-
Mpfuletelo 10
1 Kutani ndzrivona ntsrumi yin’wana leya ntamu na yixika he tilweni, na yiyambali tlavi, ni nkwangulatilo anhlokweni ya yone. Kutani vuso bza yone afa bzifana ni dambu, ni milenge ya yone afa mifana ni tinsika ta ndzrilo,
2 na yi ni mukhwepa wa wutsrongo lowu afaka wupfulekile avokweni dzra yone. Kutani yibeka nkondzro wa yone wa xinene alwandle, ni lowa ximatsri amisaveni,
3 kutani yibandlukana hi zritu ledzrikulu svanga hi loko ndzrawu yibonga. Kutani, loko yibandlukana, kutwala mazritu ya kudzruma ka tilo ka ntlhanu na kubizri.
4 Kutani, loko kudzruma ka tilo loka ntlhanu na kubizri kugamile, ndzrijuli kutsrala; kambe ndzriyingeli zritu dzripfa atilweni, dzriku: “Lesvi svihlayiwiki hi kudzruma ka tilo loka ntlhanu na kubizri, svikhiyelele; ungasvitsrale.”
5 Kutani ntsrumi leyi ndzringayivona na yiyimi lwandle ni le misaveni yitlakuxela voko dzra yone dzra xinene atilweni,
6 yifunga hi Lweyi ahanyaka hi masiku ni masiku, lweyi atumbuluxiki tilo ni minchumu leminga ku dzrone, ni misava ni minchumu leminga ku yone, ni lwandle ni minchumu leminga ku dzrone, yiku: “Kungahatihlweliwa.
7 Kambe amasikwini ya kupfuma ka ntsrumi ya vuntlhanu na tibizri, loko yitachaya xipalapala xa yone, xihundla xa Xikwembu Nkulukumba xitahetiseka, lexi angaxitivisa malandzra yakwe, anga vaprofeta.”
8 Kutani zritu ledzri ndzringadzriyingela na dzripfa tilweni dzritlhela dzrikanela na mine, dzriku: “Famba uyateka mukhwepa lowunga vokweni dzra ntsrumi leyiyimiki alwandle ni le misaveni.”
9 Kutani ndzriyela ntsrumi ndzriyaku ku yone: “Ndzrinyike mukhwepanyana lowo.” Kutani yiku ku mine: “Wuteke uwuda, kutani wutabavela andzreni kwaku, kambe anon’wini waku wutatsrokotsra kufana ni vulombe bza tinyonxi.”
10 Kutani ndzriteka mukhwepanyana wolowo avokweni dzra ntsrumi ndzriwuda, kutani anon’wini wanga afa wutsrokotsra kufana ni vulombe bza tinyonxi, kambe loko ndzriwuda, ndzritwa kubava andzreni kwanga.
11 Kutani vaku ku mine: “Svikombela kuva utlhela uprofeta hi matiko, ni vhanu va tinhlonge ni va tindzrimi hinkwatu, ni tihosi leta kutala.”