikuva ayavanyisi nghwavana leyikulu leyingahona misava hi vugangu bza yone, nakone adzrihiseli ngati ya malandzra yakwe leyinga mavokweni ya yone.”

3   Kutani xitsrhungu xiphindha, xiku: “Haleluya! Kutani musi wutlhantukela ahenhla hi masiku ni masiku.”

4   Kutani vakulu lava makume mabizri na mune ni mune wa svivumbiwa lesvihanyaka vawela hansi, vagandzrela Xikwembu Nkulukumba lwatsrhamaka axiluvelweni, vaku: “Amen! Haleluya!”

5   Kutani kuhuma zritu hi le xiluvelweni, dzriku: “Dzrumisani Xikwembu Nkulukumba wezru, hinkwenu malandzra yakwe n’wimuchavaka, lavatsrongo ni lavakulu.”

6   Kutani ndzriyingela lesvi afaka svitwala ingiki i zritu dzra xitsrhungu lexikulu ni sva kufana ni pongwe dzra mati lamanyingi, ni sva kufana ni pongwe dzra kudzruma lokuchavisaka ka tilo, xiku: “Haleluya, hikusa Yehovha Xikwembu Nkulukumba wezru, Lwewa Ntamu Hinkwawu, asunguli kufuma!

7   Ahinyonxeni, hinyonxisisa, himudzrumisa, hikusa muchatu wa Xihambana wutlhasile, na yene nsati wa xone atilulamiselile.

8   Kutani anyikiwi kuyambala linyu ledzra hombe dzra kuphatima ni dzra ntlhohe, hikuva linyu ledzra hombe i mintizro ya kululama ya vhanu va Xikwembu Nkulukumba lava kuxwenga.”

9   Kutani aku ku mine “Tsrala: Va ni njombo lavazrambiwaka ankhubzini wa muchatu wa Xihambana!” Atlhela aku ku mine: “Lawa i mazritu ya xihlayelamfuzri ya Xikwembu Nkulukumba.”

10   Kutani ndzriwela amahlweni ka minkondzro yakwe na ndzrijula kumugandzrela. Kambe aku ku mine: “Tivonele! Ungayence lesvo! Ndzrova nandzrakuloni ntsena ni wa vamakwenu lavabekaka vumboni bza Yesu. Gandzrela Xikwembu Nkulukumba! Hikuva moya wuhuhuteli vuprofeta akuva kubekiwa vumboni bza Yesu.”

11   Kutani ndzrivona tilo na dzripfulekile, kutani lavisani! Afa ku ni hanxi dzra ntlhohe. Kutani lweyi atsrhamiki ku dzrone avitaniwa Lwadumbekaka ni wa Xihlayelamfuzri, nakone ayavanyisa atlhela alwa yimpi hi kululama.

12   Mahlo yakwe i langavi dzra ndzrilo, nakone anhlokweni yakwe ku ni tingiyana letinyingi. A ni vito ledzritsraliwiki ledzri kungeke na mhunu lwadzritivaka handle kwakwe ntsena,

13   nakone ayambali xiyambalu lexihlambiki hi ngati, nakone avitaniwa hi vito ledzriliki “Zritu dzra Xikwembu Nkulukumba”.

14   Nakone afa alandzriwa hi makhandzra atilweni na mali mahanxini ya ntlhohe, na mayambali linyu ledzra hombe dzra kuphatima ni dzra ntlhohe.

15   Nakone anon’wini wakwe kuhuma lipanga dzra kuleha ni dzra kukazriha, lesvaku aba ha dzrone matiko, nakone atamabzisa hi nhonga ya nsimbi. Nakone apfuva mavhinya ya kuhamba vhinyo dzra mahlundzru lamakulu ya Xikwembu Nkulukumba, Lwewa Ntamu Hinkwawu.

16   Nakone axiyambalwini xakwe, ni le ntsrhumbini wakwe, a ni vito ledzritsraliwki, ledzriliki: “Hosi ya Tihosi” ni “Mufumi wa Vafumi”.

17   Ndzritlhela ndzrivona ntsrumi yin’we na yiyimi adambzini, yibandlukana hi zritu ledzrikulu, yiku ku tinyanyana hinkwatu letihahaka amakazri ka tilo: “Buyani n’wihlengeletana, n’witatada xilalelo lexikulu xa Xikwembu Nkulukumba,

18   akuva n’wida nyama ya tihosi ni nyama ya tihosi ta masocha ni nyama ya vhanu lava ntamu ni nyama ya mahanxi ni ya lavatsrhamiki ku wone, ni nyama ya hinkwavu, lavantsrhunxekiki kun’we ni ya malandzra, ni ya lavatsrongo ni ya lavakulu.”

19   Kutani ndzrivona xihazri xa nhova ni tihosi ta misava ni makhandzra ya tone na mahlengeletanile akuva malwa ni lweyi atsrhamiki ahanxini ni khandzra dzrakwe.

20   Kutani xihazri xa nhova xikhomiwa, kun’we ni muprofeta wa madzrimi lweyi afaka ayenca mahlolana amahlweni ka xone, lawa afaka akanganyisa ha wone lavayamukeliki xifungu xa xihazri xa nhova ni lava afaka vagandzrela xifaniso xa xone, vacukumeteliwa na vahahanya, hi vubizri bza vone, ativeni dzra ndzrilo ledzripfuzraka hi marilana.

21   Kambe lavasaliki vadlayiwa hi lipanga dzra kuleha dzra lweyi atsrhamiki ahenhla ka hanxi ledzri afaka dzrihuma anon’wini wakwe. Kutani tinyanyana hinkwatu tixuzra hi nyama yavu.