BRX

1   Kutani ndzriti ndzrilangusa, ndzrovona Xihambana na xiyimi Nhaveni ya Ziyoni, na xi ni khume dzra madzana ya madzana na mune wa madzana ya madzana, na mune wa makume ya madzana lavanga ni vito dzra xone ni vito dzra Tatana wa xone ledzritsraliwiki amimombzeni ya vone.

2   Kutani ndzriyingela pongwe na dzrihuma hi le tilweni dzra kufana ni pongwe dzra mati lamanyingi ni dzra kufana ni kudzruma lokukulu ka tilo. Kutani pongwe ledzri ndzringadzriyingela afa dzrifana ni dzra vachayi va svitsrendzre loko vachaya svitsrendzre svavu.

3   Afa vayimbelela sva kutsrhama ingiki i lisimu ledzrimpsha amahlweni ka xiluvelo ni le mahlweni ka mune wa svivumbiwa lesvihanyaka ni ka vakulu. Nakone afa kunge na mhunu lwakotaka kudondzra lisimu ledzro handle ka lava khume dzra madzana ya madzana na mune wa madzana ya madzana, na mune wa makume ya madzana, lavaxaviwiki amisaveni.

4   Lava hi lava vakaka vangatinyamisanga hi vavasati; hikusa i tinghwendzra letibasiki. Lava hi lava valandzraka Xihambana kwini na kwini lomu xiyaka kone. Vaxaviwi amakazri ka vhanu svanga svizrangana sva Xikwembu Nkulukumba ni sva Xihambana,

5   nakone akukumiwanga madzrimi amilon’wini yavu; ava na xisolo.

6   Ndzrigama ndzrivona yin’wana ntsrumi na yihaha amakazri ka tilo, na yi ni madzrungula lamanene lamangahelikiki akuva yimatwalisa ku lavatsrhamaka amisaveni, ku vhanu va tinhlonge hinkwatu, ni tinxaka hinkwatu, ni tindzrimi hinkwatu, ni matiko hinkwawu,

7   na yihlaya lesvi hi zritu ledzrikulu: “Chavani Xikwembu Nkulukumba, n’wimudzrumisa, hikusa wutlhasile nkama wakwe wa kuyavanyisa. Xilesvo, gandzrelani Lweyi ayenciki tilo ni misava, ni lwandle, ni svihlovo sva mati.”

8   Kutani yin’wana ntsrumi, ya vubizri, yilandzrela, yiku: “Awile! Awile Babilona Lwenkulu, yene lweyi anwisiki vhanu va matiko hinkwawu vhinyu dzra mahlundzru ya vugangu bzakwe!”

9   Kutani kulandzrela yin’wana ntsrumi, ya vuzrazru, yihlaya lesvi hi zritu ledzrikulu: “Loko mhunu agandzrela xihazri xa nhova ni xifaniso xa xone, atlhela ayamukela xifungu xa xone amombzeni wakwe kumbe avokweni dzrakwe,

10   na yene atanwa vhinyu dzra mahlundzru ya Xikwembu Nkulukumba lamachululiwaka na mangatimuliwanga axinwelweni xa vukazri bzakwe, nakone ataxanisiwa hi ndzrilo ni marilana amahlweni ka tintsrumi leta kuxwenga, ni le mahlweni ka Xihambana.

11   Kutani musi wa kuxanisiwa kwavu wutlhantuka hi masiku ni masiku, nakone nhlikanhi ni vusiku avawisi lavagandzrelaka xihazri xa nhova ni xifaniso xa xone ni mun’wana ni mun’wana lwayamukelaka xifungu xa vito dzra xone.

12   Hi la kujulekaka kone kutiyisela ka vhanu va Xikwembu Nkulukumba lava kuxwenga, lavabekisaka svileleto sva Xikwembu Nkulukumba ni lavakhomelelaka alipfumelweni dzra Yesu.”

13   Kutani ndzriyingela zritu dzrihuma atilweni, dzriku: “Tsrala: Va ni njombo vafi lavafelaka Hosini kusukela svosvi! Moya wuli: ‘Ina, avawise amintizrweni yavu leya kubindzra, hikuva mintizro yavu mavalandzra!”

14   Kutani ndzriti ndzrilangusa, ndzrovona tlavi dzra ntlhohe, na lweyi atsrhamiki ku tlavi dzra kone ali wa kufana ni N’wana wa Mhunu, na a ni ngiyana ya gole anhlokweni ni sikela dzra kukazriha svinene avokweni dzrakwe.

15   Kutani kuhumelela ntsrumi yin’wana hi le mbangwini wa kuxwenga wa tempele, na yibandlukana hi zritu ledzrikulu ku lweyi atsrhamiki atlavini, yiku: “Nhingenisa sikela dzraku utsrhovela, hikusa nkama wutlhasile wa kutsrhovela, hikuva ntsrhovelo wa misava wuwupfile.”

16   Kutani lweyi atsrhamiki atlavini acukumetela sikela amisaveni, kutani misava mitsrhoveliwa.

17   Kutani ntsrumi yin’wana yihumelela hi le mbangwini wa kuxwenga wa tempele ledzringa tilweni, na yi ni sikela dzra kukazriha svinene na yone.

18   Kutlhela kuhumelela ntsrumi yin’wana hi le alitarini, na yi ni ntamu wa kulawula ndzrilo. Kutani yibandlukana ku lweyi anga ni sikela dzra kukazriha svinene hi zritu ledzrikulu, yiku: “Nhingenisa sikela utsrema svipha sva mvhinya wa misava, hikuva mavhinya ya yone mawupfile.”

19   Kutani ntsrumi yicukumetela sikela amisaveni, yihlengeleta mavhinya ya misava, yimacukumetela axikamelweni lexikulu xa mavhinya ya mahlundzru ya Xikwembu Nkulukumba.

20   Kutani mavhinya mapfuviwa axikamelweni ahandle ka doropa, kutani kuhuma ngati axikamelweni, ya kuyatlhasa amaton’wini ya mahanxi hi mpfhuka wa kuya ku madzana mabizri na ntlhanu ni mune wa makume ya makilometru na ntlhanu na dzrin’we.