-
Mintizro 17
1 Kutani vahundzra hi Amfipoli ni le Apolonya, vatlhasa Tesalonika, lomu afaka ku ni sinagoga dzra vayuda.
2 Kutani tanihi ntolovelo wakwe, Pawlu avanhingenela, avonisana na vone hi Matsralwa kudzringana masavata mazrazru,
3 na avatlhamuxela atlhela akombisa hi tindzrimana lesvaku afa svijulekile kuva Kriste axaniseka agama apfuka akufeni, aku: “Yesu lweyi ndzrin’wibzelaka timhaka takwe hi ye Kriste.”
4 Kutani, van’we va vone vapfumela, vatitlhanganisa na Pawlu na Silasi, kufana ni xitsrhungu xikulu xa vagrika lavagandzrelaka Xikwembu Nkulukumba, ni nhlayu yikulunyana ya vavasati lavachavisekaka.
5 Kambe, lesvi afaka vatali hi vukwele, vayuda vateki vavanuna van’we va kubiha lava afaka vatsrhama hi mavoko mabazara vavahlengeleta vahamba xitsrhungu, vapfuxa mpfilumpfilu adoropeni. Kutani vadumela yindlu ya Yasoni na vajula kuhumexa Pawlu na Silasi vavayisa avhanwini.
6 Loko vatlhasa vakuma lesvaku ava kone, vakokakoka Yasoni ni van’we va vamakwezru vavayisa ku vafumi va doropa na vabandlukana, vaku: “Vhanu lavadzolonganisiki misava vatlhasi ni lomu kwezru,
7 kutani Yasoni avazruzrelile akaya kwakwe. Nakone vhanu lava hinkwavu vayenca sva kuhambana ni svileleto sva Khezari, na vaku ku ni hosi yin’wana, anga Yesu.”
8 Loko vayingela lesvo, vhanu ni vafumi va doropa vatuvika.
9 Kambe vagami vateka mali ya kukhomisa ha yone ku Yasoni ni lavan’wana, vavatsrhika vafamba.
10 Kutani hi kuhangwesa, ni vusiku, vamakwezru vazrumela Pawlu na Silasi le Bereya. Vatlhasa vanhingena asinagogeni dzra vayuda.
11 Kutani lava afa vapfuleki miyanakanyu svinene kutlula va le Tesalonika, hikuva vayamukeli zritu hi tozra ledzrikulu, na vakambisisa Matsralwa siku ni siku akuva vavona lesvaku timhaka leti vabzeliwiki tone titsrhamisisi xisvosvo hakunene.
12 Xilesvo, vanyingi va vone vandzruluki vapfumeli, kufana ni nhlayu leyikulunyana ya vavasati va vagrika lavachavisekaka ni ya vavanuna.
13 Kambe loko vayuda va le Tesalonika vativi lesvaku Pawlu azrezra zritu dzra Xikwembu Nkulukumba ni kole Bereya, vabuyi vahlohlotela svitsrhungu, vasvihambisa pongwe.
14 Kutani, hi kuhangwesa, vamakwezru vateka Pawlu vamuyisa alwandle, kusala Silasi na Timotewu le Bereya.
15 Kambe lava vaheleketiki Pawlu vamufambisi kuyatlhasa le Atena, vagama vatlhela loko vayamukeli zritu dzra lesvaku kujuleka kuva Silasi na Timotewu vayakumana naye hi xihatla.
16 Kutani na Pawlu ahavayimela le Atena, moya wakwe wuhlundzruka andzreni kwakwe hi kuvona lesvaku doropa afa dzritali hi svithombe.
17 Kutani asungula kuvonisana ni vayuda asinagogeni ni vhanu lavagandzrelaka Xikwembu Nkulukumba siku ni siku le bazara, ni lava afaka atlhangana navu.
18 Kambe van’we va tintlhazri ta xikole xa vaepikuri (Hitafa-Na-Hidile) ni xikole xa vaxitoyki (Hanya-Hi-Xixinya) vasunguli kudokadokisana naye. Van’we afa vaku: “Xana mhunu lweyi wa kupshapshazra ajula kuhlaya yini?” Van’wana vaku: “Ingaku i muzrezri wa svikwembu sva matiko man’wana.” Afa vahlaya lesvo hilesvi afaka azrezra madzrungula lamanene ya Yesu ni kupfuxiwa ka vafi.
19 Kutani vamukhoma vamuyisa hubzeni ya kuthetha timhaka ya le Xitsrungeni xa Arexi, vaku: “Xana ungahitlhamuxela lesvaku dondzro leyi ya yimpsha leyi ukanelaka ha yone hi leya ku yini?
20 Hikuva hosungula kuyingela timhaka leti utaka natu, kutani afa hinavela kutiva lesvi titlhamuxelaka svone.”
21 Kunene, vhanu hinkwavu va le Atena ni va kupfa matikweni mambeni lava afaka vatsrhama kone afa vatolovela kuhungata kone, vangayenci nchumu loko kunge kubzelana ni kuyingiseta ta timpsha.
22 Kutani Pawlu ayima amakazri ka huvo ya kuthetha timhaka ya le Xitsrungeni xa Arexi, aku: “Vavanuna va le Atena, hi matlhelo hinkwawu ndzrivona lesvaku n’wi vhanu lavachavaka ngopfu svikwembu.
23 Hikusa loko ndzrifambafamba ndzrivona minchumu leyi n’wimigandzrelaka, ndzrikumi ni alitari ledzri kungatsraliwa lesvi ku dzrone: ‘Ku Xikwembu Lexingativiwikiki.’ Kutani ke, lweyi n’wimugandzrelaka na n’wingamutivi, hi yelweyi ndzrin’wibzelaka ha yene.
24 Xikwembu Nkulukumba lwahambiki misava ni hinkwasvu lesvinga ku yone, lesvi anga Hosi ya tilo ni misava, angatsrhami amatempeleni ya kuhambiwa hi mavoko;
25 nakone angatizreliwi hi mavoko ya mhunu ingiki hi loko ovilela nchumu, hikusa yene hi ntshima anyika hinkwavu vutomi ni hefemulu ni minchumu hinkwayu.
26 Nakone ahambi matiko hinkwawu ya vhanu hi mhunu mun’we akuva vahanya ahenhla ka misava, nakone abeki minkama lemibekisiwiki ni mindzrilakana ya lomu vhanu vatsrhamaka kone,
27 lesvaku vajuletela Xikwembu Nkulukumba, loko kunene vangachuka vamuhulumetela, vava vamukuma. Nakone kunene anga kule ni mun’wana ni mun’wana wezru.
28 Hikuva ha yene hahanya hitlhela hifambafamba, nakone hi kone, svanga hesvi van’we va vatsrhokoveteli venu vahlayiki ha kone, vaku: ‘Hikuva na hine hi vana vakwe.’
29 “Xilesvo, lesvi hinga vana va Xikwembu Nkulukumba, ahifanelanga kupimisa lesvaku Lweyi anga Xikwembu afana ni gole, kumbe silivhela, kumbe zribze, kufana ni xivatliwa lexi mhunu axikhandhaka na svisukela nhlokweni yakwe.
30 Xilesvo, Xikwembu Nkulukumba nakunene angavanga na mhaka aminkameni leyi vhanu afaka vangativi nchumu; kambe svosvi aleleta vhanu hinkwavu va mimbangu hinkwayu lesvaku vatisola.
31 Hikusa abekisi siku ledzri ha dzrone ajulaka kuyavanyisa misava hi mhunu lweyi angamuhlawula, ava abeka xitiyiso ku hinkwavu hi kumupfuxa akufeni.”
32 Kutani loko vayingela ta kupfuxiwa ka vafi, van’we vasungula kumuhleka, kasi van’wana vaku: “Hahatatlhela hi kuyingela loko ukanela hi mhaka leyi.”
33 Kutani Pawlu asuka avasiya.
34 Kambe van’wana vavanuna vatitlhanganisa naye, vandzruluka vapfumeli. Amakazri ka vone afa ku na Diyonizu, lweyi afaka ali mun’we wa vayavanyisi va huvo ya kuthetha timhaka ya le Xitsrungeni xa Arexi, ni mun’we wansati lwavitaniwaka Damarisi, ni van’wana lavapfumeliki navu.