-
Mintizro 28
1 Antsrhaku ka loko hihulukile, higami hitiva lesvaku xihlale xa kone afa xivitaniwa Malta.
2 Nakone vhanu va kone vahikhomi hi mbilu leyinene ngopfu. Hikusa vatlhaviki ndzrilo vahiyamukela hinkwezru hi malwandla hilesvi afaka kuna mpfula ni lesvi afaka ku ni xizrami.
3 Kutani loko Pawlu azroleli maxwavi ya kutala amacukumetela ndzrilweni, kuhumi xipshahla hi kutwa kuhisa xititsrimbelela avokweni dzrakwe.
4 Kutani loko vhanu va tiko ledzro vavona xihazri lexa nhova na xilengalenga avokweni dzrakwe, vasungula kubzelana, vaku: “Lweyi wanuna hakunene i mudlayi wa vhanu, kutani nambilesvi ahulukiki alwandle, Vululami abzimupfumelelanga kutama ahanya.”
5 Kutani ahlakahla xihazri lexo xa nhova xiwela andzrilweni, angavavisiwi ni kutsrongo.
6 Kambe vone afa valaviseli lesvaku atapfimba kumbe achuka awa, afa kola ni kola. Kambe loko vayimi nkama wa kuleha, vavona lesvaku angahumeleliwanga hi nchumu wa kubiha, vacinci mavonela yavu, vasungula kuhlaya lesvaku Pawlu i xikwembu.
7 Kutani kusuhi ni mbangu lowo afa ku ni matiko lawa afaka malumba mun’we wa hosi ya xihlale, lweyi vito dzrakwe afaka ali Publiyu, lweyi ahiyamukeliki hi malwandla atlhela ahizruzrela akaya kwakwe kudzringana masiku mazrazru.
8 Kutani kuyenceki lesvaku tatana wa Publiyu afa atsrhama na ayetlelile alikukwini na avabziwa hi kuhiseta ka mizri ni kubuyelela. Kutani Pawlu amunhingenela amuhambela xikhongoto, amutlhanteka mavoko, amuhanyisa.
9 Kutani loko kuyenceki lesvo, hinkwavu lavasaliki axihlaleni lava afaka vavabza na vone vayeteteli ku yene avahanyisa.
10 Vhanu lava mfuzri vahiyenceli svihluwa ngopfu hi kuhinyika svihiwa sva kutala, nakone loko hisuka vahilongeleli minchumu leyi afaka hitamivilela hi ndlela.
11 Kutani antsrhaku ka tihweti tizrazru hinhingeni ngalaweni ya kupfa hi le Alexandriya, leyi afaka yiheti vuxika axihlaleni. Ngalawa ya kone afa yi ni xifaniso xa “Vana va Zewusi.”
12 Kutani loko hitlhasi ahlalukwini dzra Sirakusi, hitsrhami kone kudzringana masiku mazrazru;
13 higama hisuka kone hiyatlhasa le Rexju. Kutani antsrhaku ka siku dzrin’we kusunguli kuhunga moya wa le nyingitimu, higama hitlhasa le Putewoli hi siku dzra vubizri,
14 lomu hikumiki vamakwezru. Vone, ke, vahikombeli kutsrhama navu ntlhanu wa masiku na mabizri, higama hisuka hikongoma Roma.
15 Loko vamakwezru va mbangu lowo vayingela ndzrava yezru, vahumi vahitlhangaveta vayatlhasa le Bazara dzra Apiyu ni Mahotela Mazrazru. Loko Pawlu avavona, akhensa Xikwembu Nkulukumba, atiya ni nhlana.
16 Kutani loko hitlhasa Roma, Pawlu apfumeleliwa kutsrhama vusvakwe na a ni socha dzrin’we ledzri afaka dzrimuvonelela.
17 Kutani kuyenceka lesvaku antsrhaku ka masiku mazrazru, avitana vazrangeli va vayuda. Kutiloko vatlhanganile, aku ku vone: “Vavanuna, vamakwezru, mine nambilesvi ndzringayencangakiki nchumu wa kuhambana ni tiko dzrezru, kumbe svihena sva vatatana vezru, ndzrinyiketiwi amavokweni ya varoma svanga mubohiwa le Yerusalema.
18 Kutani loko vandzriyavanyisile, vajuli kundzrintsrhunxa, hikuva afa kunge na xivangelo ku mine xa kuva ndzridlayiwa.
19 Kambe loko vayuda vayala, ndzrisindzriseki kukombela kuyayavanyisiwa hi Khezari, na kunge hi kuva ndzrova ni xa kuzrambela tiko dzranga ha xone.
20 Kutani hi svosvo svindzriyenciki ndzrin’wivitana akuva hivonana, hibula, hikuva lexi ndzrikotaka ndzribohiwa ha xone hi timpencana ndzriyenca lesvi, i mhaka ya dumbo dzra Yisrayele.”
21 Kutani vamuhlamula, vaku: “Hine ahiyamukelanga mapapela hi le Yudeya ya kukanela ha wene, nakone anga kone ni mun’we wa vamakwezru lweyi abuyiki ahidzrungulela kumbe akanela kubiha hi wene.
22 Kambe hivona lesvaku svayampsa hiyingela mavonela yaku hi wene ha bzaku, hikuva kunene lexi hixitivaka hi lesvaku hinkwaku kukaneliwa kubiha hi xikole lexi lexitsravukiki.”
23 Kutani vabekisa na yene siku dzra kuva vayavonana naye, vava vanyingi vamuyela andlwini leyi afaka atsrhama ku yone; avatlhamuxela atlhela abeka vumboni bza kuhelela bza Mfumu wa Xikwembu Nkulukumba, na avabzela minchumu lemikholwisaka mayelanu na Yesu, kusukela ku Nawu wa Moxe kuya ku vaprofeta, na asukela mixweni ayagamela madambzeni.
24 Kutani van’we kunene afa vakholwa lesvi afaka avabzela svone; kambe van’wana afa vangakholwi.
25 Kutani vasuka na vangatwanani hi xivone. Kutani Pawlu ahlaya zritu ledzri: “Moya lowa kuxwenga wuhlayi svone ku vatatana venu hi muprofeta Ezaya,
26 wuku, ‘Famba ku tiko ledzri uyaku: “Kuyingela n’witayingela kambe n’wingatitwisisa, nakone kulangusa n’witalangusa kambe n’wingativona nchumu.
27 Hikuva mbilu ya vhanu lava yitlanyalile, kutani hi tindleve tavu vasvitwela kule, nakone vasvonyi mahlo, hikusa vangachuka vavona hi mahlo yavu kumbe vayingela hi tindleve tavu, vava vatwisisa hi timbilu tavu, vandzruluka, mine ndzrivahanyisa.”’
28 Kutani ke, svitivani hinkwenu lesvaku huluku ledzripfelaka ku Xikwembu Nkulukumba dzrizrumeliwi ku vhanu va matiko; vone, ke, vatayingiseta.”
30 Agama aheta malembe mabizri ya kutala na atsrhama andlwini yakwe ya kuhakela hweti ni hweti, na ayamukela hinkwavu lava afaka vamuyela,
31 na azrezra Mfumu wa Xikwembu Nkulukumba, atlhela adondzrisa mayelanu na Hosi Yesu Kriste hi xixixi hinkwaxu, na ange na xa kumusivela.