BRX

1   Kutani na Apolo ehe Korinte, Pawlu ahundzra hi miganga ya le xikazri, afulamela Efesa, atlhasa akuma van’we vadondzrisiwa va kukazri,

2   aku ku vone: “Xana n’wine n’wiwuyamukelile moya lowa kuxwenga ankama lowu n’wingandzruluka vapfumeli?” Kutani vamuhlamula, vaku: “Hine, nesvaku ku ni moya lowa kuxwenga ahingisviyingela.”

3   Kutani aku: “Kutani ke, n’wibabatisiwi hi babatiso dzrini?” Vaku: “Hi babatiso dzra Yohani.”

4   Pawlu aku: “Yohani ababatisi hi babatiso dzra kukomba kutisola, na abzela vhanu lesvaku vafanela kupfumela ku lweyi afaka ahabuya antsrhaku kwakwe, anga Yesu.”

5   Vonasviyingela, vobabatisiwa hi vito dzra Hosi Yesu.

6   Kutani loko Pawlu avatlhanteka mavoko, moya lowa kuxwenga wuxika ahenhla kwavu, vasungula kuvulavula hi tindzrimi ni kuprofeta.

7   Kutani hinkwavu afa vajula kuva khume na vabizri wa vavanuna.

8   Agama anhingena asinagogeni, lomu ahetiki tihweti tizrazru na avulavula hi xixixi, na anyikela tidondzro, abeka timhaka letikholwisaka mayelanu ni Mfumu wa Xikwembu Nkulukumba.

9   Kambe loko vatiwomisi tinhloko vayala kupfumela, vava vasandzra Ndlela leyi amahlweni ka xitsrhungu, asuka avasiya, ateka vadondzrisiwa hi tlhelo, ayavadondzrisa siku ni siku andzreni ka xikole xa Tiranu.

10   Lesvo svitami sviyenceka hi malembe mabizri, lakakuva hinkwavu vayuda ni vagrika lava afaka vatsrhama ku xifundzrankulu xa Azya vayingela zritu dzra Hosi.

11   Nakone Xikwembu Nkulukumba afa ayenca mahlolana ya kuka mangatolovelekanga hi voko dzra Pawlu,

12   lakakuva nambi svintuzrwana ni mavhentali lesvi afaka svikhumbi mizri yakwe, loko sviyisiwa ku timbabzi, mavabzi ya kone afa mosuka, ni mimoya ya kubiha mihuma.

13   Kambe vayuda van’we lava afaka vafambafamba vahlongola mademona na vone vadzringisi kutizrisa vito dzra Hosi Yesu ahenhla ka lava afaka va ni mimoya ya kubiha, vaku: “Ndzrili huma hi vito dzra Yesu lweyi Pawlu amuzrezraka.”

14   Kutani afa ku ni ntlhanu wa vana va majaha na vabizri va mun’we wa muprista lwenkulu wa muyuda lwavitaniwaka Skevha lava afaka vayenca lesvo.

15   Kambe moya wa kubiha wuvahlamula, wuku: “Yesu ndzramutiva, na ye Pawlu, ndzramuvona; kambe n’wine, hi n’wine vamani?”

16   Kutani mhunu lweyi afaka a ni moya wa kubiha atlula awela henhla kwavu, avawisa hinkwavu, avahlula, lakakuva vaphonyoka vahuma andlwini leyo hi kutsrutsruma na vangayambalanga nchumu, na vatikundzrumulile vakuzuu hi ngati!

17   Lesvo svitibziwi hi vayuda ni vagrika hinkwavu lava afaka vatsrhama le Efesa; kutani hinkwavu vaweliwa hi nchavu, vito dzra Hosi Yesu dzriya mahlweni hi kukulisiwa.

18   Kutani vanyingi va lavandzrulukiki vapfumeli afa vabuya vatihlaya, vadzrungula minchumu leyi afaka vahamba vamiyenca.

19   Nakone vanyingi va lava afaka vayenca sva masalamusi vabuyisi mabuku lawa afaka vatizra ha wone vamahisa amahlweni ka hinkwavu. Kutani vankonta mali leyi mayitekiki, vakuma lesvaku afa mateki ntlhanu wa madzana ya madzana ya macheleni ya silivhela.

20   Kutani zritu dzra Yehovha dzriya dzrikula hi ntamu, dzrihlula.

21   Kutani loko kuyenceki lesvo, Pawlu aboha amoyeni wakwe kuhundzra hi le Masedonya ni le Akaya, agama aya Yerusalema, aku: “Loko ndzriyile kone, kujuleka ndzriyatlhasa ni le Roma.”

22   Kutani azruma vabizri va lava afaka vamutizrela, kunga Timotewu na Eraxtu, vaya Masedonya, kambe yene asala atsrhama nkamanyana le xifundzrankulu xa Azya.

23   Kutani ankameni lowo kupfuka dzolonga ledzrikulu hi mhaka ya Ndlela leyi.

24   Hikuva mun’we wanuna lwavitaniwaka Demetru, lweyi afaka atizra hi silivhela, lweyi afaka ahamba svitempelana sva silivhela sva Aritimiza, afa ayenca lesvaku vahambi va svithombe vakuma bindzru ledzrikulu.

25   Yene, ke, avahlengeleta hinkwavu ni vambeni lava afaka vayenca ntizro wa kufana, aku: “Madoda, n’wasvitiva n’wine lesvaku vukosi bzezru bzipfela ku bindzru ledzri.

26   Kutani n’wasvivona nakone n’wasviyingela lesvaku ahi lomu Efesa ntsena kambe hingaku hinkwaku lomu ndzreni ka xifundzrankulu xa Azya, lweyi valiki hi Pawlu akholwisi vhanu va kutala ava avajikisa, aku svikwembu sva kuhambiwa hi mavoko ahi svikwembu.

27   Nangweso, mhaka yikulu ahi ntsena lesvi ntizro wezru wunga khombzeni dzra kuvoniwa na wunge wa nchumu, kambe hi lesvi ni dzro tempele dzra xikwembu xezru lexikulu, mamana Artimiza, dzritakavoniwa na dzringe dzra nchumu, kutani lweyi agandzreliwaka hinkwaku lomu ndzreni ka xifundzrankulu xa Azya ni le misaveni hinkwayu asala na angehe na lisima.”

28   Kutani loko vayingela lesvo, vatala hi mahlundzru, vabandlukana vaku: “I nkulu Artimiza wa vaefesa!”

29   Kutani doropa hinkwadzru dzritala hi nkintsrinkintsri, kutani vhanu hinkwavu vatsrutsruma vayahlengeletana andlwini ya mintlangu, na vakokakoka Gayu na Arixtarku, vanga vamasedonya lava afaka vafambafamba na Pawlu.

30   Kambe Pawlu afa ajula kuyanhingena amakazri ka xitsrhungu, kambe vadondzrisiwa avamutsrhikanga.

31   Nakone nambi hi van’we va vafambisi va minkhuvu ni mintlangu ya tiko lava afaka vali vanghanu vakwe vamuzrumeleli zritu, vamutsratsriya lesvaku angadzringisi kuyanhingena andlwini ya mintlangu.

32   Xilesvo, van’wana nakunene afa vabandlukana vahlaya lesvi na vambeni vahlaya svimbenyana; hikuva xitsrhungu afa xidludleki nhloko; nakone kutala ka vhanu afa vangaxitivi ni lexi vangahlengeletanela xone.

33   Kutani vahumexa Alexandre amahlweni ka xitsrhungu, na vayuda vamususumetela. Kutani Alexandre akombela vhanu hi voko akuva vamiyela, hikusa afa ajula kutiyimelela amahlweni ka xitsrhungu.

34   Kambe loko vasvivonile lesvaku i muyuda, hinkwavu vabandlukana kudzringana kusuhi ni mawora mabizri, na vaku: “I nkulu Artimiza wa vaefesa!”

35   Kutani matsralana wa doropa ahuma azrulisa xitsrhungu, aku: “Vavanuna va le Efesa, kone i mani mhunu lweyi angasvitivikiki lesvaku doropa dzra vaefesa hi dzrone dzribekisaka tempele dzra Artimiza lwenkulu, ni xifaniso lexi xekeyenca hi kuwa hi le tilweni?

36   Lesvi timhaka leto tingeke na kukanetiwa hi mhunu, kujuleka n’wizrula, n’wingayenci nchumu hi magugu.

37   Hikusa n’wibuyisi vavanuna lava, nakuve ahi vatlhanyi va matempele nakone ahi vazruki va xikwembu xezru.

38   Kutani, loko kunene Demetru ni vahambi va svikhelekedana lavanga naye va ni mhaka leyi vaholovaka ha yone ni mhunu wa kukazri, ma kone masiku ya kuthetha timhaka ahubzeni, nakone svi kone sviyandla sva hosi andzreni ka xifundzrankulu. Avafambe vayazrambelana kone!

39   Kambe loko n’wijula svin’wana sva kutlula lesvi, svifanela kutsremiwa anhlengeletanwini hi kulandzra nawu.

40   Hikusa kunene hi le khombzeni dzra kuzrwexiwa nandzru wa lesvaku hipfukela vuhosi hi mhaka ya lesviyencekiki namunhla, hikusa axi kone xivangelo lexi hitakakota kutlhamuxela ha xone mpfilumpfilu leyi hinkwayu.”

41   Kutani loko ahlayi lesvo, ahangalasa xitsrhungu lexi afaka xihlengeletanile.