-
Mpfuletelo 11
1 Kutani ndzrinyikiwa lihlanga dzra kufana ni nhonga, na ntsrumi yiku: “Sekeleka upima mbangu wa kuxwenga wa tempele dzra Xikwembu Nkulukumba ni alitari ni lavagandzrelaka ku dzrone.
2 Kambe tsrhika qgeke dzra le handle ka mbangu wa kuxwenga wa tempele; ungadzripime, hikusa dzrinyikiwi va matiko, kutani vatakandzretela doropa dzra kuxwenga kudzringana mune wa makume ya tihweti na tibizri.
3 Kutani ndzritanyika timboni tanga letibizri ntamu wa kuprofeta kudzringana khume dzra madzana na madzana mabizri ni ntlhanu wa mukume na dzrin’we wa masiku na tiyambali masaka.”
4 Timboni leti i minhlwazri mibizri ni svikhomamotsre svibizri lesviyimiki amahlweni ka N’winyi wa misava.
5 Loko mhunu ajula kuvavisa timboni leti, kuhuma ndzrilo amilon’wini ya tone wuheta valala va tone. Kutani hi svosvo titakamudlayisa xisvone mhunu, loko ajula kutivavisa.
6 Ti ni ntamu wa kupfala tilo akuva kungani mpfula andzreni ka masiku lawa tiprofetaka ha wone, nakone ti ni ntamu ahenhla ka mati akuva timandzruluta mava ngati, ni wa kuba misava hi mixaka hinkwayu ya makhombo hi laha tinavelaka ha kone.
7 Kutani loko titava na tihetile vumboni bza tone, xihazri xa nhova lexitlhantukaka hi le xidziveni xitalwa na tone xitihlula, xiva xitidlaya.
8 Kutani mintsrumbu ya tone mitatsrhikiwa axitaratwini xa doropa ledzrikulu ledzri hi kufanekisela dzrivitaniwaka Sodoma na Gibita, lomu Hosi na yone yigongondzreliwiki kone amhandzreni.
9 Kutani vhanu va matiko ni va tinxaka ni tindzrimi ni tinhlonge vatahlalela mintsrumbu yavu kudzringana masiku mazrazru ni hamfu; vangatipfumelela lesvaku mintsrumbu yavu milahliwa axizreni.
10 Kutani lavatsrhamaka amisaveni vatanyonxa hi mhaka ya vone, vaba mavoko; vatazrumelelana ni svihiwa, hikusa vaprofeta lavabizri afa vaxanisa lavahanyaka amisaveni.
11 Kutani antsrhaku ka masiku mazrazru ni hamfu, moya wa vutomi lowupfaka ku Xikwembu Nkulukumba wunhingena andzreni kwavu, kutani vayima hi milenge yavu, kutani nchavu lowukulu wuwela lava vavavoniki.
12 Kutani vayingela zritu ledzrikulu dzripfa atilweni, dzriku ku vone: “Tlhantukelani halenu.” Kutani vatlhantukela atilweni hi tlavi, kutani valala vavavona.
13 Kutani hi nkama wolowo kuhumelela ximbeta lexikulu, kutani kuwa xiyenge xa khume xa doropa; kutani ntlhanu na mabizri wa makume ya madzana ya vhanu vadlawa hi ximbeta lexo, kutani lavasaliki vachava, vadzrumisa Xikwembu Nkulukumba wa tilo.
14 Khombo dzra vubizri dzrihundzrile. Lavisani! Khombo dzra vuzrazru dzrabuya hi kuhangwesa.
15 Kutani ntsrumi ya vuntlhanu na tibizri yichaya xipalapala xa yone. Kutani kuva ni mazritu lamakulu atilweni, maku: “Mfumu wa misava svosvi i Mfumu wa Hosi yezru ni Kriste wa yone, kutani atafuma hi masiku ni masiku.”
16 Kutani vakulu lava makume mabizri na mune lavatsrhamiki amahlweni ka Xikwembu Nkulukumba asviluvelweni svavu vawa hi mimombo yavu vagandzrela Xikwembu Nkulukumba,
17 vaku: “Hakukhensa, wene Yehovha Xikwembu Nkulukumba, Lwewa ntamu hinkwawu, lweyi anga kone ni lweyi afaka ali kone, hikusa uteki ntamu waku lowukulu nakone usunguli kufuma.
18 Kambe matiko mahlundzrukile, ni mahlundzru yaku matlhasile, ni wo nkama waku lowubekisiwiki wutlhasile wa kuva vafi vayavanyisiwa ni wa kuhakela malandzra yaku, vanga vaprofeta, ni vhanu lavaxwengiki, ni lavachavaka vito dzraku, lavatsrongo ni lavakulu, ni wa kuhelisa lavahelisaka misava.”
19 Kutani mbangu wa kuxwenga wa tempele dzra Xikwembu Nkulukumba atilweni wupfuleka, areka dzra xipfumelelanu xakwe dzrivoniwa ambangwini wa kuxwenga wa tempele dzrakwe. Kutani tilo dzrihatima, kutwala ni mazritu; na dzrone tilo dzridzruma, kutlhela kuva ni ximbeta ni xihangu lexikulu.