BRX

1   Kutani ni ko Ikoniya vanhingena asinagogeni dzra vayuda vavulavula hi ndlela leyiyenciki lesvaku kupfumela nhlayu leyikulu ya vayuda.

2   Kambe vayuda lava afaka vangapfumeli vahlohlotela vhanu va matiko, vavayenca vanyenya vamakwezru.

3   Xilesvo, vatsrhami nkama wa kuleha na vakanela hi xixixi, hi kudumba Yehovha, lweyi afaka atiyisa zritu dzra vumbilu bzakwe, hi kuvanyika vusvikoti bza kuyenca mahlolana ni svihlamaliso.

4   Kambe xitsrhungu xa doropa afa xiyavanile. Van’we afa vayima ni vayuda kasi van’wana afa vayima ni vapostola.

5   Kutani kuhuma xitsrhungu xa vhanu va matiko ni vayuda, kun’we ni vafumi vavu, na xijula kuvayencela tihanyi ni kuvakhandla hi mazribze.

6   Loko Pawlu na Barnaba vasvitivile, vatsrutsruma vaya amadoropeni ya Likawoniya, Lixtra na Derbe, ni le mugangeni lowunga kusuhi na kone.

7   Vaya mahlweni vazrezra madzrungula lamanene kone.

8   Kutani le Lixtra afa ku ni mun’we wanuna lweyi afaka atsrhami hansi, hilesvi milenge afaka mingatizri. Kusukela ahuma akhuzrini dzra mamana wakwe, afa angingisama afamba hi milenge.

9   Kutani lweyo wanuna afa ali kazri ayingiseta Pawlu loko avulavula. Kutani loko Pawlu amulangutisa, avona lesvaku awapfumela lesvaku angahanyisiwa,

10   abandlukana, aku: “Sekeleka uyima hi milenge yaku!” Kutani atlula asungula kufamba hi milenge.

11   Kutani loko svitsrhungu svivona lesvi Pawlu asviyenciki, svibandlukana hi lidzrimi dzra xilikawoniya, sviku: “Svikwembu sviticincile svifana ni vhanu, svihibuyela!”

12   Kutani vhanu vasungula kuvitana Barnaba vaku i Zewusi (N’wamatilo), kambe Pawlu vaku i Hermesi (Muzrumiwa wa Svikwembu), hilesvi afaka ali yene lweyi afaka avulavula ngopfu.

13   Kutani muprista wa Zewusi (N’wamatilo), lweyi tempele dzrakwe afaka dzrili amhazraneni ya doropa, atisa tinkuzi ni tingiyana ta sviluva atinyangweni na ajula kuhamba svitlhavelo kun’we ni svitsrhungu.

14   Nambitanu, loko vapostola Barnaba na Pawlu vasviyingela, vahandzrula sviyambalu svavu vatihoxa amakazri ka xitsrhungu vabandlukana, vaku:

15   “Vavanuna, n’wiyencela yini lesvi? Na hine hi vhanu va matsrhamela ya kufana ni yenu. Nakone hin’wibzela madzrungula lamanene, akuva n’witsrhika minchumu leyo lemingapfunikiki nchumu, n’wiya ku Xikwembu lexihanyaka, lexingahamba tilo ni misava ni lwandle ni hinkwasvu lesvinga ku svone.

16   Atinguveni letihundzriki, xitsrhiki matiko hinkwawu matifambela tindleleni ta wone,

17   kambe axitsrhamanga na xinge na vumboni bza kukomba lesvaku xi kone, hi kuyenca lesvinene, hi kun’winisela mpfula hi tilweni, xin’winyika ni tinguva ta mihandzru, xin’witata timbilu hi svakuda ni kutsrhava.”

18   Kambe, nambiloko vahlayi lesvo, avasvikotanga kusivela xitsrhungu kuvahambela svitlhavelo.

19   Kambe kutlhasa vayuda va le Antiyokiya ni le Ikoniya vahlohlotela svitsrhungu, kutani vhanu vakhandla Pawlu hi mazribze, vamukoka vamuhumexa handle ka doropa, na vapimisa lesvaku afile.

20   Nambitanu, loko vadondzrisiwa vatlhasa vamutsrandzrela makazri, apfuka anhingena adoropeni. Mundzruku ka kone asuka na Barnaba vaya Derbe.

21   Kutani loko vatwalisi madzrungula lamanene adoropeni dzroledzro vava vayenca vadondzrisiwa va kuhlawa kone, vatlheleli Lixtra, Ikoniya ni le Antiyokiya,

22   na vatiyisa timbilu ta vadondzrisiwa, vavakuca kutama vaya mahlweni ni lipfumelo, vaku: “Hifanela kunhingena amfun’wini wa Xikwembu Nkulukumba hi mahlomulo ya kutala.”

23   Kutani, loko vavahlawuleli vakulu abandleni dzrin’wana ni dzrin’wana, antsrhaku ka kukhongota ni kutitsrona svakuda, vavasiyi amavokweni ya Yehovha, lweyi vangapfumela ku yene.

24   Kutani vahundzra hi le Pizidiya vagama vanhingena Pamfilya.

25   Kutani loko vaheti kuzrezra zritu le Perga, vafulameli Atalya.

26   Vasuka kone vafamba hi lwandle vaya Antiyokiya, kunga lomu vangakombeleliwa kone vumbilu bza Xikwembu Nkulukumba akuva vayenca ntizro lowu vangawuheta.

27   Kutani loko vatlhasa, vahlengeleta bandla hinkwadzru, vadzrungula hinkwasvu lesvi Xikwembu Nkulukumba asviyenciki hi kutizrisa vone, ni ndlela leyi apfuleliki ha yone va matiko xipfalu akuva vakombisa lipfumelo.

28   Vagama vatsrhama kone nkama wa kuleha ni vadondzrisiwa.