-
Mintizro 2
1 Kutani loko kutlhasi siku dzra Nkhuvu wa Pentekoxta, hinkwavu afa vahlengeletani kun’we ambangu wun’we.
2 Kutani hi xichuketa kuhuma pongwe hi le tilweni, dzra kufana ni kuhunga ka moya wa xidzedze, wutata yindlu hinkwayu leyi afaka vatsrhami ku yone.
3 Kutani kuhumelela tindzrimi amahlweni kwavu ta kuyenca ingi i ta ndzrilo, tiyavana tigama titsrhama ahenhla ka mun’wana ni mun’wana wa vone,
4 kutani hinkwavu vatala hi moya lowa kuxwenga vasungula kuvulavula hi tindzrimi timbeni, xilesvi moya afaka wuvanyikisa xisvone kutikanela.
5 Kutani afa ku ni vayuda lava afaka vatsrhama Yerusalema, vanga vavanuna lavatinyiketeliki vukhongotini lava afaka vahuma amatikweni hinkwawu lamanga hansi ka tilo.
6 Kutani loko mpfumawulu lowo wutwalile, kuhlengeletana vhanu vanyingi svinene, na vadzolonganeki miyanakanyu, hikusa mun’wana ni mun’wana afa avayingela na vakanela lidzrimi dzrakwe.
7 Nakone afa vapfilunganyekile vatlhela vahlamala, vaku: “He n’wine! Lava hinkwavu vakanelaka ahi vagalileya?
8 Kutani ke, svikotekisa kuyini kuva mun’wana ni mun’wana wezru ayingela lidzrimi dzrakwe dzra mapsaliwa?
9 Vapartya, vamede ni vaelami; ni lavahanyaka Mezopotamya, Yudeya Kapadosya, Pontu ni le xifundzrankulu xa Azya,
10 Frijya na Pamfilya, Gibita ni miganga ya le Libya kusuhi na Sireni; ni vayeni lavataka hi le Roma, vayuda ni lavanhingenisiwiki ku xiyuda;
11 vakreta; ni vaarabi— hivayingela na vakanela hi mintizro ya Xikwembu Nkulukumba leya kuhlamalisa hi tindzrimi tezru.”
12 Kutani hinkwavu vatala hi kuhlamala vatlhela vadzolonganeka tinhloko, kutani vavutisana, vaku: “Svijula kuhlaya yini lesvi?”
13 Kambe vambeni vavampfhava, vaku: “Votwa vhinyo dzra kutsrokotsra vangadzrinwa kutlula mpimu.”
14 Kambe Petrosi asekeleka kun’we ni lava khume na mun’we akanela navu hi zritu dzra kutlakuka, aku: “Vavanuna va Yudeya, na n’wine hinkwenu n’witsrhamaka Yerusalema, tivisisani mhaka leyi, n’wizreyela ndleve mazritu yanga.
15 Hikusa vhanu lava avapopsanga, kuhambana ni lesvi n’wipimisaka svone, hikuva svosvi i wora dzra vuntlhanu na mune wa mixo.
16 Kuhambana ni svosvo, lesvi hi lesvi svingahlayiwa hi muprofeta Yowele, aku:
17 ‘Xikwembu Nkulukumba ali: “Kutani amasikwini ya vugamu, kutayenceka lesvaku ndzritachulula moya wanga ahenhla ka nyama hinkwayu, kutani vanenu va xinuna ni va xisati vataprofeta, ni majaha yenu matavonisiwa lesvahatakayenceka, ni sviduhwati svenu svitavonisiwa vuprofeta hi milozro,
18 nambi malandzra yanga ya xinuna ni ya xisati ndzritachulula moya wanga ahenhla ka wone amasikwini lawo, kutani mataprofeta.
19 Nakone ndzritahumexa svihlamaliso ahenhla atilweni ni mahlolana ahansi amisaveni—ngati ni ndzrilo ni hunguva ya musi.
20 Dambu dzritandzruluka munyama na yone hweti yitandzruluka ngati na kungasitlhasa siku ledzrikulu ni ledzringadzrivalekiki dzra Yehovha.
21 Kutani mani na mani lwavitanaka vito dzra Yehovha atahuluxiwa.”
22 “Vavanuna va Yisrayele, yingelani mazritu lawa: Yesu wa le Nazareta avi mhunu lweyi angakombekisiwa ku n’wine hi Xikwembu Nkulukumba hi mintizro leya ntamu ni svihlamaliso ni mahlolana, lesvi Xikwembu Nkulukumba asviyenciki ha yene amakazri kwenu, svanga hesvi na n’wine n’wisvitivaka ha kone.
23 Hi kungu dzra Xikwembu Nkulukumba ledzribekisiwiki ni vusvikoti bzakwe bza kutiva minchumu na mingasiyenceka, adlayisiwile hi mavoko ya vhanu va kubiha, n’wiva n’wimugongondzrela amhandzreni, n’wimudlaya.
24 Kambe Xikwembu Nkulukumba amupfuxile hi kumuhumexa ku svivavu sva lifu, hikusa afa svinge na kukoteka akuva akhomiwa hi dzrone.
25 Hikuva Davhida ahlaya lesvi ha yene: ‘Aphambeni kwanga, ndzritsrhama na mahlo yanga ndzrimabeki ku Yehovha, hikuva ale xineneni xanga, akuva ndzringachuki ndzritsrekatsrekisiwa.
26 Xilesvo, mbilu yanga yinyonxile ni lidzrimi dzranga dzritsrhavi ngopfu svinene. Nakone nyama yanga yitatsrhama na yi ni kudumba;
27 hikusa ungatitsrhika hika dzranga Xizreni, nambi kutsrhika mhunu waku lwaxwengiki avona kubola.
28 Undzritivisi tindlela ta vutomi; utandzritata hi kutsrhava lokukulu amahlweni kwaku.’
29 “Vavanuna, vamakwezru, svapfumeleliwa kuvulavula na n’wine hi nhloko ya ndangu Davhida na ndzringatilumalumi, lesvaku afile atlhela alahliwa, mfuzri xizra dzrakwe dzri na hine kutatlhasa ni namunhla.
30 Hikusa lesvi afaka ali muprofeta ni lesvi asvitiviki lesvaku Xikwembu Nkulukumba afa amufungelile hi kuhlambanya aku mun’we wa vana vakwe afa atabekiwa axiluvelweni xakwe,
31 asvivoni na svehe kule ava avulavula hi ku kupfuxiwa ka Kriste, lesvaku angatsrhikiwanga Xizreni, nambi nyama yakwe ayivonanga kubola.
32 Yesu wa kone, Xikwembu Nkulukumba amupfuxile akufeni, kunga lesvi hinkwezru laha hinga timboni ta svone.
33 Kutani ke, lesvi atlakuxeliwiki axineneni xa Xikwembu Nkulukumba ni lesvi ayamukeliki ku Tatana lesvingadumbisiwa, anga moya lowa kuxwenga, achululi lesvi n’wisvivonaka ni kusviyingela.
34 Hikuva Davhida angatlhantukelanga amatilweni, kambe yene hi ntshima ali: ‘Yehovha ati ku Hosi yanga: “Tsrhamisa axineneni xanga,
35 ndzriko ndzribeka valala vaku vava vunalavutelo bza minkondzro yaku.”’
36 Xilesvo, yindlu hinkwayu ya Yisrayele ayisvitive hakunene lesvaku Xikwembu Nkulukumba amuyenci Hosi ni Kriste, ye Yesu lweyi n’wine n’wingamugongondzrela amhandzreni.”
37 Loko kutani vayingela lesvo, vatlhaveka ambilwini, vaku ku Petrosi ni vapostola lavambeni: “Vavanuna, vamakwezru, hifanela kuyenca yini?”
38 Petrosi aku ku vone: “Tisolani, mun’wana ni mun’wana wenu ababatisiwa hi vito dzra Yesu Kriste akuva n’widzrivaleliwa svidoho svenu, kutani n’witayamukela nyiko ya moya lowa kuxwenga.
39 Hikuva xidumbiso lexi i xenu ni vanenu, ni hinkwavu lavanga kule, hinkwavu lava Yehovha, Xikwembu Nkulukumba wezru, atakavavitana vaya ku yene.”
40 Kutani, hi kutizrisa mazritu man’wana ya kutala, avabekela vumboni hinkwabzu, na avatsratsriya, aku: “Hulukani ku lixaka ledzri dzra kusomboloka.”
41 Xilesvo, lava kunene vayamukeliki zritu dzrakwe vababatisiwile; kutani hi siku ledzro kuyengeteleka vhanu va kujula kuva makume mazrazru ya madzana.
42 Kutani afa vakhinyela adondzrweni ya vapostola, ni ka kutlhangana, ni kuda kun’we, ni kuhambeni ka svikhongoto.
43 Kutani vhanu hinkwavu vatala hi kuchava; nakone afa kuyenceka svihlamaliso ni mahlolana laya kutala hi kola ka vapostola.
44 Kutani hinkwavu lavandzrulukiki vapfumeli afa vatsrhama ambangu mun’we, vayavelana hinkwasvu,
45 nakone afa vaxavisa masimu yavu ni minchumu yavu vayavelana ni hinkwavu, hi kuya hi lesvi mun’wana ni mun’wana afaka asvivilela.
46 Nakone siku ni siku afa vakhinyela ka kukumeka atempeleni hi vumun’we, vada kun’we amakaya ya kuhambanahambana, vadelana svakuda svavu na vanyonxile nakone na svisukela mbilwini,
47 na vadzrumisa Xikwembu Nkulukumba vatlhela vanyonxeliwa hi vhanu hinkwavu. Kutani siku ni siku Yehovha afa aya mahlweni hi kuvayengetelela lava afaka vaya akuhuluxiweni.