BRX

1   Kutani loko kutsremiwi lesvaku hifanela kuwela hiya Italya, vanyiketi Pawlu ni vabohiwa van’we ku ndzruna ya masocha lwavitaniwaka Yulyu, wa xikwata xa Aguxtu.

2   Kutani hinhingena ngalaweni ya Adramitu leyi afaka yijula kusuka yiya mahlalukwini ya xifundzrankulu xa Azya, hitlhava liyendzro, na hili na Arixtarku, mumasedonya wa le Tesalonika.

3   Kutani mundzruku ka kone hitlhasa le Sidoni. Kutani Yulyu akhomi Pawlu hi mbilu ya vumhunu, amupfumelela kuya ku vanghanu vakwe lesvaku vamupfuna.

4   Higamiki hiteketa liyendzro, hifamba hi lwandle na hisizreleliwa hi xihlale xa Xipre, hikusa afa hibiwa hi timheho.

5   Kutani hitsremakanya lwandle ledzrikulu atlhelweni ka Silisya na Pamfilya, hitlhasa hiyima le Mira wa le Lisya.

6   Kutani loko hi li kone, ndzruna ya masocha yikuma ngalawa leyi afaka yipfa he Alexandriya na yiya Italya, yihinhingenisa ku yone.

7   Kutani antsrhaku ka kuheta masiku ya kutala na hiwela hi kunana, hitlhasi le Kinidu hi kukazrateka; kutani loko hivona lesvaku mheho ayihitsrhiki hihundzra, hiweli na hisizreleliwa hi xihlale xa Kreta lexilavisanaka na Salmoni.

8   Higamiki hitluta hi kukazrateka kusuhi ni le nkingeni wa lwandle, hiyatlhasa ku mbangu wa kukazri lomu kuvitaniwaka Mahlaluku Manene, lomu afaka kuli kusuhi ni doropa dzra Lasiya.

9   Kutani afa kuhundzri nkama wa kuhlawa nakone kutani afa svi ni khombo kufamba hi lwandle, hikusa nambi hi nkama wa kutitsrona svakuda wa Siku dzra Dzrivaleliwo afa wuhelile. Xilesvo, Pawlu afa avamamulela,

10   aku: “Vavanuna, ndzrasvivona lesvaku magamu ya liyendzro ledzri matava kuhonekeliwa ni kulahlekeliwa lokukulu, kunge ka mintsrhwalu ntsena ni ngalawa kambe ni ka vutomi bzezru.”

11   Nambitanu, ndzruna ya masocha yikholwi lesvingahlayiwa hi mufambisi ni n’winyi wa ngalawa amatsrhan’wini ya lesvi Pawlu asvihlayiki.

12   Kutani lesvi hlaluku afaka dzringafaneleki kutsrhama ku dzrone hi vuxika, vanyingi vavoni sviyampsa kusuka kone akuva kumbexana vangakota kutlhasa vaheta vuxika le Feniksi, kunga hlaluku dzra Kreta ledzrilangusiki tlhelo dzra n’walunguvuxa ni nyingitimuvuxa.

13   Kutani loko moya wa nyingitimu wuhunganyana, vapimisa lesvaku vatlhasile lomu afaka vaya kone, vatlakuxa nsoma, vatluta kusuhi ni le nkingeni wa Kreta.

14   Kambe na kungasihundzra nkama wungani, moya wa xidzedze lowuvitaniwaka Ewurokilo wuhunga na wuhuma hi le xihlaleni.

15   Kutani wukhoma ngalawa svingakoteki kuyiyenca yikongomana ni moya, hititsrhiketela wuhisusumeta.

16   Kutani hifamba na hisizreleliwa hi xihlale xa xitsrongo lexivitaniwaka Kawda, kambe afa svihikazratela kukhoma xibzatsrhwana xa kulamulela mhangu lexi afaka xikhungiwile.

17   Kambe loko vaxitlakuxetile, vatsrimbeleli ngalawa hi mapindzra akuva yitiya, nakone hi kuchava lesvaku ngalawa yingachuka yikhisa andzreni ka misava ya le Sirtisi, vayehlisi matsranga vasusumetiwa hi moya.

18   Kutani lesvi afaka hibiwa ngopfu hi xidzedze, mundzruku ka kone vasunguli kucukumeta mintsrhwalu.

19   Kutani hi siku dzra vuzrazru, ha bzavu, vacukumeti svitizro sva ngalawa.

20   Kutani loko kuheli masiku manyingi na kungavoneki dambu nambi tinyeleti, na hibiwa hi xidzedze lexikulu, kulavisela hinkwaku ka lesvaku hitahuluka kusunguli kuhela.

21   Kutani antsrhaku ka kuheta nkama wa kuleha na kungadiwi nchumu, Pawlu asekeleka ayima amakazri kwavu, aku: “Vavanuna, n’wine inhaka n’wiyingiseti lesvi ndzrin’wibzeliki svone, n’wingasuki Kreta n’winhingena lwandle. Inhaka n’wingakumanga kuhonekeliwa ni kulahlekeliwa loku.

22   Kambe svosvi ndzrin’witsratsriya lesvaku n’witiya timbilu, hikuva kungatilahleka mhunu ni mun’we makazri kwenu, handle ka ngalawa ntsena.

23   Hikusa vusiku bzobzi ndzrihumeleliwi hi ntsrumi ya Xikwembu Nkulukumba lweyi ndzringa nandzra wakwe ni lweyi ndzrimugandzrelaka,

24   yiku: ‘Ungachave, Pawlu. Ufanela kuyayima amahlweni ka Khezari. Nakone lavisa, Xikwembu Nkulukumba akunyiki hinkwavu lavafambaka hi ngalawa na wene.’

25   Xilesvo, tiyani timbilu, madoda, hikuva ndzrakholwa ku Xikwembu Nkulukumba, lesvaku svitayencekisa xisvoxi ndzribzelisiwiki xisvone.

26   Nambitanu, hifanela kulahleka hiyahumela ku xihlale xa kukazri.”

27   Kutani loko kutlhasi vusiku bza vukhume na mune na hibiwa hi mavimbi le Lwandle dzra Adriya, amakazri ka vusiku vafambisi va ngalawa vasunguli kupimisa lesvaku ingiki vatsrhindzrekeli ku tiko dzra kukazri dzra kuwoma.

28   Kutani vapima kuyeta ka mati, vakuma lesvaku kuyeti mametru ya makume mazrazru ni ntlhanu na dzrin’we, kutani loko vafambile mpfhukanyana, vatlhela vapima kuyeta ka mati, vakuma mametru ya makume mabizri ni ntlhanu na mabizri.

29   Kutani hi kuchava lesvaku hingachuka hiyaba mintsrundzrulwini ya mabze, vacukumetela mune wa tinsoma anyalwini, vanavela ingiki bzingoxa hi kuhangwesa.

30   Kambe loko vafambisi va ngalawa vadzringisa kutimela vasiya ngalawa hi kuxikisa xibzatsrhwana xa kulamulela mhangu alwandle, na vayenca ingiki hi loko vojula kutsrhiketela tinsoma hi le nhlokweni ka ngalawa,

31   Pawlu aku ku ndzruna ya masocha ni le ku masocha: “Loko lava vangatsrhami la ndzreni ka ngalawa, n’wingatihuluka.”

32   Kutani masocha matsrema mapindzra ya xibzatsrhwana xa kulamulela mhangu maxitsrhika xiwa.

33   Kutani ankama lowu bziyaka kuxeni, Pawlu atiyisa hinkwavu hi mazritu lesvaku vada svakuda, aku: “Namunhla i siku dzra vukhume na mune na n’wili kulanguseleni, na n’wingadi svakuda ni svitsrongo.

34   Kutani ndzran’witsratsriya ndzrili danani svakuda; hikusa svitan’witiyisa n’wihanya, hikuva nambi nsisi ni wun’we wungatilova atinhlokweni tenu.”

35   Loko aheti kuhlaya lesvo, ateka kati, akhensa Xikwembu Nkulukumba amahlweni kwavu hinkwavu, adzrikhemelela, asungula kuda.

36   Kutani loko hinkwavu vakumi ntamu, na vone vasunguli kuda svakuda.

37   Kutani hinkwezru lava afaka hili abzatsrhwini afa hihamba madzana mabizri ni ntlhanu wa makume na mabizri na ntlhanu ni mun’we wa vhanu.

38   Kutani loko vadile vaxuzra, vavevukisi ngalawa hi kucukumeta tizriku alwandle.

39   Kutani loko bzixile, afa vangavoni tiko dzra kuwoma, kambe vavoni nsongo kusuhi ni sava kutani vatibzela kususumeta ngalawa akuva yikhisa kone, loko svikoteka.

40   Kutani vatsrema tinsoma vatitsrhiketela tipela lwandle, na hi nkama wun’we vatlhantlhelela mapindzra ya svihindzrulo; kutani vagwimba ntsranga dzra le phambeni dzritakhoma moya, vatlhasa saveni.

41   Kutani loko vatlhasa lomu mati matlhanganaka kone alwandle, ngalawa yikhomiwa hi misava, kutani nhloko yiyima mbangu wun’we, yingapfumeli kusuka, kuvona nyalu ya ngalawa yisungula kutsrhoviwa hi mavimbi.

42   Kutani masocha matwanana kudlaya vabohiwa akuva ni mun’we angakoti kuhlambeta atsrutsruma.

43   Kambe lesvi ndzruna ya masocha afaka yijula kuhuluxa Pawlu, yivatsimbi kuyenca lesvi afaka vasvipimisa, yileleta lavakotaka kuhlambeta lesvaku vapfana vapela lwandle vayatlhasa ku misava ya kuwoma,

44   kutani lavasaliki valandzra he ntsrhaku, van’we na vali ku mapulangu, van’wana na vali ku minchumu lemingakhatluka ku ngalawa. Kutani hinkwavu vatlhasisa xilesvo amisaveni ya kuwoma na vahanya.