BRX

1   “Vavanuna, vamakwezru, ni vatatana, yingelani kutiyimelela kwanga svosvi.”

2   Kutani, loko vayingela lesvaku afa akanela navu hi lidzrimi dzra xiheberu, vahundzrisa kumiyela vakutititi. Kutani aku:

3   “Mine ndzri muyuda. Ndzripsaliwi le Tarsu wa Silisya, kambe ndzridondzri xikole adoropeni dzrodzri ahansi ka Gamaliyele, laha ndzridondzrisiwiki kulondzrisa svinene Nawu wa vatatana, nakone ndzrihisekela Xikwembu Nkulukumba xilesvi na n’wine hinkwenu n’wihisekisaka xisvone namunhla.

4   Lavafambaka hi Ndlela leyi ndzrivaxanisi kuyatlhasa akufeni, ndzrikhoma vavanuna ni vavasati ndzrivapeta mabohelweni,

5   svanga hesvi muprista lwenkulu ni huvo hinkwayu ya vakulu vangandzriseketelaka ha kone. Nakone vandzrinyiki mapapela ya kuya ku vamakwezru va le Damaxku, kutani afa ndzrili ndleleni ya kuyabuyisa vhanu va kone na vatsrimbiwile laha Yerusalema akuva vakhatisiwa.

6   “Kambe ankama lowu afaka ndzrili ndleleni, loko ndzriku ndzratsrhindzrekela Damaxku, hi nkama wa dina, hi xichuketa kohumelela livaningo ledzrikulu hi le tilweni dzriphatima hinkwaku amatlhelweni kwanga.

7   Kutani ndzriwela hansi, ndzriyingela zritu dzriku ku mine: ‘Sawlu, Sawlu, undzrixanisela yini?’

8   Kutani ndzrihlamula ndzriku: ‘Hi wene mani, Hosi?’ Kutani zritu dzrindzriyangula, dzriku: ‘Hi mine Yesu wa Nazareta, lweyi umuxanisaka.’

9   Kutani lava afaka vafamba na mine, kudzrivona vadzrivonile livaningo, kambe zritu dzra lweyi afaka avulavula na mine avadzriyingelanga.

10   Kutani ndzriku: ‘Xana ndzrifanela kuyenca yini, we Hosi?’ Kutani Hosi yiku ku mine: ‘Sekeleka uya Damaxku; utabzeliwa kone hinkwasvu lesvibekisiwiki akuva usviyenca.’

11   Kambe lesvi afaka ndzringahakoti kuvona nchumu hi mhaka ya kuphatima ka livaningo ledzro, ndzritlhasi Damaxku na ndzroyenca hi kukhungisiwa hi lava afaka vali na mine.

12   “Kutani mun’we wanuna, lwavitaniwaka Ananiya, lwahanyaka hi vukhongoti hi kulandzra Nawu ni lwativiwaka hi lesvinene hi vayuda hinkwavu lavahanyaka kone,

13   andzribuyelile ayima atlhelweni kwanga, aku ku mine: ‘Sawlu, makwezru, tlhela uvona!’ Kutani ndzrimuvona hi nkama wolowo.

14   Agama aku: ‘Xikwembu Nkulukumba wa vatatana vezru akuhlawulile akuva utiva kuzrandzra kwakwe ni kuva uvona Mululami ni kuyingela zritu dzra nomu wakwe.

15   Hikusa amahlweni ka vhanu hinkwavu utava mboni yakwe ya minchumu leyi umivoniki ni kumiyingela.

16   Kutani wahahetela yini nkama? Sekeleka, ubabatisiwa, uhlampsa svidoho svaku svisuka hi kuvitana vito dzrakwe.’

17   “Kutani loko ndzritlheleli Yerusalema, hi nkama lowu afaka ndzrili kazri ndzrikhongota atempeleni, ndzriweli vuzrongweni bza xivoniso,

18   ndzrivona Hosi na yiku ku mine: ‘Hangwesa uhuma Yerusalema, hikusa vangatiyamukela vumboni bzaku mayelanu na mine.’

19   Kutani ndzriku: ‘Hosi, kambe na vone vasvitiva lesvaku afa ndzrihamba ndzrikhomisa ndzritlhela ndzriyevula xikhumba hi minkhavi lavapfumelaka ku wene amasinagogeni hinkwawu.

20   Mfuzri ankama lowu ngati ya Stefano, mboni yaku, afaka yihalatiwa, mine afa ndzreyima tlhelweni ndzrisviseketela, na ndzrivonelela mijansi ya lava afaka vamudlaya.’

21   Kambe Hosi yiti ku mine: ‘Famba, hikusa ndzritakuzrumela ku vhanu va matiko lavanga kule.’”

22   Kutani vamuyingiseta kuyatlhasa ku zritu ledzri. Vagama vatlakuxa mazritu yavu, vaku: “Mususani amisaveni lweyo, hikuva angafaneliwi hi kuhanya!”

23   Kutani ankama lowu vabandlukanaka, na vacukumetela mijansi yavu ahenhla, vatsrutsrusela ntsrhuzri ahenhla,

24   hosi ya masocha yileleta lesvaku Pawlu anhingenisiwa agoveleni dzra masocha, yiva yiku afanela kuthethisiwa na akwapiwa hi ntshilana, akuva yitakota kutiva lexi afaka xivayenca vabandlukana amahlweni ka Pawlu.

25   Kambe loko vamulata na vamutsrimbile akuva vamukwapa, Pawlu aku ku ndzruna ya masocha leyi afaka yiyimi kolahu: “Nawu wasvipfumelela kukwapa mhunu lwanga muroma na angasitsremeliwa xikhatiso xa kone hi muyavanyisi kee?”

26   Kutani, loko lwewa ndzruna ya masocha ayingela lesvo, asuka ayakanela ni lwewa hosi ya masocha, ayamutivisa, aku: “Utayenca yini kee, lesvi mhunu lweyi anga muroma?”

27   Kutani hosi ya masocha yitsrhindzrekela, yiku ku Pawlu: “Hingandzribzela, u muroma wene?” Aku: “Ina.”

28   Lwe wa hosi ya masocha ahlamula aku: “Mine svindzriduleli ngopfu svinene kuxava mfanelo ya kuva muroma.” Kambe Pawlu aku: “Kambe mine ndzrebelekiwa na yone.”

29   Kutani lava afaka vajula kumuthethisela na vamuba hi ntshilana vasuka vamusiya. Kutani hosi ya masocha yichava hilesvi yitiviki lesvaku i muroma ni lesvi afaka yimutsrimbi hi timpencana.

30   Kutani mundzruku ka kone, hi kujula kutivisisa ha hombe lesvi vayuda afaka vamulumbeta svone, yimuntsrhunxa, yileleta lesvaku vaprista lavakulu ni Huvo hinkwayu ya Vayuda vahlengeletana. Kutani yibuyisa Pawlu yimuyimisa amakazri kwavu.